Choykoʻl ovulida «Noʻgʻay Eshon bobo» jome masjidining yangi binosi foydalanishga topshirildi
Amudaryo tumanining Choykoʻl ovulida xalqimizning koʻp asrlik qadriyatlari, iymon-eʼtiqodi va oʻzaro jipsligining timsoli sifatida, azaldan ahillik va bunyodkorlikni shior qilgan ovul ahlining xolis niyatlari va fidokorona mehnati mevasi oʻlaroq «Noʻgʻay Eshon bobo» jome masjidining muhtasham yangi binosi qad rostladi. Hashar yoʻli bilan barpo etilgan ushbu maskanning tantanali ochilish marosimi nafaqat hudud ahli, balki butun tuman jamoatchiligi uchun chinakam maʼnaviyat bayramiga aylandi.
Ochilish marosimida Qoraqalpogʻiston Respublikasi Vazirlar Kengashi Raisining oʻrinbosari Alisher Allaniyazov, Qoraqalpogʻiston musulmonlari qoziyoti qozisi Bahramaddin Razov, Amudaryo tumani hokimi Sobir Xoʻjametov hamda sektor rahbarlari, nuroniylar va keng jamoatchilik vakillari qatnashdilar.
Soʻzga chiqqanlar yurtimizda qadimdan anʼana boʻlib kelayotgan hasharning mohiyatiga alohida toʻxtaldilar. Taʼkidlandiki, hashar — bu shunchaki jamoaviy mehnat emas, balki millatning ruhiy birligi, mushkulini oson qilish yoʻlidagi birdamligi va kelajak avlodlarga qoldiriladigan ezgu merosdir. Ayniqsa, masjid kabi muqaddas dargohlarni tiklashda bu anʼananing oʻrni beqiyos boʻlib, u insonlar qalbida saxovat va fidoyilik tuygʻularini tarbiyalashga xizmat qiladi.
«Noʻgʻay Eshon bobo» masjidining yangi imorati qurilish jarayonida mahalla faollaridan tortib, tadbirkorlar va oddiy fuqarolargacha birdek masʼuliyat bilan yeng shimarib xizmat qildilar. Kimdir moddiy mablagʻ bilan hissa qoʻshgan boʻlsa, yana kimdir oʻz qoʻl mehnati, muhandislik mahorati yoki duo va ezgu tilaklari bilan mazkur xayrli ishga sherik boʻldi.
Ochilish marosimi doirasida masjid bunyod etilishida alohida jonbozlik koʻrsatgan, tunu kun mehnat qilgan quruvchilar va saxovatpesha homiylarga alohida ehtirom koʻrsatildi. Bir guruh faol fuqarolarga tashkilotchilar tomonidan tashakkurnomalar va esdalik sovgʻalari topshirildi. Bu kabi ragʻbatlantirishlar nafaqat qilingan mehnatning eʼtirofi, balki jamiyatda bunyodkorlik ruhini yanada kuchaytirishga xizmat qiluvchi muhim omildir.
Marosimda muqaddas Qurʼoni karim oyatlari tilovat qilindi. Yigʻilganlar yurtimiz tinchligi, osmoni musaffoligi, xalqimizning farovonligi va davlatimiz ravnaqini soʻrab duoga qoʻl ochishdi.
«Noʻgʻay Eshon bobo» jome masjidining yangi binosi Choykoʻl ovuli tarixida yangi sahifa ochdi. Ushbu muqaddas maskan kelgusi avlodlar uchun iymon-eʼtiqod, saxovat va birdamlik ramzi boʻlib qolaveradi. Zero, xalq birlashib bunyod etgan inshootning umri boqiy, fayzi esa beqiyosdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
