“COVID ҳали чекингани йўқ , огоҳ бўлинг!” мавзусида тезкор рейд тадбирлари ўтказилмоқда

Бутун дунё халқларини ларзага солган коронавирус инфекциясига қарши курашиш бугунги кунда инсониятнинг энг долзарб вазифаси бўлиб  турибди. Шу баробарида мамлакатимизда ҳам 2020 йилнинг март ойидан бери ушбу кўринмас ёв билан курашиш, инфекциянинг тарқалиш занжирини узиш, ҳудудларни коронавирус инфекцияси балосидан халос  этиш мақсадида Республика Махсус комиссиясининг қарори талаблари доирасида қатъий чора-тадбирлар амалга оширилмоқда. Гарчи, 2020 йил охирига бориб COVIDнинг тарқалиш тезлиги пасайиб, қамров майдони камайган бўлса-да, одамлар орасида касалланиш ва бири-биридан касалликни юқтириб олиш ҳолатларига узил-кесил барҳам берилмади. Аксинча, мамлакатимизда коронавирус инфекциясининг  2021 йил бошидан бери қайд этилиш даражаси муттасил ошиб бормоқда. Эпидемиологик таҳлиллар натижасида ҳозирги кунга келиб Республикамизда вирус билан касалланиш кўрсаткичи аста-секин ошиб, кунига 450-500 ва ҳатто айрим кунлари бундан ҳам ортиқни ташкил этмоқда. Касалланиш географияси ҳам кенгайиб, инфекцияни юқтириб олиш билан боғлиқ ҳолатлар мамлакатимизнинг барча вилоятларида, хусусан, Қорақалпоғистон Республикаси ҳудудида ҳам қайд этилмоқда.

Республика Махсус комиссиясининг қарорига кўра, аҳоли гавжум бўладиган жойларда  бироз чекловлар ўрнатилиб, тўйхоналарда тўй ўтказиш ва оилавий маросимларни ташкил этишда меҳмонлар сонини ҳаддан зиёд ошириб юбормаслик, бозорларда, озиқ-овқат маҳсулотлари билан савдо қилувчи дўконларда, умумий овқатланиш шохобчаларида карантин назорати кучайтирилди.

Чунки аҳолининг асосий қатлами бўлган ёшларимиз карантин қоидаларига амал қилишни  унутиб қўйишди. Оддийгина ниқоб тақиш, ижтимоий масофани сақлаш, антисептик воситалардан фойдаланиш, ҳатто шахсий  гигиена қоидаларига амал қилиш масалаларига  эътибор бермаслик ҳолатлари содир  этилмоқда. Ваҳоланки, ҳали коронавирус батамом чекингани йўқ. Қаттол вирус ҳамон орамизда юрибди ва ҳар куни юзлаб одамлар унинг тузоғига илинмоқда, ҳатто айрим юртдошларимиз COVID туфайли ҳаётдан бевақт кўз юмишмоқда.

Шуларни инобатга олган ҳолда  ва Республика Махсус комиссиясининг 2021 йил 25 июнь кунги 74-сонли Баённомаси талаблари ижросини таъминлаш мақсадида туманимиз ҳудудида жорий йил 28 июнь санасидан бошлаб туман ИИБ томонидан тунги  тезкор рейд тадбирлари ўтказилмоқда.

Ана шундай назорат тадбирларидан бири 28 июнь куни тунги соати 22-23лар оралиғида Манғит шаҳридаги умумовқатланиш шохобчаларида амалга оширилди. Рейд тадбири давомида тунги соат 22:40лар чамасида Манғит шаҳридаги “Manas” кофесида белгиланган карантин қоидалари талабларига риоя қилмасдан, тунги соат 20:00дан кейин ҳам, яъни 22:40лар чамасида хўррандаларга хизмат кўрсатилаётгани аниқланди.

Маълумки, Ўзбекистон Республикасининг Маъмурий жавобгарлик тўғрисидаги Кодексининг 54-моддасида эпидемияларга қарши кураш қоидаларини бузганлик учун жавобгарлик чоралари белгиланган. Ушбу жавобгарлик карантин ва инсон учун хавфли бошқа юқумли касалликлар пайдо бўлиши ва тарқалиши шароитида ваколатли органнинг махсус талабларига зид равишда жамоат жойларида ниқобсиз юриш ёки иш фаолияти юритиш – базавий ҳисоблаш миқдорининг  5 баравари, яъни 1 миллион 225 минг сўм миқдорида жарима жазоси қўллашга сабаб бўлади.

Рейд тадбири давомида мавжуд қонун-қоидаларга зид равишда, шунингдек, тунгги соат 20:00дан сўнг ҳам мижозларга хизмат кўрсатиш фаолиятини давом эттиргани учун Манғит шаҳридаги бир неча кафеларга Ўзбекистон Республикаси Маъмурий жавобгарлик тўғрисидаги Кодекснинг 54-моддаси 2-қисига асосан маъмурий баённома расмийлаштирилди.

Бу каби тезкор рейд тадбирлари туманимизнинг ҳар бир ҳудудида амалга оширилмоқда.

Тадбир иштирокчилари фуқароларга ўзи ва ўзгалар саломатлигига бефарқ бўлмаслик ўз саломатлигини асрашни ёддан чиқармаслик ҳақида зарур тушунтиришлар ҳам олиб боришмоқда. Чунки карантин қоидалари ҳали бекор қилингани йўқ, коронавирус эса нафақат бутун дунёда, балки мамлакатимизда ҳам тобора фаоллашиб бормоқда. Шу боис, азиз юртдошлар, жамоат жойларида тиббий ниқоб тақмасдан юрманг! Карантин қоидаларига амал қилиш – ҳаммамизнинг бурчимиз эканини унутманг! Зеро, халқимизнинг саломатлиги – авлодлар бардавомлигидир.

Робия ЙЎЛДОШЕВА.