Amudaryo tumanida press-tur: mahallalarda aholi farovonligi yoʻlidagi islohotlar OAV nigohida

Bugun yurtimizda olib borilayotgan islohotlarning mazmun-mohiyati, ularning joylardagi amaliy natijalari va oddiy insonlar hayotida qanday oʻzgarishlar yasayotganini jamoatchilikka yetkazishda ommaviy axborot vositalarining oʻrni beqiyos. Shu maqsadda Amudaryo tumani hokimligining Axborot xizmati tashabbusi bilan tumandagi mahallalarda aholi farovonligini oshirish, tadbirkorlikni rivojlantirish, xotin-qizlarni qoʻllab-quvvatlash hamda bandlikni taʼminlash borasida amalga oshirilayotgan ishlar yuzasidan keng qamrovli press-tur tashkil etildi.

Mazkur press-turda respublika va mahalliy miqyosdagi yetakchi OAV vakillari — Oʻzbekiston Milliy axborot agentligi (OʻZA), “Sevimli” telekanali, “Qoraqalpogʻiston” teleradiokanali, “Amudaryo” telekanali hamda “Taraqqiyot koʻzgusi” gazetasi jurnalist va muxbirlari ishtirok etib, mahallalarda olib borilayotgan islohotlar, ijtimoiy-iqtisodiy loyihalar hamda yaratilayotgan yangi imkoniyatlar bilan bevosita joyida tanishdilar.

Press-tur davomida OAV vakillari tumanning bir qator mahallalarida boʻlib, tadbirkorlik subʼektlari faoliyati, xotin-qizlar bandligi, tomorqachilik va dehqonchilikni rivojlantirishga qaratilgan tashabbuslar, shuningdek, aholining turmush sharoitini yaxshilash borasida amalga oshirilayotgan ishlarni koʻzdan kechirdilar. Har bir manzilda amalga oshirilayotgan loyihalar aniq misollar orqali namoyish etilib, aholi bilan ochiq muloqotlar oʻtkazildi.

Xususan, Uyshin mahallasida tadbirkor tashabbusi bilan bunyod etilgan zamonaviy oilaviy shifokorlik punkti faoliyati jurnalistlarda katta qiziqish uygʻotdi. Ushbu maskan mahalla aholisiga qulay va sifatli tibbiy xizmat koʻrsatishga xizmat qilmoqda. Arna boʻyi mahallasida esa asalarichilikni rivojlantirish borasida amalga oshirilayotgan ishlar, bu sohaning aholi daromadini oshirishdagi ahamiyati yoritib berildi.

Shuningdek, Doʻstlik mahallasidagi “Yangi Oʻzbekiston” massivi tarkibida barpo etilayotgan zamonaviy koʻp qavatli turar joylar, aholi uchun yaratilayotgan qulay yashash sharoitlari OAV vakillariga batafsil tanishtirildi. Bu loyihalar hudud infratuzilmasini yaxshilash, aholi turmush sifatini oshirishga xizmat qilmoqda.

Press-tur doirasida Ayoqchi mahallasida xotin-qizlar bandligini taʼminlashga qaratilgan namunali tashabbuslar ham eʼtibordan chetda qolmadi. Mahallada yashovchi Gavhar Annamuratova 15-yildan buyon tikuvchilik hunari bilan shugʻullanib kelmoqda. Onasidan oʻrgangan ushbu kasbni bugun tadbirkorlik darajasiga koʻtargan Gavhar opa nafaqat oilasini, balki boshqa xotin-qizlarni ham ish bilan taʼminlab kelmoqda. Ikki yil avval mahalla hokim yordamchisi va xotin-qizlar faoli koʻmagida 100 million soʻm kredit olib, zamonaviy tikuv uskunalarini xarid qilgan. Bugungi kunda buyurtma asosida sifatli koʻrpacha, koʻrpa va yostiqlar tikib, aholiga xizmat koʻrsatmoqda. Eng quvonarlisi, u oʻz hunarining sir-asrorlarini farzandlari va nabiralariga oʻrgatib, kelgusida koʻplab shogirdlar yetishtirish va yangi ish oʻrinlari yaratishni maqsad qilgan.

Press-tur ishtirokchilari Xolimbeg ovulida yashovchi namunali tomorqachi Erkinboy Qoʻshayev faoliyati bilan ham yaqindan tanishdilar. U yerdan samarali foydalanib, yiliga 3–4-martagacha hosil olayotgan ilgʻor dehqonlardan biri sanaladi. 2021-yildan buyon limon yetishtirishni yoʻlga qoʻyib, bu yil qariyb 400 kilogramm limon hosilidan salmoqli daromad oldi. Bundan tashqari, Erkin aka yangi dehqonchilik tajribalarini sinab koʻrib, kartoshkaning “Toshkent” navini ekish orqali yuqori hosilga erishdi va urugʻchilikni rivojlantirishga oʻz hissasini qoʻshmoqda. Tomorqasida qulupnay, xurmo, kartoshka, piyoz, bodring, pomidor, sabzi, qovun, tarvuz, koʻkatlar yetishtirish bilan birga chorvachilik, parrandachilik va quyonchilikni ham yoʻlga qoʻyganligi uning mehnatsevarligi va tashabbuskorligidan dalolat beradi. 

Press-tur ishtirokchilari namunali tomorqachining yerga boʻlgan mehri, dehqonchilikdagi tajribalari va mehnat samaralari bilan yaqindan tanishib, bu kabi tashabbuslar boshqa hududlar uchun ham oʻrnak boʻlishini alohida taʼkidlashdi.

Xulosa oʻrnida aytish joizki, bunday press-turlar hududlarda amalga oshirilayotgan islohotlarning ochiqligini taʼminlash, aholi hayotidagi ijobiy oʻzgarishlarni keng jamoatchilikka yetkazish, shuningdek, ommaviy axborot vositalari bilan samarali hamkorlikni yanada mustahkamlashda muhim ahamiyat kasb etadi. Eng muhimi, bu kabi tadbirlar orqali inson qadri, mehnat va tashabbus eʼzozlanayotgan bugungi islohotlar hayotiy misollar orqali namoyon boʻlmoqda.

Charos Arslonova, tuman hokimligining Axborot xizmati rahbari.