МАҲАЛЛАЛАРДА СУД-ҲУҚУҚ СОҲАСИДАГИ ЎЗГАРИШЛАРНИНГ МАЗМУН-МОҲИЯТИНИ ТУШУНТИРИШ БЎЙИЧА ТАРҒИБОТ ТАДБИРЛАРИ ЎТКАЗИЛДИ

Бугунги кунда мамлакатимизда суд-ҳуқуқ тизимини чуқур ислоҳ этиш ва либераллаштириш, суд ҳокимиятининг чинакам мустақиллигини, судлар фаолиятининг очиқлиги ва шаффофлигини, фуқаролар ҳуқуқ ва эркинликларининг ишончли ҳимоясини таъминлаш, аҳолининг одил судловга бўлган ишончини ошириш бўйича кенг миқёсли ишлар амалга оширилмоқда. Бу борадаги қонунчилик жараёни изчиллик билан такомиллаштирилмоқда ва янгиланмоқда. Шунингдек, судлар томонидан амалга оширилаётган ислоҳотларнинг мазмун-моҳиятини тушунтириш мақсадида жойларда мулоқотлар, учрашувлар ўтказилиб, аҳолининг ҳуқуқий билимлари оширилмоқда.
2021 йил 19 февраль куни Беруний, Навоий номли маҳаллаларда, шунингдек, Дўстлик ва Фаровон маҳаллаларида ҳам Фуқаролик ишлари бўйича Амударё туман суди раиси Қайрулла Атамуродов, Беруний туманлараро Иқтисодий суди судьялари Қ.Хожамуродов ва Б.Бекмуродовлар аҳоли билан учрашиб,  суд-ҳуқуқ соҳасидаги ўзгаришларнинг мазмун-моҳиятини тушунтириш, аҳолининг ҳуқуқий онги ва маданиятини ошириш бўйича тарғибот тадбирларини ўтказишди. Суд соҳаси масъуллари ушбу тадбирларда фуқароларнинг ҳуқуқ ва эркинликларини ишончли ҳимоя қилиш, аҳолининг ҳуқуқий маданиятини ошириш, сайёр судларнинг жиноятчилик ва ҳуқуқбузарликларнинг олдини олишдаги самараси, олиб борилган тарғибот ишлари тўғрисида ахборот бердилар.

Мазкур тадбирларда Фуқаролик ишлари бўйича Амударё туман суди раиси Қайрулла Атамуродов жамиятда ҳуқуқий онг ва ҳуқуқий маданиятни юксалтириб бориш, қонун устуворлигини таъминлаш ва қонунийликни мустаҳкамлашнинг энг муҳим шартларидан бири ҳисобланиши айтиб, аҳолининг ҳуқуқий саводсизлигига барҳам бериш бўйича белгиланган чора-тадбирларни амалга ошириш юзасидан салмоқли ишлар қилинаётгани тўғрисида сўз юритди. Шундан сўнг, Ўзбекистон Республикасининг 2021 йил 12 январдаги Қонунга мувофиқ Ўзбекистон Республикасининг Фуқаролик процессуал кодексига киритилган ўзгартиш ва қўшимчалар тўғрисида маълумот берди. Суд қарорлари устидан апелляция ва кассация шикоятларини бериш, уларни кўриш тартиби, фуқаролик ишларда прокурорнинг иштироки ва ваколатларини маҳаллалардаги аҳолига батафсил тушунтирди.

Беруний туманлараро Иқтисодий судининг судьяси Қ.Хожамуродов Ўзбекистон Республикасининг 2021 йил 12 январдаги Қонуни билан Иқтисодий процессуал кодексига киритилган ўзгартиш ва қўшимчалар тўғрисида сўз юритди. Шунингдек, ушбу Кодекснинг 25-моддасидаги иқтисодий судларга тааллуқли бўлган инвестициявий низолар бўйича ҳамда рақобатга оид ишлар, уларнинг судловга тегишлилик масалалари, иқтисодий ишларда прокурорнинг ваколатлари ҳақида кенг маълумот берди. Ундан ташқари, иқтисодий судларда суд қарорларининг қайта кўрилиши билан боғлиқ Иқтисодий процессуал кодексига киритилган ўзгартиришлар тўғрисида батафсил гапирди.
Беруний туманлараро иқтисодий судининг судьяси Б.Бекмуродов эса Ўзбекистон Республикасининг 2020 йил 23 декабрдаги “Мулкдорлар ҳуқуқлари ва қонуний манфаатларининг кафолатлари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги  Қонунининг мазмун-моҳияти ҳақида кенг тушунчалар берди. Жумладан, ушбу Қонунга асосан Ўзбекистон Республикасининг “Маҳаллий давлат ҳокимияти тўғрисида”ги, “Хусусий мулкни ҳимоя қилиш ва мулкдорлар ҳуқуқларининг кафолатлари тўғрисида”ги Қонунлари ва Ўзбекистон Республикасининг Ер кодексига киритилган ўзгартиш ва қўшимчаларни батафсил тушунтириб, аҳолининг ҳуқуқий билимларини оширди.
Учрашувларда суд-ҳуқуқ соҳаси масъуллари томонидан аҳолини қизиқтирган саволларга ҳам жавоблар берилди. Суд соҳаси масъуллари томонидан ўтказилган тарғибот тадбирлари аҳолининг ҳуқуқий билимларини кенгайтиришда муҳим аҳамият касб этди.

Озода Худойберганова.