Жамият 31.07.2021 👁 248

ҲОЖИ ЭШОН БОБО ЖОМЪЕ МАСЖИДИ ҚУРИЛИШИ ЖАДАЛ СУРЪАТДА ДАВОМ ЭТМОҚДА

Мамлакатимизда фуқароларнинг ўз диний эътиқодларини эмин-эркин ифода этишлари, ибодатларини мукаммал такомилига етказишлари учун яратилаётган шарт-шароит ва имкониятлар нафақат диний бағрикенгликнинг, балки ўзаро меҳр-оқибат, саховатпешаликнинг ҳам яққол кўриниши сифатида намоён бўлмоқда. Буни сўнгги йилларда мамлакатимизнинг турли ҳудудларида янгидан барпо этилаётган шарқона услубдаги муҳташам масжидлар, қайта таъмирланиб, кўркам қиёфа касб этаётган муқаддас қадамжолар, обод манзилга айлантирилган улуғ муҳаддислар мақбаралари мисолида кузатиш мумкин.

Амударё туманида ҳам халқимизнинг ўз исломий эътиқодларини диний аҳкомларга мутаносиб шароитларда намоён этишларини таъминлашга қаратилган саъй-ҳаракатлар туфайли Юсуф Эшон бобо, Ёқуб Эшон бобо, Бобо Рустам каби жомъе масжидлари саховатпеша юртдошларимиз, қолаверса, туманимиз масъулларининг беғараз ёрдамлари билан шарқона услубда қайта таъмирланиб, мазкур масжидларнинг жамоатлари учун зарур шарт-шароитлар яратилди.

Шуниси қувончлики, жорий йилнинг 24 июль санасида туманимизнинг мусулмонлар жамоати учун яна бир эзгу ишга қўл урилди. Амударё устига қурилаётган янги темир йўл ва автомобиль йўллари қўшма кўприги яқинида Ҳожи Эшон бобо жомъе масжидининг замон ва исломий талабларга жавоб берадиган янги биноси қурилишига илк тамал тоши қўйилди.

Ушбу қурилишининг бошланиши нафақат Қипчоқ шаҳарчаси ва шаҳарча атрофидаги овул ва маҳаллалар аҳолиси, балки бутун туманимиз халқига чексиз қувонч бағишлади.

Амударё туман ҳокимлиги, саховатпеша ҳомийларнинг қўллаб-қувватлови билан бошланган мазкур масжид қурилишига 3,5 млрд. сўм маблағ йўналтирилмоқда.

Янгидан бунёд этилаётган масжиднинг тарҳи намозхонлар учун барча қулайликлар ҳисобга олинган ҳолда ишлаб чиқилган. Унга кўра, асосий ибодат айвонидан ташқари, хонақоҳ, зиёратчилар дам олиши учун хизмат қилувчи хоналар, ошхона, таҳоратхона, масжид ҳовлисида яшил ҳудудларни барпо этиш режалаштирилган.

Масжид қурилиши учун рамзий қозиқ қоқиш маросими ўтказилганига атиги бир ҳафта бўлса-да айни пайтда янги масжид биносининг қурилиши жадал суръатларда давом эттирилмоқда. 50 нафарга яқин асосий қурувчи-усталардан ташқари, кўнгилли ҳашарчиларнинг саъй-ҳаракатлари билан бугунги кунда бу ҳудуд ўзаро меҳр-оқибатли, саховатли, фидойи инсонларни бир мақсад йўлида бирлаштирган катта бунёдкорлик майдонига айланган.

Қурувчи-усталарнинг ва ҳашарчиларнинг шаҳдлари баланд. Кун сайин, ҳатто соат сайин сафи ошиб бораётган кўнгилли ҳашарчилар ва саховатпеша инсонлар кўмаги билан масжид қурилишини 2021 йилнинг кеч кузигача якунлашни ният қилган қурувчиларга ҳудуд аҳолиси томонидан хайр-эҳсон дастурхонлари ёзилмоқда.

Халқимизда эзгу иш – элни бирлаштирар, деган замонлар синовидан ўтган ибора бор. Ҳақиқатан ҳам ислом оламининг етук намоёндаларидан бири бўлган Ҳожи Эшон бобо яшаб ўтган ва руҳи мангу қўним топган бу муқаддас масканда амалга оширилаётган бунёдкорлик ишлари туманимизда зиёрат туризмини ривожлантириш, шу билан бирга аждодлар хотирасига ҳурмат ва эътиборнинг амалий ифодасидир.

Шу ўринда саҳоватпеша юртдошларимизни масчид қурилиши учун хайрия қилишга чақирамиз:

Uzcard:

8600 0423 5608 8657

Хабибуллаев Ғофиржон Кенжабой ўгли

Viza:
4187 8000 0052 4777

Сбербанк орқали Агробанкга.

Ҳабибуллаев Ражаббой Кенжабой ўғли

Банк орқали:
ҳ/p: 20212000400417104002

МФО: 00619

СТИР: 202614462

Манғит.ш. Агро банк.

Админ: @rojabboy