БУГУН БИЗ КИМ БЎЛДИК – ОЗОД, ҲУР ДАВЛАТ!
Бозор тўкин – эл бадавлат
"Бозори ободнинг эли обод”, - дейдилар. Халқимиз тилидаги "бозор тўлмаса, халқ тўймайди”, - деган ибора ҳам бекорга айтилмаган. Чунки бозорларимиз – аввало халқимизнинг ҳам маънавий, ҳам иқтисодий қиёфаси ҳисобланади.
Ривоят
Шикорда чарчаган бир шоҳ яқин ўртадаги бозорга кириб, кўнглини ёзмоқчи бўлади. Кирсаки, бозор молга тўла. Мулозимларига кўнглига келган нарсани келтиришни буюради. Мулозимлар шоҳнинг амрини адо этаман, деб толиқиб қолишади. Шунда шоҳ:
- Бу бозор аҳлининг барчаси мендан ҳам бадавлат экан, - деган хулосага келади.
- Нечук? – ҳайратланишади мулозимлар. – Биз ахир бу бозорда Сиз ҳазрат каби бадавлат одамларни учратмадик, уларнинг барчаси сотувчи ва олувчи (харидор)лар эдилар, - дейишади.
- Сотувчининг молини олувчи қанча кўп бўлса, эл-юрт фаровон бўлади, бозори обод элнинг турмуши ҳам ободонда, - дейди шоҳ сиполик билан.
Ҳақиқат
Ана энди, азизлар, бизнинг Манғит бозоримизга бир боқинг-да, амударёликларнинг бугунги ҳаётига баҳо бераверинг.
- Манғит бозорларида жонингга не керак – ҳаммаси бор, - дейишади республикамизнинг турли ҳудудларидан туманимизга келиб-кетгувчи меҳмонлар.
Бозоримиз – маънавиятимиз ойнаси. Сабабки, бунда отнинг тақасидан тортиб, ихтирочи-тадбиркорлар томонидан яратилган кичик мотоблок ер ҳайдаш агрегати-ю, болалар машинасигача, туманимиз боғларининг тароватини ўзида жам этган қуруқ мевалардан тортиб ҳар донаси нақ ярим кило тош босгудай, шираси жонга дармон шафтоли-ю чанқовбосди аноргача бор. Келинг, мазасини тотиб кўринг! Ва боғини сўранг!
- Қиличбой, - дейдилар энг аввал.
- "Оқ олтин”, Қангли, "Чойкўл”, Хитой, "Чорбоғ”... Эҳ-ҳе, Сиз сўрайверасиз, юзлаб боғ-роғлар таърифини эшитасиз.
- Олмасангиз ҳам Қиличбойнинг гурвагидан тотиб кетинг, - дея марҳамат қилган деҳқоннинг олдидаги турфа навли қовун-тарвузларнинг ширасидан тотган тилларингиздан ҳам шарбат тўкилади-ёв!
- Ҳафтанинг сешанба, пайшанба, шанба кунлари ҳам худди катта бозор кунидагидай савдо қиламиз, - дейди қиличбойлик тадбиркор деҳқон Турсунбой Йўлдошев. – Чунки айнан ана шу кунлари Қорақалпоғистон Республикасининг Чимбой, Бўзатов, Нукус, Шўманой, Тахтакўпир, Қораўзак туманларидан, ҳатто Қўнғирот ва Мўйноқ туманларидан кўплаб юртдошларимиз Манғит деҳқон бозорига келишиб, кўплаб мева-чева харид қилиб кетишади. Уларнинг келиши бозоримизга ҳам, бизнинг савдомизга ҳам барака киритади.
- Бошқа туманлардан келганлар мева-чеванинг энг сараларини олиб кетишса, бозоримизда нарх-наво ошиб кетмайдими?
- Аксинча, - ўйлашиб олишгандай жавоб беришади сотувчи-деҳқонлар. – Олиб келган маҳсулотларимиз тез сотилган сари биз томорқамизда янги етилган маҳсулотларимизни бозорга олиб чиқаверамиз. Биринчидан, молимиз исроф бўлмайди, иккинчидан, дарагиям мўлда, опа!
Ана, кўрдингизми! Манғит Деҳқон бозорини сарҳил маҳсулотлар билан тўлдириб, ҳатто туманимиз халқи эҳтиёжидан орттириб, қўшни туманлар халқини ҳам мева-чева, сабзавот ва полиз маҳсулотлари билан таъминлашнинг уддасидан чиқаётир бугунги томорқа соҳиблари. Бозорларимиздаги бу тўкинчилик элимиз ҳаётини зийнатлаганини айтмайсизми?! Бугун халқимиз бозорга шунчаки харид учун кирмайди: олма-анорнинг энг сархилини олади, нашвати-ю гилосни, анжир-у шафтолини бир тотиб кўрмасдан тарозига босдирмайди. Чунки – бозор тўлиб-тошган, расталарда энг сархил маҳсулотлар терилган. Танлашга, савдолашиб харид қилишга имконият бор.
- Бундай тўкин-сочинликни, тўғриси, халқимиз ҳеч қачон кўрмаган, деҳқонларимизга раҳмат!
Бу харидорнинг эътирофи, балки шукронаси, мустақиллик туфайли халқимиз ҳаётига кириб келган ижтимоий-иқтисодий юксалиш, яхшилик, эзгулик томон эврилиш – Истиқлол ҳақиқатлари!
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
