"HOJI EShON BOBO" JOMʼE MASJIDI BINOSI QURILIShI JADAL OLIB BORILMOQDA

Mustaqillik – nafaqat millatimizning, balki moʻʼmin-musulmonlarning ham qadr-qimmatini joyiga qoʻydi. Yurtdoshlarimiz imon-eʼtiqodda sobit boʻlishib, toat-ibodatlarini emin-erkin iroda etish imkoniga ega boʻldilar. Butun mamlakatimizda, xususan, Amudaryo tumanida ham musulmonlarning Alloh oldidagi farz va qarz amallarini maromida, hech qiyinchiliklarsiz ado etmoqlari uchun zarur shart-sharoitlar yaratilgani barchaning qalbiga xushnudlik bagʻishlaydi.

Qipchoq shaharchasi markazida joylashgan “Hoji Eshon bobo” jomʼe masjidi binosi 1988-1989-yillarda xalq hashari yoʻli bilan guvala-loydan bunyod etilgan edi. Garchi poydevor-paxsasi guvaladan koʻtarilgan boʻlsa-da, oʻsha davrdagi savobtalab insonlarning kuch va ragʻbati tufayli masjid binosi avvalgi koʻrimsiz holatidan ancha yaxshilanib, namozxonlar uchun bir muncha qulay sharoitlar yaratilgani uchun masjid qavmi tashabbusi va savobga daxil insonlar koʻmagi bilan 2015-2017-yillarda qayta taʼmirlash-tiklash ishlari olib borildi.

Homiylar yordami bilan yangidan tahoratxona qurildi, masjidning tom qismi shiferlandi, zamonaviy deraza-romlar oʻrnatilib, namozxona pollandi va namozxonlarning ibodat qilishlari uchun zarur shart-sharoitlar yaratildi.

Lekin doimiy ravishda oʻsib borayotgan aholi, ayniqsa, namozxonlar safining kengayishi tufayli masjid hovlisi ham, namozxona, madaniy-maishiy boʻlmalar ham bugungi davr talabiga mos kelmay, ibodat paytida namozxonlar uchun qiyinchiliklar yuzaga kela boshladi. Ushbu muammoni hal etishning birdan-bir yoʻli – zamon talablariga mos keladigan yangi masjid binosini qurish edi.

Shu bois, “Hoji Eshon bobo” jomʼe masjidi imom-xatibi Rajabboy Habibullayev, “Yusuf Eshon bobo” jomʼe masjidi imom-xatibi Abdurahmon Matsapayev va Qipchoq shaharchasining yoshi ulugʻ keksalari, shaharcha faollari hamda faol musulmonlar bilan bamaslahat yangi masjid binosini qurish va qurilishga homiylik qilish istagida boʻlgan savobtalab insonlar bilan uchrashib, Oʻzbekiston Musulmonlari idorasi maʼmuriyatiga murojaat qildi.

Nihoyat 2021-yil 23-mart sanasidagi Oʻzbekiston Musulmonlari idorasi rahbariyatining 907-sonli xati bilan 2021-2023-yillarda “Hoji Eshon bobo” jomʼe masjidi binosini toʻla qayta qurishga ruxsat berildi.

2021-yilning 24-aprel sanasida esa Amudaryo tumani hokimi Sultonboy Yoʻldashevning 80-sonli qarori bilan “Hoji Eshon bobo” jomʼe masjidi qurilishi uchun “Hoji Eshon bobo” qadamjosi yonidan 80 sotix yer ajratib berildi.

Qipchoq shaharchasi xalqi va koʻp sonli namozxonlar uchun 2021-yilning 22-iyul sanasi katta shodiyonaga aylanib ketdi. Chunki aynan shu kuni “Hoji Eshon bobo” jomʼe masjidi qurilishi uchun moʻljallangan maydonga ramziy qoziq qoqilib, shu kunning oʻzida ilk tamal toshi qoʻyildi va masjid qurilishi koʻtarinki kayfiyatda boshlab yuborildi.

Bugungi kunda masjid binosining asosiy qismi tiklanib, gumbazlari qad rostladi. Masjidning, umumiy yer maydoni 625 kvadrat metr, kengligi 25 metrga 25 metrni tashkil etadi, sigʻimi esa 800 nafar namozxonga moʻljallangan.

Ayni paytda tahoratxona va qoʻshimcha xonalarining tomlari sifatli yopilib, shiferlash ishlari nihoyasiga yetkazilmoqda. Shuningdek, umumiy maydoni 400 kvadrat metr boʻlgan 40 metrga 10 metr kenglikdagi qoʻshimcha namozxonada ham qurilish-taʼmirlash, boʻyash-pardozlik ishlari koʻngildagidek olib borilmoqda.

Zamonaviy va sharqona meʼmoriy yechimga ega masjid binosi qurilishining muvaffaqiyatli tarzda amalga oshirilishini taʼminlash uchun quruvchilarga zarur sharoit va imkoniyat yaratib bergani qurilishga muntazam ravishda pishiq gʻisht yetkazib berayotgani uchun Amudaryo tumani hokimi Sultonboy Yoʻldashevdan quruvchilar mamnun. Shuningdek, savobtalab yurtdoshlarimiz ham masjid binosi qurilishiga oʻzlarining munosib hissalarini qoʻshmoqdalar.

– Bizga amaliy yordam koʻrsatayotgan barcha savobtalab insonlardan minnatdormiz, – deydi masjid imom-xatibi Rajabboy Habibullayev. – Ayniqsa, “Amudaryo qurilish mollari” korxonasi rahbariyatiga, barcha homiylarimizga chin dildan tashakkur izhor etamiz.

Ayni kunlarda Qipchoq shaharchasi husniga-husn bagʻishlab, kun sayin goʻzal qiyofa kasb etayotgan “Hoji Eshon bobo” jomʼe masjidi binosida ichki va tashqi pardozlash ishlari amalga oshirilmoqda.

Robiya Yoʻldosheva.