Mustaqillikning 35 yilligiga munosib tuhfa: Amudaryoda 49 ta oilaga quvonch ulashilmoqda

Mustaqillik — bu shunchaki sana yoki bayram emas. U, avvalo, xalqning oʻz taqdirini oʻzi belgilashi, ertangi kuniga ishonch bilan qarashi, inson qadr-qimmati yuksak qadriyat sifatida eʼtirof etilishi demakdir. Shu bois istiqlol yillarida yurtimizda amalga oshirilayotgan bunyodkorlik va obodonlashtirish ishlari, avvalo, inson manfaatlariga xizmat qilayotgani bilan ahamiyatlidir.

Bugun mamlakatimiz hayotida ulugʻ ayyom — Mustaqilligimizning 35 yilligi keng nishonlanar ekan, bu qutlugʻ sana Amudaryo tumanida ham ezgu tashabbuslar, bunyodkorlik ishlari va xalq manfaatiga xizmat qilayotgan amaliy loyihalar bilan qarshi olinmoqda.

Ayniqsa, aholining ijtimoiy himoyaga muhtoj qatlamlarini qoʻllab-quvvatlash, ehtiyojmand oilalarning yashash sharoitlarini yaxshilashga qaratilgan tashabbuslar oʻzining insonparvarlik mohiyati bilan alohida eʼtiborga loyiq.

Tuman hokimi Sobir Xoʻjametov tashabbusi bilan Amudaryo tumanidagi 49 ta mahallaning har birida “Mahalla yettiligi” tavsiyasiga asosan bittadan ehtiyojmand, kambagʻal oila xonadoni tanlab olinib, ularda qurilish-taʼmirlash ishlari tashkil etildi.

Bu — oddiy qurilish yoki taʼmirlash ishlari emas. Bu tashabbus zamirida inson taqdiriga befarq boʻlmaslik, oilalarni qoʻllab-quvvatlash, ularning ertangi kunga boʻlgan ishonchini mustahkamlashdek ezgu maqsad mujassam.

Mazkur xayrli ishlarni amalga oshirishda tuman hokimligi, Mahallalar uyushmasi tuman boʻlimi, Oila va xotin-qizlar boʻlimi, mahalla faollari, fermerlar, tadbirkorlar hamda saxovatpesha homiylar faol ishtirok etmoqda.

Bir maqsad — inson qadrini ulugʻlash, bir ezgu niyat — oilalarga munosib sharoit yaratish atrofidagi hamjihatlikning oʻzi ham yurtimizda kechayotgan bunyodkorlik jarayonlarining yorqin ifodasidir.

Daryo boʻyi mahallasida istiqomat qiluvchi, “Ayollar daftari”ga kiritilgan Nargiza Abdiyeva xonadoni ham ana shunday ezgu tashabbus doirasida taʼmirlandi.

Xonadonda qurilish-taʼmirlash ishlari amalga oshirilib, oila uchun zarur va qulay sharoitlar yaratildi. Uyning taʼmirdan chiqarilib, foydalanishga topshirilishi esa xonadon egalari uchun Mustaqillik bayrami arafasidagi unutilmas sovgʻaga aylandi.

Xonadonni foydalanishga topshirish marosimida tuman hokimi Sobir Xoʻjametov, hokim oʻrinbosarlari, boʻlim va tashkilotlar rahbarlari, mahalla faollari, nuroniylar hamda “Mahalla yettiligi” vakillari ishtirok etdi.

Tadbirda soʻzga chiqqan tuman hokimi Sobir Xoʻjametov Mustaqilligimizning 35 yilligi arafasida amalga oshirilayotgan bunday xayrli ishlar, avvalo, inson manfaatlarini taʼminlashga qaratilgan izchil siyosatning amaliy ifodasi ekanini taʼkidladi.

Shundan soʻng tadbirning eng hayajonli lahzalaridan biri — ramziy tasmani qirqish marosimi boʻlib oʻtdi. Yangi taʼmirdan chiqqan xonadonning kaliti oʻz egalariga tantanali ravishda topshirildi. Bu onlarda xonadon sohiblarining yuzidagi quvonch, koʻzlaridagi mamnunlik barcha ishtirokchilarga ham koʻtarinki kayfiyat bagʻishladi.

Tadbir ishtirokchilari xonadonga tashrif buyurib, yaratilgan sharoitlar bilan yaqindan tanishdilar. Dasturxon atrofida jam boʻlgan nuroniylar, mahalla faollari va mehmonlar xonadon sohiblariga ezgu tilaklarini bildirdilar. Yoshi ulugʻlar yangi xonadon egalariga tinchlik-xotirjamlik, fayzu baraka, farzandlar kamolini koʻrishdek baxt nasib qilishini tiladilar.

Ayni kunlarda Amudaryo tumanining barcha 49 ta mahallasida tanlab olingan ehtiyojmand oilalar xonadonlarida qurilish-taʼmirlash ishlari davom ettirilmoqda. Har bir mahallada amalga oshirilayotgan ushbu ishlar ortida bir oila, bir xonadon, bir inson taqdiri turibdi. Shu jihatdan qaraganda, 49 ta mahallada boshlangan bunyodkorlik — 49 ta oilaning hayotiga kirib kelayotgan yangilanish, quvonch va umid demakdir.

Mustaqillikning 35 yilligi arafasida amalga oshirilayotgan bu kabi bunyodkorlik ishlari xalqimizga boʻlgan eʼtibor va gʻamxoʻrlikning, inson qadrini ulugʻlashga qaratilgan siyosatning amaliy ifodasidir.

Charos Arslonova, tuman hokimligining Axborot xizmati rahbari.