Амударё туманида пресс-тур: маҳаллаларда аҳоли фаровонлиги йўлидаги ислоҳотлар ОАВ нигоҳида

Бугун юртимизда олиб борилаётган ислоҳотларнинг мазмун-моҳияти, уларнинг жойлардаги амалий натижалари ва оддий инсонлар ҳаётида қандай ўзгаришлар ясаётганини жамоатчиликка етказишда оммавий ахборот воситаларининг ўрни беқиёс. Шу мақсадда Амударё тумани ҳокимлигининг Ахборот хизмати ташаббуси билан тумандаги маҳаллаларда аҳоли фаровонлигини ошириш, тадбиркорликни ривожлантириш, хотин-қизларни қўллаб-қувватлаш ҳамда бандликни таъминлаш борасида амалга оширилаётган ишлар юзасидан кенг қамровли пресс-тур ташкил этилди.

Мазкур пресс-турда республика ва маҳаллий миқёсдаги етакчи ОАВ вакиллари — Ўзбекистон Миллий ахборот агентлиги (ЎЗА), “Севимли” телеканали, “Қорақалпоғистон” телерадиоканали, “Амударё” телеканали ҳамда “Тараққиёт кўзгуси” газетаси журналист ва мухбирлари иштирок этиб, маҳаллаларда олиб борилаётган ислоҳотлар, ижтимоий-иқтисодий лойиҳалар ҳамда яратилаётган янги имкониятлар билан бевосита жойида танишдилар.

Пресс-тур давомида ОАВ вакиллари туманнинг бир қатор маҳаллаларида бўлиб, тадбиркорлик субъектлари фаолияти, хотин-қизлар бандлиги, томорқачилик ва деҳқончиликни ривожлантиришга қаратилган ташаббуслар, шунингдек, аҳолининг турмуш шароитини яхшилаш борасида амалга оширилаётган ишларни кўздан кечирдилар. Ҳар бир манзилда амалга оширилаётган лойиҳалар аниқ мисоллар орқали намойиш этилиб, аҳоли билан очиқ мулоқотлар ўтказилди.

Хусусан, Уйшин маҳалласида тадбиркор ташаббуси билан бунёд этилган замонавий оилавий шифокорлик пункти фаолияти журналистларда катта қизиқиш уйғотди. Ушбу маскан маҳалла аҳолисига қулай ва сифатли тиббий хизмат кўрсатишга хизмат қилмоқда. Арна бўйи маҳалласида эса асаларичиликни ривожлантириш борасида амалга оширилаётган ишлар, бу соҳанинг аҳоли даромадини оширишдаги аҳамияти ёритиб берилди.

Шунингдек, Дўстлик маҳалласидаги “Янги Ўзбекистон” массиви таркибида барпо этилаётган замонавий кўп қаватли турар жойлар, аҳоли учун яратилаётган қулай яшаш шароитлари ОАВ вакилларига батафсил таништирилди. Бу лойиҳалар ҳудуд инфратузилмасини яхшилаш, аҳоли турмуш сифатини оширишга хизмат қилмоқда.

Пресс-тур доирасида Аёқчи маҳалласида хотин-қизлар бандлигини таъминлашга қаратилган намунали ташаббуслар ҳам эътибордан четда қолмади. Маҳаллада яшовчи Гавҳар Аннамуратова 15 йилдан буён тикувчилик ҳунари билан шуғулланиб келмоқда. Онасидан ўрганган ушбу касбни бугун тадбиркорлик даражасига кўтарган Гавҳар опа нафақат оиласини, балки бошқа хотин-қизларни ҳам иш билан таъминлаб келмоқда. Икки йил аввал маҳалла ҳоким ёрдамчиси ва хотин-қизлар фаоли кўмагида 100 миллион сўм кредит олиб, замонавий тикув ускуналарини харид қилган. Бугунги кунда буюртма асосида сифатли кўрпача, кўрпа ва ёстиқлар тикиб, аҳолига хизмат кўрсатмоқда. Энг қувонарлиси, у ўз ҳунарининг сир-асрорларини фарзандлари ва набираларига ўргатиб, келгусида кўплаб шогирдлар етиштириш ва янги иш ўринлари яратишни мақсад қилган.

Пресс-тур иштирокчилари Холимбег овулида яшовчи намунали томорқачи Эркинбой Қўшаев фаолияти билан ҳам яқиндан танишдилар. У ердан самарали фойдаланиб, йилига 3–4 мартагача ҳосил олаётган илғор деҳқонлардан бири саналади. 2021 йилдан буён лимон етиштиришни йўлга қўйиб, бу йил қарийб 400 килограмм лимон ҳосилидан салмоқли даромад олди. Бундан ташқари, Эркин ака янги деҳқончилик тажрибаларини синаб кўриб, картошканинг “Тошкент” навини экиш орқали юқори ҳосилга эришди ва уруғчиликни ривожлантиришга ўз ҳиссасини қўшмоқда. Томорқасида қулупнай, хурмо, картошка, пиёз, бодринг, помидор, сабзи, қовун, тарвуз, кўкатлар етиштириш билан бирга чорвачилик, паррандачилик ва қуёнчиликни ҳам йўлга қўйганлиги унинг меҳнатсеварлиги ва ташаббускорлигидан далолат беради. 

Пресс-тур иштирокчилари намунали томорқачининг ерга бўлган меҳри, деҳқончиликдаги тажрибалари ва меҳнат самаралари билан яқиндан танишиб, бу каби ташаббуслар бошқа ҳудудлар учун ҳам ўрнак бўлишини алоҳида таъкидлашди.

Хулоса ўрнида айтиш жоизки, бундай пресс-турлар ҳудудларда амалга оширилаётган ислоҳотларнинг очиқлигини таъминлаш, аҳоли ҳаётидаги ижобий ўзгаришларни кенг жамоатчиликка етказиш, шунингдек, оммавий ахборот воситалари билан самарали ҳамкорликни янада мустаҳкамлашда муҳим аҳамият касб этади. Энг муҳими, бу каби тадбирлар орқали инсон қадри, меҳнат ва ташаббус эъзозланаётган бугунги ислоҳотлар ҳаётий мисоллар орқали намоён бўлмоқда.

Чарос Арслонова, туман ҳокимлигининг Ахборот хизмати раҳбари.