Yuragida oʻti bor fermer

Katta yoʻl boʻyida yastanib yotgan keng paxtazorlar hosili chamanday oppoq boʻlib ochilib turgani uchun xuddi poyonsizday tuyuladi qaragan kishiga. Dala atrofi yovvoyi oʻtlardan tozalanib, yoʻlaklar qoʻyilganligi, yoʻlak chetiga ekilgan qovoqlar hosil tugib, gurkirab oʻsib turganligi, ayniqsa, ariq boʻylaridagi bir tekis tizilishib turgan teraklar beixtiyor kishi diqqatini tortadi. Kimlardir oʻz hovlisi atrofini obodonlashtira olmay, tomorqasini oʻt bosib yotadi-yu, intilish boʻlsa, hatto butun boshli, salkam ikki yuz gektarlik xoʻjalik hududini ham ana shunday koʻkalamzorlashtirish, obodonlashtirish mumkin ekan-da.

Yoʻl boʻyida, dala chetiga qurilgan shinam shiypon atrofiga ekilgan qovoqlar palagi ham shiyponga oʻrmalab turganini koʻrib, aftidan xoʻjalik aʼzolari qovoqni yaxshi koʻrishar ekan-da, deb oʻylarsiz? Yoʻq, xoʻjalik hududini aylangan odam ularning har bir qarich yerdan unumli foydalanayotganini anglashi qiyin emas.

"Amirxon” fermer xoʻjaligi raisi Otaxon Qurboniyozov tinib-tinchimaydigan, xoʻjalik aʼzolaridan ham shunday harakatni talab qiladigan odam. Shuning uchun ham barcha ekinlardan hamma dalalarda moʻl hosil yetishtiriladi, rejalar ortigʻi bilan ado etiladi. Ular oʻtgan yili 299 tonnadan ziyod paxta, 42,1 tonna gʻalla, 1,1 tonna pilla, 14 tonna meva, 1,4 tonna baliq, 3 tonna moyli ekin hosili, 40 tonna kartoshka, 13,5 tonna sabzavot, 28,9 tonna sholi yetishtirgan edilar. Bu yilgi hosil choʻgʻi ham yomon emas. Asosiy ekin – 92 gektar paxta maydonlaridagi har bir tup gʻoʻza hosildor boʻlib yetilishi uchun qilingan mashaqqatli mehnatlar zoye ketmadi. Ayni kunda ilk terimning oʻzidayoq gektarlar hosildorligi 25 tsentnerdan oshib ketayapti.

- Birinchi terim hech boʻlmagan-da, 40 tsentner hosil bersa ekan, - yarim hazil, yarim chin paxtazorga qarab soʻzlaydi fermer. – Yoʻq, men buni ochkoʻzligimdan aytmayapman. Mana shu koʻrib turgan dalangizdagi hosil yaralguncha qilingan mehnat 40 tsentner va hatto undan ham ortiq hosil olishga arziydi.

Ha, paxta mehrtalab, parvarishtalab oʻsimlik.

Otaxon Qurboniyozov mazkur fermer xoʻjaligini tuzgan vaqtida, 2002-yilda yerlar shoʻrlab ketgan, otizlarning chetlarining besh-olti metr joyini yovvoyi oʻtlar tomiri egallab yotgan edi. U ishni xoʻjalik hududidagi zahkashlarni qazdirib, yerlarning meliorativ holatini yaxshilashdan boshladi. Tajribali, omilkor dehqonlardan maslahatlar, yoʻl-yoʻriqlar oldi. Natijada oʻgʻlining nomi bilan ataluvchi "Amirxon” fermer xoʻjaligini tumandagi dehqonchilik madaniyati yuksalgan, ilgʻor fermer xoʻjaligiga aylantirdi.

"Amirxon” fermer xoʻjaligida 2007-yilda 3 gektarlik bogʻ tashkil etildi, 2010 yilda baliqchilik, asalarichilik, chorvachilik ham yoʻlga qoʻyildi. Avtomobillarga texnik xizmat koʻrsatish, tikuvchiliktsexlari aholiga xizmat koʻrsatmoqda.

Otaxon Qurboniyozovning mehnatsevarligi, tirishqoqligi inobatga olinib, unga 2008-yilda "Qilichboy” muqobil mashina traktor parki raisi, 2012-yilda tuman Fermerlar Kengashi raisi lavozimlari ham ishonib topshirildi. U bularning barining uddasidan chiqayapti.

- Koʻngilda shu ishni qilayin, degan niyat boʻlsa, odam albatta niyatiga yetar ekan, - deydi kulib fermer.

Ezgu niyatlar yoʻlida qilgan mehnatlari, erishgan yutuqlari uni elda eʼzozli, obroʻ-eʼtiborli qildi, davlatimizningeʼtiroflariga sazovor etdi: u 2008-yilda"Qoraqalpogʻistonda xizmat koʻrsatgan qishloq xoʻjalik xodimi” unvoni, 2010 yilda Oʻzbekiston Respublikasi mustaqilligining 20 yilligi koʻkrak nishoni sohibi boʻldi.

Yaqinda Otaxon Qurboniyozovning hayotida yana bir unutilmas voqea sodir boʻldi. U Respublikamiz mustaqilligining 23 yilligi bayrami arafasida Yurtboshimizning Farmoniga koʻra "Shuhrat” medali bilan taqdirlandi. Xushxabarning qanoti boʻladi, deyishadiku, bu tumanimizga tezda tarqaldi. Quvongan, qutlagan, havas qilganlar koʻp boʻldi, "yuragida oʻti bor, tinib-tinchimaydigan, ser-gʻayrat yigit, mehnatlarining rohatini koʻrsin”, deyishdi.

- Erishayotgan yutuqlarimiz butun jamoamizning mehnati tufayli, - deydi fermerning oʻzi kamtarlik bilan. Insonni mehnati ulugʻlaydi, degan iboraning tasdigʻini uning timsolida ham koʻrish mumkin.

Otaxon Qurboniyozov nafaqat "Amirxon” fermer xoʻjaligi, nafaqat "Qilichboy” MMTP xizmat koʻrsatuvchi 22 ta fermer xoʻjaliklari, balki, tuman Fermerlar Kengashi tarkibidagi barcha fermer xoʻjaliklar faoliyati yanada yaxshilanishi, yil muvaffaqiyatli yakunlanishi, rejalari ortigʻi bilan ado etilishi uchun masʼul hisoblaydi oʻzini.

Quvonarlisi shuki, tumanimiz paxta dalalarida yetishtirilgan hosil, yigʻim-terim surʼati rejalar bajarilib, dehqonning yuzi yorugʻ boʻladigan kunlar yaqinligidan dalolat berib turibdi.

M.Habibullayev olgan suratlar.