OʻQITUVChILAR SULOLASINING MUNOSIB VAKILI

Bugungi globallashuv davrida yosh avlodni turli axborot xurujlari, mentalitetimizga yot gʻoya va qarashlardan ishonchli himoya qilishning yoʻli – ularga maktabgacha taʼlim, umumiy oʻrta taʼlim tashkilotlarida munosib taʼlim-tarbiya berish, bilimli va maʼnaviyatli qilib voyaga yetkazishdir.

Bejizga maktablarni mevali bogʻlarga, ustoz-muallimlarni bogʻbonlarga oʻxshatishmaydi. Qutlugʻ maskan – maktab bagʻriga talpinib kelgan murgʻak bolaning ertaga qanday inson boʻlib voyaga yetishi ustozlarning saʼy-harakatlariga bogʻliq.

Azizbek Jumanov oʻrta maktabni tugatib, oʻqituvchi boʻlish orzusida oliygoh ostonasiga qadam qoʻyganida bu haqda koʻp oʻylagan, mashaqqatli kasbni tanlaganini anglar edi. Umr boʻyi xalq taʼlimi sohasida mehnat qilgan, taniqli ustoz, onasi Hamroxon Qosimova, rahbarlik lavozimlarida ishlab, shu el bolalarining kamoli yoʻlida bor kuch-gʻayratini ayamagan otasi Otabek Jumanovlarning daldasi unga kuch boʻldi. Nizomiy  nomidagi pedagogika oliygohining fizika fakultetini bitirib kelib, oʻzi taʼlim olgan 15-sonli maktabda faoliyatini boshlaganiga ham mana 20-yildan oshdi.

Oʻtgan davr mobaynida Azizbek ixtisoslik tanlashda adashmaganini oʻz faoliyatida isbotladi. Har yili  taʼlim bergan oʻquvchilari bilimlar bellashuvi, fan olimpiadalarida tuman bosqichlarida gʻoliblikka erishib, Qoraqalpogʻiston Respublikasi bosqichlarida bilimdon ekanligini namoyish etishmoqda. 2017-2018 va 2018-2019 oʻquv yillarida qatorasiga ikki yil fanlar olimpiadasida fizika fanidan respublika bosqichida uchinchi oʻrinni egallagan oʻquvchisi Ruslan Yoʻldoshev hozir oliygoh talabasi. Rohatoy Safarboyeva matematika, Farida Davletova, Zevaroy Bozorboyevalar esa oʻzi bilan bir safda fizika fanidan dars berishayapti.

Azizbek oʻqituvchi oʻz ustida ishlab, tinimsiz oʻz bilimini boyitib, buni yosh avlod kamoli yoʻlida sarflashi kerak, intilishdan toʻxtab qolmasligi kerak, deb hisoblaydi. Oʻzi ham shunga intiladi. Shuning uchun ham maktabdan boʻsh vaqtlarida oʻquv markazida repetitorlik ham qiladi. Har yili tumanimizning necha-necha oʻgʻil-qizlari undan tahsil olib, oliygohlar talabasi boʻlishayapti.

Qoraqalpogʻiston Respublikasi Xalq taʼlimi aʼlochisi Azizbek Jumanovning oilasini oʻqituvchilar oilasi deyish mumkin. Uning onasidan tashqari ukasi, singlisi, toʻngʻich qizi ham oʻqituvchi, biri talaba, oʻgʻillari esa maktab oʻquvchilari.

Oʻqituvchilar sulolasini kasb bayrami – 1-oktyabr – Oʻqituvchi va murabbiylar kuni bilan qutlab, ezgu tilaklarimizni bildirib qolamiz.

Oygul RAJABOVA.