Юрагида ўти бор фермер

Катта йўл бўйида ястаниб ётган кенг пахтазорлар ҳосили чамандай оппоқ бўлиб очилиб тургани учун худди поёнсиздай туюлади қараган кишига. Дала атрофи ёввойи ўтлардан тозаланиб, йўлаклар қўйилганлиги, йўлак четига экилган қовоқлар ҳосил тугиб, гуркираб ўсиб турганлиги, айниқса, ариқ бўйларидаги бир текис тизилишиб турган тераклар беихтиёр киши диққатини тортади. Кимлардир ўз ҳовлиси атрофини ободонлаштира олмай, томорқасини ўт босиб ётади-ю, интилиш бўлса, ҳатто бутун бошли, салкам икки юз гектарлик хўжалик ҳудудини ҳам ана шундай кўкаламзорлаштириш, ободонлаштириш мумкин экан-да.

Йўл бўйида, дала четига қурилган шинам шийпон атрофига экилган қовоқлар палаги ҳам шийпонга ўрмалаб турганини кўриб, афтидан хўжалик аъзолари қовоқни яхши кўришар экан-да, деб ўйларсиз? Йўқ, хўжалик ҳудудини айланган одам уларнинг ҳар бир қарич ердан унумли фойдаланаётганини англаши қийин эмас.

"Амирхон” фермер хўжалиги раиси Отахон Қурбониёзов тиниб-тинчимайдиган, хўжалик аъзоларидан ҳам шундай ҳаракатни талаб қиладиган одам. Шунинг учун ҳам барча экинлардан ҳамма далаларда мўл ҳосил етиштирилади, режалар ортиғи билан адо этилади. Улар ўтган йили 299 тоннадан зиёд пахта, 42,1 тонна ғалла, 1,1 тонна пилла, 14 тонна мева, 1,4 тонна балиқ, 3 тонна мойли экин ҳосили, 40 тонна картошка, 13,5 тонна сабзавот, 28,9 тонна шоли етиштирган эдилар. Бу йилги ҳосил чўғи ҳам ёмон эмас. Асосий экин – 92 гектар пахта майдонларидаги ҳар бир туп ғўза ҳосилдор бўлиб етилиши учун қилинган машаққатли меҳнатлар зое кетмади. Айни кунда илк теримнинг ўзидаёқ гектарлар ҳосилдорлиги 25 центнердан ошиб кетаяпти.

- Биринчи терим ҳеч бўлмаган-да, 40 центнер ҳосил берса экан, - ярим ҳазил, ярим чин пахтазорга қараб сўзлайди фермер. – Йўқ, мен буни очкўзлигимдан айтмаяпман. Мана шу кўриб турган далангиздаги ҳосил яралгунча қилинган меҳнат 40 центнер ва ҳатто ундан ҳам ортиқ ҳосил олишга арзийди.

Ҳа, пахта меҳрталаб, парваришталаб ўсимлик.

Отахон Қурбониёзов мазкур фермер хўжалигини тузган вақтида, 2002 йилда ерлар шўрлаб кетган, отизларнинг четларининг беш-олти метр жойини ёввойи ўтлар томири эгаллаб ётган эди. У ишни хўжалик ҳудудидаги заҳкашларни қаздириб, ерларнинг мелиоратив ҳолатини яхшилашдан бошлади. Тажрибали, омилкор деҳқонлардан маслаҳатлар, йўл-йўриқлар олди. Натижада ўғлининг номи билан аталувчи "Амирхон” фермер хўжалигини тумандаги деҳқончилик маданияти юксалган, илғор фермер хўжалигига айлантирди.

"Амирхон” фермер хўжалигида 2007 йилда 3 гектарлик боғ ташкил этилди, 2010 йилда балиқчилик, асаларичилик, чорвачилик ҳам йўлга қўйилди. Автомобилларга техник хизмат кўрсатиш, тикувчиликцехлари аҳолига хизмат кўрсатмоқда.

Отахон Қурбониёзовнинг меҳнатсеварлиги, тиришқоқлиги инобатга олиниб, унга 2008 йилда "Қиличбой” муқобил машина трактор парки раиси, 2012 йилда туман Фермерлар Кенгаши раиси лавозимлари ҳам ишониб топширилди. У буларнинг барининг уддасидан чиқаяпти.

- Кўнгилда шу ишни қилайин, деган ният бўлса, одам албатта ниятига етар экан, - дейди кулиб фермер.

Эзгу ниятлар йўлида қилган меҳнатлари, эришган ютуқлари уни элда эъзозли, обрў-эътиборли қилди, давлатимизнингэътирофларига сазовор этди: у 2008 йилда"Қорақалпоғистонда хизмат кўрсатган қишлоқ хўжалик ходими” унвони, 2010 йилда Ўзбекистон Республикаси мустақиллигининг 20 йиллиги кўкрак нишони соҳиби бўлди.

Яқинда Отахон Қурбониёзовнинг ҳаётида яна бир унутилмас воқеа содир бўлди. У Республикамиз мустақиллигининг 23 йиллиги байрами арафасида Юртбошимизнинг Фармонига кўра "Шуҳрат” медали билан тақдирланди. Хушхабарнинг қаноти бўлади, дейишадику, бу туманимизга тезда тарқалди. Қувонган, қутлаган, ҳавас қилганлар кўп бўлди, "юрагида ўти бор, тиниб-тинчимайдиган, сер-ғайрат йигит, меҳнатларининг роҳатини кўрсин”, дейишди.

- Эришаётган ютуқларимиз бутун жамоамизнинг меҳнати туфайли, - дейди фермернинг ўзи камтарлик билан. Инсонни меҳнати улуғлайди, деган иборанинг тасдиғини унинг тимсолида ҳам кўриш мумкин.

Отахон Қурбониёзов нафақат "Амирхон” фермер хўжалиги, нафақат "Қиличбой” ММТП хизмат кўрсатувчи 22 та фермер хўжаликлари, балки, туман Фермерлар Кенгаши таркибидаги барча фермер хўжаликлар фаолияти янада яхшиланиши, йил муваффақиятли якунланиши, режалари ортиғи билан адо этилиши учун масъул ҳисоблайди ўзини.

Қувонарлиси шуки, туманимиз пахта далаларида етиштирилган ҳосил, йиғим-терим суръати режалар бажарилиб, деҳқоннинг юзи ёруғ бўладиган кунлар яқинлигидан далолат бериб турибди.

М.Ҳабибуллаев олган суратлар.