ЎҚИТУВЧИЛАР СУЛОЛАСИНИНГ МУНОСИБ ВАКИЛИ
Бугунги глобаллашув даврида ёш авлодни турли ахборот хуружлари, менталитетимизга ёт ғоя ва қарашлардан ишончли ҳимоя қилишнинг йўли – уларга мактабгача таълим, умумий ўрта таълим ташкилотларида муносиб таълим-тарбия бериш, билимли ва маънавиятли қилиб вояга етказишдир.
Бежизга мактабларни мевали боғларга, устоз-муаллимларни боғбонларга ўхшатишмайди. Қутлуғ маскан – мактаб бағрига талпиниб келган мурғак боланинг эртага қандай инсон бўлиб вояга етиши устозларнинг саъй-ҳаракатларига боғлиқ.
Азизбек Жуманов ўрта мактабни тугатиб, ўқитувчи бўлиш орзусида олийгоҳ остонасига қадам қўйганида бу ҳақда кўп ўйлаган, машаққатли касбни танлаганини англар эди. Умр бўйи халқ таълими соҳасида меҳнат қилган, таниқли устоз, онаси Ҳамрохон Қосимова, раҳбарлик лавозимларида ишлаб, шу эл болаларининг камоли йўлида бор куч-ғайратини аямаган отаси Отабек Жумановларнинг далдаси унга куч бўлди. Низомий номидаги педагогика олийгоҳининг физика факультетини битириб келиб, ўзи таълим олган 15-сонли мактабда фаолиятини бошлаганига ҳам мана 20 йилдан ошди.
Ўтган давр мобайнида Азизбек ихтисослик танлашда адашмаганини ўз фаолиятида исботлади. Ҳар йили таълим берган ўқувчилари билимлар беллашуви, фан олимпиадаларида туман босқичларида ғолибликка эришиб, Қорақалпоғистон Республикаси босқичларида билимдон эканлигини намойиш этишмоқда. 2017-2018 ва 2018-2019 ўқув йилларида қаторасига икки йил фанлар олимпиадасида физика фанидан республика босқичида учинчи ўринни эгаллаган ўқувчиси Руслан Йўлдошев ҳозир олийгоҳ талабаси. Роҳатой Сафарбоева математика, Фарида Давлетова, Зеварой Бозорбоевалар эса ўзи билан бир сафда физика фанидан дарс беришаяпти.
Азизбек ўқитувчи ўз устида ишлаб, тинимсиз ўз билимини бойитиб, буни ёш авлод камоли йўлида сарфлаши керак, интилишдан тўхтаб қолмаслиги керак, деб ҳисоблайди. Ўзи ҳам шунга интилади. Шунинг учун ҳам мактабдан бўш вақтларида ўқув марказида репетиторлик ҳам қилади. Ҳар йили туманимизнинг неча-неча ўғил-қизлари ундан таҳсил олиб, олийгоҳлар талабаси бўлишаяпти.
Қорақалпоғистон Республикаси Халқ таълими аълочиси Азизбек Жумановнинг оиласини ўқитувчилар оиласи дейиш мумкин. Унинг онасидан ташқари укаси, синглиси, тўнғич қизи ҳам ўқитувчи, бири талаба, ўғиллари эса мактаб ўқувчилари.
Ўқитувчилар сулоласини касб байрами – 1 октябрь – Ўқитувчи ва мураббийлар куни билан қутлаб, эзгу тилакларимизни билдириб қоламиз.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
