ҚОИДАБУЗАРГА ЖАЗО ТАЙИНЛАНДИ

Ота-боболаримизнинг кўзга кўринар-кўринмас бало-офатлардан сақлагай, деган гапида ҳикмат кўп. Ахир фалокат оёқ остида, салгина  эътиборсизлик, эҳтиётсизлик ҳам улкан кўнгилсизликларга сабаб бўлишини ҳаётнинг ўзи тасдиқламоқда.
2021 йилнинг 11 октябрида Жиноят ишлари бўйича туман судининг очиқ суд мажлисида муҳокама этилган Нукус шаҳрида истиқомат қилувчи, масъулияти чекланган жамиятда ишлаб, ўзига юкланган вазифани ёруғ юз билан уддалаб юрган, оилали, уч нафар фарзанднинг отаси бўлган Ў.Абдуллаев (исм-фамилиялар ўзгартирилган)га нисбатан очилган жиноят иши ҳақида эшитган одамнинг кўнглига ҳам шундай ўйлар келиши тайин.
У ўтган йилнинг кўкламида акаси номида бўлган “Cobalt” русумли машинани Назархон овули ҳудудидан ўтувчи “Ғузор-Бухоро – Нукус-Бейнов” А-380 автомобиль йўлида ҳаракатланиш жараёнида эҳтиёт чораларини кўрмасдан, олд томонида ўзи билан бир хил йўналишда ҳаракатланиб кетаётган фуқаро И.И. бошқарувидаги  “Damas” русумли автомашинани қувиб ўтиш мақсадида қарама-қарши йўналишга чиқиб, қарама-қарши йўналишда ҳаракатланиб келаётган фуқаро С.С. бошқарувидаги “Nexia” русумли автомашина билан тўқнашиб, йўл-транспорт ҳодисаси содир қилган. Натижада “Nexia” русумли автомашина асфальт йўлнинг шимолий қатнов қисмида кўндаланг ҳолатда туриб қолганлиги сабабли “Damas” русумли автомашина “Nexia” русумли автомашинанинг чап ён томонига бориб урилган ва  йўл четига чиқиб кетиб ағдарилган.  
Мазкур йўл-транспорт ҳодисаси натижасида “Nexia” русумли автомашинадаги 4 нафар йўловчилар, “Cobalt” русумли автомашинадаги йўловчи Ҳ.Т. ҳамда “Damas” русумли автомашина ҳайдовчиси Ў.Б.лар олган тан жароҳати натижасида ўзига келмасдан воқеа жойида вафот этган, “Nexia” русумли автомашина ҳайдовчиси тан жароҳатлари олиб, туман шифохонасига ётқизилган.
Суд ҳукми билан Ў.Абдуллаев Жиноят кодекси 266-моддаси 3-қисмининг “а” банди билан 3 йил муддатга транспорт воситаларини бошқариш ҳуқуқидан маҳрум қилиниб, 10 йил муддатга озодликдан маҳрум қилиш жазоси тайинланди ва етказилган моддий ва маънавий зарарларни фуқаровий даъвогарларга қоплаб бериш мажбурияти юкланди.

Ж.ЎРАЗБОЕВ,
Жиноят ишлари бўйича туман суди раиси.