Қурбон ҳайити арафасида эзгу ташаббус: "Ҳожи эшон бобо" қабристони ҳудудида умумхалқ ҳашари ўтказилди
Муқаддас қадриятларимиз, асрлар оша авлоддан-авлодга ўтиб келаётган гўзал анъаналаримиз халқимизнинг ўзига хос маънавий қиёфасини, унинг бунёдкорлик салоҳиятини ёрқин намоён этади. Юртимизда меҳр-оқибат, саховат ва ҳамжиҳатлик айёми бўлмиш муборак Қурбон ҳайити яқинлашар экан, мамлакатимизнинг барча ҳудудларида, ҳар бир гўшада, маҳалла ва кўчаларда байрамона шукуҳ, ўзгача тараддуд нафаси яққол сезилмоқда.
Хусусан, ушбу улуғ айём арафасида республикамизнинг барча гўшаларида жойлашган тарихий зиёратгоҳлар, муқаддас қадамжолар ҳамда қабристонлар ҳудудини умумхалқ ҳашари йўли билан ободонлаштириш, уларни тоза ва озода ҳолатга келтиришдек хайрли ишлар умуммиллий миқёсда, кенг кўламда амалга оширилмоқда.
Халқимизнинг қонига чуқур сингган ҳашар анъанаси бу муборак кунларда янада кенгроқ бўй кўрсатиб, одамларни эзгу ва ягона мақсад йўлида бирлаштирмоқда. Инсон қадри ва хотираси азиз саналган диёримизда ҳар бир қадамжо ва зиёратгоҳларни асраб-авайлаш бугунги авлоднинг энг муҳим вазифаларидан саналади.
Ана шундай савобли ва эзгу тадбирлардан навбатдагиси Амударё туманида ҳам юқори уюшқоқлик билан ташкил этилди. Тумандаги Боғ маҳалласида жойлашган "Ҳожи эшон бобо" қабристонида бўлиб ўтган умумхалқ ҳашари бунинг ёрқин ифодаси бўлди. Мазкур хайрли ташаббусга "Нуроний" жамғармасининг туман бўлими бошлиғи Бекман Аллаберганов ҳамда ҳудуддаги маҳалла имомлари бевосита бошчилик қилдилар. Эътиборли ва қувонарли жиҳати шундаки, ушбу тадбирда нафақат кўпни кўрган, тажрибали нуроний отахонларимиз, балки келажагимиз эгалари бўлган ёшлар ва маҳалла аҳолисининг кенг қатлами фаол иштирок этди. Бундай уюшқоқлик катталарнинг шахсий намунаси орқали ёш авлод қалбида аждодлар хотирасига ҳурмат, меҳнатга муҳаббат ва юртга садоқат туйғуларини шакллантиришда беқиёс аҳамият касб этади.
Қизғин меҳнат ва ҳамжиҳатлик руҳида ўтган ҳашар давомида қабристон ҳудуди тартибга келтирилди. Жараён давомида қабрлар атрофи ва ҳудуд турли хил ёввойи ҳамда бегона ўт-хашаклардан тозаланди. Зиёратчилар учун мўлжалланган йўлаклар текисланиб, саранжом-саришта ҳолатга келтирилди. Шунингдек, ҳудуддаги мавжуд манзарали дарахтлар оқланиб, таги юмшатилди. Бажарилган ҳар бир ишда юртдошларимизнинг чин дилдан, фақатгина савоб умидида қилаётган ҳалол меҳнати ўзининг яққол ифодасини топди.
Халқимиз азал-азалдан ўтганларнинг охирати обод бўлишини сўраб дуо қилишни, аждодларнинг ёрқин хотирасига муносиб ҳурмат бажо келтиришни ўзининг энг олий инсоний бурчларидан деб ҳисоблайди. Шу маънода, қабристонларни ҳар томонлама обод ва саранжом сақлаш энг улуғ, энг савобли амаллар сифатида доимо қадрланиб келинади. Айниқса, меҳр-мурувват ва саховат тимсоли бўлган муборак Қурбон ҳайити арафасида юртдошларимиз томонидан уюшқоқлик билан амалга оширилаётган бундай кенг кўламли бунёдкорлик ишлари инсонлар қалбида меҳр-оқибат, ўзаро ҳамжиҳатлик, бағрикенглик ва эзгулик каби олижаноб туйғуларни янада мустаҳкамлашга хизмат қилади. Озодалик ва покизалик ҳукм сурган жойда доимо қут-барака бўлади, ўз тарихи ва аждодларини қадрлаган, уларни улуғлаган элнинг эса келажаги нурафшон ва фаровон бўлиши муқаррардир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
