ЙИҒИЛИШДА ЖИНОЯТЧИЛИКНИНГ ОЛДИНИ ОЛИШ МАСАЛАЛАРИ МУҲОКАМА ЭТИЛДИ

Республикамиз ҳудудида жиноятчиликка қарши кураш, ҳуқуқбузарлик ҳолатларининг олдини олиш борасида ҳуқуқ-тартибот идоралари томонидан кенг жамоатчилик билан ҳамкорликда қатор ишлар амалга оширилмоқда. Давлатимиз раҳбари томонидан ҳам бу борада маҳаллаларда жиноятчиликни жиловлаш, жамоат хавфсизлиги ва фуқаролар осойишталигини таъминлаш, жиноятчиликнинг олдини олишда “маҳаллабай” иш ташкил этиш бўйича тегишли вазифалар белгилаб берилди.

5 июль куни туман Ички ишлар бўлимида ушбу топшириқлар ижросини таъминлаш, маҳаллаларда жиноятчиликни жиловлаш, жамоат хавфсизлиги ва фуқаролар осойишталигини таъминлаш, жиноятчиликни олдини олиш борасида ташкил қилинган амалий ишларни муҳокама қилиш мақсадида йиғилиш ўтказилди. Йиғилишда секторлар раҳбарлари, тегишли давлат органлари ва ташкилотлари масъуллари иштирок этдилар.

Таъкидланганидек, ҳар бир маҳалла, оила ва шахс кесимида жиноятчиликнинг сабабларини аниқлаш, уларни бартараф этиш орқали ҳуқуқбузарликларнинг олдини олиш ва жиноятчиликка қарши курашишга оид муаммоларни бевосита жойларнинг ўзида ҳал этиш орқали самарали натижаларга эришилади. Шунингдек, ҳудудларда жиноятчилик аҳволидан келиб чиқиб, ҳар бир овул ва маҳаллани тоифаларга ажратиш ҳамда ҳокимлик, секторлар ва жамоатчилик билан ҳамкорликда «жиноят ўчоқлари»ни бартараф этиш учун барча зарур куч ва воситаларни жалб қилиш бугунги кундаги энг долзарб масалалардан бири ҳисобланади.

Йиғилиш давомида масъуллар Президентимизнинг шу йил  26 мартдаги “Жамоат хавфсизлигини таъминлаш ва жиноятчиликка қарши курашиш соҳасида ички ишлар органлари фаолиятини сифат жиҳатидан янги босқичга кўтариш чора-тадбирлари тўғрисида”ги Фармони жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашишнинг яхлит тизимини шакллантиришнинг устувор йўналишларини илгари суриш билан бирга, ички ишлар органлари тизимидаги ислоҳотларнинг янги даврини бошлаб берганига алоҳида тўхталиб ўтдилар. Шу нуқтаи назардан жиноятчиликка қарши курашиш ва ҳуқуқбузарликларнинг олдини олиш борасида умумий тартиб-таомиллар асосида ёндашишга нисбатан, ҳар бир ҳудуднинг ўзига хослигидан келиб чиқиб ишни ташкил қилишнинг афзаллиги ҳақида сўз юритилди.

Ундан ташқари, ҳудудларда содир этилаётган ҳуқуқбузарлик ва жиноятчилик ҳолатларининг келиб чиқиш сабабларини ўрганиш, “жиноят ўчоқ”ларини бартараф этиш ва жамоат хавфсизлигини таъминлаш борасидаги чора-тадбирлар ҳамжиҳатликда амалга оширилиши лозимлиги, бу борадаги амалий ишларга кенг жамоатчилик жалб этилиши кераклиги таъкидланди. Шунингдек, жамоат тузилмалари ва фуқароларнинг барча турдаги салбий ижтимоий иллатларга бўлган муросасизлик ҳиссини шакллантириш, уларнинг жамият ҳаётидаги ролини оширишга ҳам бу борада эътиборга олиниши лозим бўлган ишлардан бири сифатида қаралиши кераклиги айтилиб, тарғибот-ташвиқот ва профилактик тадбирларни янада кучайтириш муҳим аҳамиятга эга эканлиги эътироф этилди.

 Йиғилишда жиноятчиликни “маҳаллабай” жиловлаш борасидаги чора-тадбирларни амалда бажаришда “Темир дафтар”, “Аёллар дафтари” ва “Ёшлар дафтари” негизида маҳаллалар кесимида аниқ маълумотлар базасидан фойдаланилаётгани, бу эса ҳар бир муаммоли шахс билан якка тартибда манзилли ишлаш имконини бераётгани тўғрисида сўз юритилди. Бунинг натижасида низоли шахсларни яраштириш, аёлларга маънавий ва психологик ёрдам кўрсатиш, ишсизлар бандлигини таъминлаш, яъни муаммога қараб манзилли ишлаш тизими йўлга қўйилгани айтиб ўтилди.

Йиғилиш якунида масъуллар томонидан жиноятчилик ва ҳуқуқбузарликларнинг олдини олиш, жамоат хавфсизлигини таъминлаш, жамиятда тинчлик ва осойишталик ўрнатиш борасида тегишли чора-тадбирлар ҳамда вазифалар белгилаб олинди.

Орифжон Қосимов, туман ИИБ ҳуқуқбузарликлар профилактикаси бўлинмаси бошлиғи.