Мустақилликнинг 35 йиллигига муносиб туҳфа: Амударёда 49 та оилага қувонч улашилмоқда

Мустақиллик — бу шунчаки сана ёки байрам эмас. У, аввало, халқнинг ўз тақдирини ўзи белгилаши, эртанги кунига ишонч билан қараши, инсон қадр-қиммати юксак қадрият сифатида эътироф этилиши демакдир. Шу боис истиқлол йилларида юртимизда амалга оширилаётган бунёдкорлик ва ободонлаштириш ишлари, аввало, инсон манфаатларига хизмат қилаётгани билан аҳамиятлидир.

Бугун мамлакатимиз ҳаётида улуғ айём — Мустақиллигимизнинг 35 йиллиги кенг нишонланар экан, бу қутлуғ сана Амударё туманида ҳам эзгу ташаббуслар, бунёдкорлик ишлари ва халқ манфаатига хизмат қилаётган амалий лойиҳалар билан қарши олинмоқда.

Айниқса, аҳолининг ижтимоий ҳимояга муҳтож қатламларини қўллаб-қувватлаш, эҳтиёжманд оилаларнинг яшаш шароитларини яхшилашга қаратилган ташаббуслар ўзининг инсонпарварлик моҳияти билан алоҳида эътиборга лойиқ.

Туман ҳокими Собир Хўжаметов ташаббуси билан Амударё туманидаги 49 та маҳалланинг ҳар бирида “Маҳалла еттилиги” тавсиясига асосан биттадан эҳтиёжманд, камбағал оила хонадони танлаб олиниб, уларда қурилиш-таъмирлаш ишлари ташкил этилди.

Бу — оддий қурилиш ёки таъмирлаш ишлари эмас. Бу ташаббус замирида инсон тақдирига бефарқ бўлмаслик, оилаларни қўллаб-қувватлаш, уларнинг эртанги кунга бўлган ишончини мустаҳкамлашдек эзгу мақсад мужассам.

Мазкур хайрли ишларни амалга оширишда туман ҳокимлиги, Маҳаллалар уюшмаси туман бўлими, Оила ва хотин-қизлар бўлими, маҳалла фаоллари, фермерлар, тадбиркорлар ҳамда саховатпеша ҳомийлар фаол иштирок этмоқда.

Бир мақсад — инсон қадрини улуғлаш, бир эзгу ният — оилаларга муносиб шароит яратиш атрофидаги ҳамжиҳатликнинг ўзи ҳам юртимизда кечаётган бунёдкорлик жараёнларининг ёрқин ифодасидир.

Дарё бўйи маҳалласида истиқомат қилувчи, “Аёллар дафтари”га киритилган Наргиза Абдиева хонадони ҳам ана шундай эзгу ташаббус доирасида таъмирланди.

Хонадонда қурилиш-таъмирлаш ишлари амалга оширилиб, оила учун зарур ва қулай шароитлар яратилди. Уйнинг таъмирдан чиқарилиб, фойдаланишга топширилиши эса хонадон эгалари учун Мустақиллик байрами арафасидаги унутилмас совғага айланди.

Хонадонни фойдаланишга топшириш маросимида туман ҳокими Собир Хўжаметов, ҳоким ўринбосарлари, бўлим ва ташкилотлар раҳбарлари, маҳалла фаоллари, нуронийлар ҳамда “Маҳалла еттилиги” вакиллари иштирок этди.

Тадбирда сўзга чиққан туман ҳокими Собир Хўжаметов Мустақиллигимизнинг 35 йиллиги арафасида амалга оширилаётган бундай хайрли ишлар, аввало, инсон манфаатларини таъминлашга қаратилган изчил сиёсатнинг амалий ифодаси эканини таъкидлади.

Шундан сўнг тадбирнинг энг ҳаяжонли лаҳзаларидан бири — рамзий тасмани қирқиш маросими бўлиб ўтди. Янги таъмирдан чиққан хонадоннинг калити ўз эгаларига тантанали равишда топширилди. Бу онларда хонадон соҳибларининг юзидаги қувонч, кўзларидаги мамнунлик барча иштирокчиларга ҳам кўтаринки кайфият бағишлади.

Тадбир иштирокчилари хонадонга ташриф буюриб, яратилган шароитлар билан яқиндан танишдилар. Дастурхон атрофида жам бўлган нуронийлар, маҳалла фаоллари ва меҳмонлар хонадон соҳибларига эзгу тилакларини билдирдилар. Ёши улуғлар янги хонадон эгаларига тинчлик-хотиржамлик, файзу барака, фарзандлар камолини кўришдек бахт насиб қилишини тиладилар.

Айни кунларда Амударё туманининг барча 49 та маҳалласида танлаб олинган эҳтиёжманд оилалар хонадонларида қурилиш-таъмирлаш ишлари давом эттирилмоқда. Ҳар бир маҳаллада амалга оширилаётган ушбу ишлар ортида бир оила, бир хонадон, бир инсон тақдири турибди. Шу жиҳатдан қараганда, 49 та маҳаллада бошланган бунёдкорлик — 49 та оиланинг ҳаётига кириб келаётган янгиланиш, қувонч ва умид демакдир.

Мустақилликнинг 35 йиллиги арафасида амалга оширилаётган бу каби бунёдкорлик ишлари халқимизга бўлган эътибор ва ғамхўрликнинг, инсон қадрини улуғлашга қаратилган сиёсатнинг амалий ифодасидир.

Чарос Арслонова, туман ҳокимлигининг Ахборот хизмати раҳбари.