МАСЪУЛИЯТНИ ҲИС ЭТИБ...

Туманимиз аҳолисини табиий газ билан таъминлаш, айниқса, марказий табиий газ тармоқларидан олисда жойлашган овул ва маҳаллалар аҳолисига маиший газ баллонларини етказиб бериш, табиий газ тармоқларига уланган хонадонларда фойдаланилган ҳар бир кубометр табиий газ учун белгиланган тўловларни ўз вақтида ҳисоб-китоб қилиб бориш ва бу борадаги муаммоларни тизимли равишда ҳал этишда “Ҳудудгазтаъминот” Амударё туман бўлими томонидан манзилли ишлар амалга оширилмоқда.
Хусусан, аҳолига табиий газ етказиб бериш ҳамда истеъмол қилиш соҳасида тўлов интизомини янада яхшилаш, бу борадаги ишларни тубдан такомиллаштириш мақсадида  аҳоли хонадонларида ўрнатилган ҳисоблагич ускуналари, иситиш қозонхоналари, қувурлар ҳажми ҳар мавсумда мутахассислар томонидан қатъий назоратдан ўтказилиб, аҳоли билан  тузилган шартнома асосида зарур ҳолатларда тиклаш-таъмирлаш ишлари амалга оширилмоқда. Айниқса, қишги ва ёзги мавсумлар алмашинуви жараёнида бу каби тадбирлар аниқ ва пухта режа асосида амалга оширилаётгани туфайли табиий газ истеъмолчилари мамнун.
- Қишлоқ жойлардаги аҳолини маиший газ баллонлари билан таъминлаб, олис овуллардаги хонадонларга суюлтирилган маиший газ баллонларини ўз вақтида, узлуксиз етказиб бермоқдамиз, - дейди “Ҳудудгазтаъминот” Амударё туман бўлими бошлиғи Ж.Эрметов. – Бу борада муаммо бўлмаслиги  учун олис овулларга газ баллонлари махсус жиҳозланган транспорт воситалари орқали етказиб берилмоқда.
Бу борада Қиличбой ОФЙ ҳудудидаги аҳоли хонадонларига, шунингдек, Дўрман, Хитой, Холимбег, Қангли ОФЙлари аҳолисига хизмат кўрсатувчи шохобчалар ходимлари томонидан амалга оширилаётган ишлар эътиборга лойиқ. Мазкур шохобчалар томонидан ногиронлиги бўлган ва кекса истеъмолчиларнинг хонадонларига бориб хизмат кўрсатиш йўлга  қўйилган.
- Овулимиз ҳудуди аҳолисига  хизмат кўрсатувчи шохобча ходими Анвар Тўраевдан миннатдорман, - дейди 2-гуруҳ ногирони, Қиличбой ОФЙда истиқомат қилувчи Дилбар Болтаева. - Суюлтирилган газ баллони таъминотида умуман узилиш йўқ. Ўзлари янгисини ўрнатиб, бўшаган газ баллонини олиб кетишади, беминнат хизмат кўрсатишади, барака топсин.
Бу каби миннатдорчилик сўзларини олис овулларда яшовчи кўплаб маиший баллонларидан фойдаланувчи истеъмолчилардан эшитиш мумкин. Зеро, халққа самарали хизмат кўрсатиш, “Ҳудудгазтаъминот” корхонаси Амударё туман бўлими мутахассислари учун зиммаларидаги масъулиятдир.

Ойимжон ЎРОЗАЛИЕВА,
газетанинг жамоатчи мухбири.