ЭЛИМИЗНИНГ ПИР-У БАДАВЛАТ ОНАХОНЛАРИ ЭЪЗОЗЛАНДИ

Амударё туманида Вазирлар Маҳкамасининг “Кекса авлод вакилларининг жамиятдаги ўрни ва ижтимоий фаоллигини янада ошириш чора-тадбирлари тўғрисида”ги Қарори ижросини таъминлаш мақсадида “Кексаларни эъзозлаш, уларга ҳурмат-эҳтиром” ғояси остида 4-10 октябрь кунлари “Кексалар ҳафталиги” ўтказилди.

Ҳафталик доирасида туманда истиқомат қилаётган нуронийларнинг ҳолидан хабар олиш, уларни маънавий ва жисмоний қўллаб-қувватлаш, ҳурмат-эҳтиром кўрсатиш ва эъзозлаш бўйича қатор тадбирлар ўтказилди.

Жумладан, ҳафталик доирасида Тўлқин овул фуқаролар йиғинининг янги биноси очилиш маросими ўтказилиб, овул ҳудудида истиқомат қилувчи иккинчи жаҳон уруши  фронт ортида меҳнат қилган нуронийлар ҳолидан хабар олиниб, “Бир пиёла чой устида дилкаш суҳбатлар” тадбири ташкил этилди. Шунингдек, Қиличбой  мавзесидаги Хизр эли маҳалласида, Қипчоқ овул фуқаролар йиғинида ва туманимизнинг кўплаб овул ва маҳалла фуқаролар йиғинларида “Дийдор ширин” мавзусида адабий-мусиқий ва маърифий тадбирлар ташкил этилиб, нуронийлар билан файзли дастурхон атрофида давра суҳбатлари бўлиб ўтди.

Ҳафталик доирасида Ажиниёз номидаги Нукус давлат педагогика институти қошидаги Иқтидорли болалар мактабида кексалар ўртасида турли спорт мусобақалари, хусусан, шахмат-шашка, стол тенниси мусобақалари, “Кексаларни эъзозлаш, уларга ҳурмат-эҳтиром кўрсатиш – халқимизга хос эзгу фазилат”  ғоясини ўзида мужассам этган “Янги Ўзбекистонни барпо этишда нуронийларнинг ўрни” шиори остида маънавий-маърифий тадбирлар ўтказилиб, туманимиз маҳаллаларида яшовчи 90 ва 100 ёшдан ошган, иккинчи жаҳон уруши фронти орқасида меҳнат қилган нуронийлар билан суҳбатлар уюштирилди.

Тумандаги Чойкўл ҳамда Хизр эли маҳаллаларида истиқомат қилувчи 100 ёшдан ошган момолар ҳолидан хабар олинди, уларга совға-саломлар бериш билан бирга саломатлиги кўздан кечирилиб, тиббий кўрикдан ўтказилди.

Чойкўл овулидаги Хадича момо Беканова ўтган асрнинг 1915 йилида таваллуд топганлар. Ҳаётининг асосий қисмини қишлоқ хўжалиги соҳасига бағишланган момо собиқ иттифоқ даврида колхозлаштириш йилларининг фақат қўл меҳнати билан бажариладиган барча юмушларида жасорат ва матонат билан меҳнат қилди. Ариқ-зовурларни қазиш, пахтани қўлда экиш, қўш ҳайдаш каби оғир қўл меҳнатларида тобланган момо бугунги кунда невара-чеваралари, эл-юрт ардоғида. Президент Фармони билан 2020 йилда “Шуҳрат” медали билан тақдирланган Хадича момо Беканова 106 ёшни қаршиламоқда.

Хизр эли маҳалласида истиқомат қилувчи, пир-у бадавлат онахон Парда момо Бекниёзова ҳам икки аср юзини кўрган нуроний онахонлардан 106 ёшга тўлган Парда момо Бекниёзова ҳамон бардам ва тетик.

Туман Маҳалла ва оилани қўллаб-қувватлаш бўлими ходимлари “Кексалар ҳафталиги” доирасида “Элимизнинг пир-у бадавлатлари” шиори остида Чойкўл  овули ва Хизр эли маҳаллаларида  бўлишиб, Хадича момо ва Пардахон момолар ҳолидан хабар олишди.

Кўпни кўрган, пир-у бадавлат онахонлар билан дилдан, самимий суҳбат қуришиб, уларнинг ибратли умр ҳикояларидан баҳраманд бўлишди ҳамда онахонларга совғалар ҳадя этишди. Шу билан бирга нуроний онахонларни тиббий кўрикдан ўтказишди.

Робия ЙЎЛДОШЕВА.