МАҲАЛЛАЛАРДА ХАВФСИЗ МУҲИТНИ ЯРАТИШ БЎЙИЧА МАНЗИЛЛИ ИШЛАР ДАВОМ ЭТМОҚДА
Ўзбекистон Республикаси Президентининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги Қарори ижросини таъминлаш юзасидан жойларда аниқ ва мақсадли ишлар амалга оширилмоқда. Хусусан, Амударё туманида мазкур ҳужжат талабларидан келиб чиққан ҳолда маҳаллаларда тинчлик-осойишталикни мустаҳкамлаш, ҳуқуқбузарликларнинг барвақт олдини олиш ҳамда аҳолининг хавфсизлигини таъминлашга қаратилган чора-тадбирлар изчил йўлга қўйилган.
Амударё тумани Ички ишлар бўлими ҳузуридаги Қўриқлаш хизмати томонидан 2026 йил давомида туман маҳаллаларида хавфсиз муҳитни яратиш ва профилактика ишлари самарадорлигини ошириш устувор вазифа сифатида белгиланган. Айниқса, криминоген вазияти оғир, “қизил” тоифага киритилган ҳудудларда манзилли ишлаш тизими асосида кенг қамровли тадбирлар амалга оширилмоқда. Туманнинг Дурунки маҳалласи ҳам криминоген вазият борасида “қизил” тоифага киритилган. Туман Ички ишлар бўлими ҳузуридаги Қўриқлаш хизмати томонидан мазкур ҳудудда аҳоли хонадонлари, тадбиркорлик объектлари ўрганилиб, қўриқлаш хизмати имкониятлари ва афзалликлари тўғрисида тушунтириш, тарғибот ва ташвиқот тадбирлари мунтазам ташкил этилмоқда.
Қўриқлаш хизмати томонидан амалга оширилаётган ишлар аниқ рақамларда ҳам ўз ифодасини топмоқда. Жорий йилнинг январь ойида 8 та тадбиркорлик объекти ҳамда 8 та фуқаро хонадонлари қўриқлаш ва ёнғиндан огоҳлантириш сигнализация воситалари орқали қўриққа олинди. Февраль ойида эса 2 та тадбиркорлик объекти, шунингдек, ҳимоя ордери берилган 61 нафар фуқаролар яшовчи хонадонлар замонавий техник воситалар ёрдамида муҳофазага олинди. Ушбу объект ва хонадонларга қўриқлаш ва ёнғиндан огоҳлантириш сигнализацияси ҳамда “Ташвиш” тугмаси ўрнатилиши орқали хавфсизлик даражаси оширилди. “Ташвиш” тугмасининг аҳамияти шундаки, агар оилада нотинчлик келиб чиқиб, ҳимояга олинган аёлларга хавф туғилса, ушбу тугма босилганидан кейин саноқли дақиқаларда Қўриқлаш хизмати ходимлари етиб келади.
Шунингдек, тумандаги 13 та кўп қаватли уйнинг кириш йўлакларига ҳам “Ташвиш” тугмалари ўрнатилиб, мазкур уйлардаги 156 та хонадон хавфсизлиги таъминланган ҳолда доимий қўриққа олинди. Бу эса кўп қаватли уйларда яшовчи аҳолининг хавфсизлигини таъминлаш, фавқулодда ҳолатларда тезкор чора кўриш имконини яратмоқда.
Мутахассислар таъкидлашича, манзилли ва тизимли ёндашув асосида амалга оширилаётган ушбу чора-тадбирлар маҳаллаларда ҳуқуқбузарликлар сонини қисқартириш, аҳолининг ҳуқуқий онги ва хавфсизлик маданиятини юксалтиришга хизмат қилади. Амударё туманида хавфсиз муҳитни яратиш борасида олиб борилаётган бу каби чора-тадбирлар эса Президент қарори ижросининг амалий ифодаси сифатида аҳоли фаровонлиги ва тинчлигини таъминлашга қаратилган муҳим қадам бўлиб хизмат қилмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
