Амударёлик йога мураббийлари Жаҳон чемпионатида муносиб иштирок этди

Бугунги кунда соғлом турмуш тарзи, жисмоний фаоллик ва руҳий саломатликни мустаҳкамлаш масалалари жамият тараққиётининг муҳим омилларидан бирига айланиб бормоқда. Ана шундай эзгу мақсадлар йўлида фидойилик билан меҳнат қилиб келаётган амударёлик профессионал йога мураббийлари — она-бола Гулчирой Каримова ва унинг қизи Фарангиз Жаббарбергенова нафақат туманимиз, балки бутун мамлакатимиз шарафини халқаро майдонда муносиб ҳимоя қилиб қайтишди.

Улар тарихда илк маротаба Ҳиндистоннинг Аҳмадобод шаҳрида ўтказилган Йогасана бўйича Жаҳон чемпионатида Ўзбекистон терма жамоаси таркибида иштирок этиб, юртимиз вакиллари сафида муносиб натижаларни қўлга киритдилар. Бу эса Амударё тумани спорт ва саломатлик ҳаракати тарихида муҳим воқеа сифатида эътироф этилмоқда.

2026 йил 4-8 июнь кунлари Ҳиндистоннинг Аҳмадобод шаҳридаги замонавий EKA Arena мажмуасида илк бор “World Yogasana Championship 2026” — Ёгасана бўйича Жаҳон чемпионати бўлиб ўтди. Нуфузли мусобақада дунёнинг 60 дан ортиқ давлатидан 400 нафардан зиёд спортчи иштирок этиб, йога санъати ва спорт маҳорати борасида ўзаро беллашдилар. Ушбу чемпионат йогасананинг халқаро спорт тури сифатидаги нуфузи тобора ортиб бораётганини яна бир бор намоён этди.

Ўзбекистон терма жамоаси сафида қатнашган Гулчирой Каримова ва Фарангиз Жаббарбергенованинг жаҳон ареналаридаги иштироки юртимизда, хусусан, Амударё туманида йога спортининг ривожланаётганидан далолат беради. Уларнинг ушбу муваффақияти ёшлар, айниқса, хотин-қизлар учун катта рағбат ва ўрнак бўлиб хизмат қилмоқда.

Амударё тумани ҳокимининг ўринбосари, Оила ва хотин-қизлар бўлими бошлиғи Гўзал Сабурова туманнинг Навоий номли маҳалласида ташкил этилган йога клубига ташриф буюриб, Ўзбекистон терма жамоаси аъзолари, тажрибали йога мураббийлари Гулчирой Каримова ва Фарангиз Жаббарбергеновани Жаҳон чемпионатидаги муваффақиятли иштироки билан самимий табриклади.

Тадбир давомида она-бола мураббийларнинг юртимиз спорти ва хотин-қизлар саломатлигини мустаҳкамлаш йўлидаги хизматлари юксак баҳоланди. Шунингдек, келгусида йога спортини янада ривожлантириш, ёшлар ва хотин-қизлар ўртасида оммалаштириш, соғлом турмуш тарзини кенг тарғиб қилиш борасидаги вазифалар ҳақида фикр алмашилди.

Амударё туманида йога билан шуғулланишга қизиқаётган хотин-қизлар сони йилдан-йилга ортиб бормоқда. Бу борада профессионал йога мураббийи Гулчирой Каримованинг хизматлари алоҳида эътиборга лойиқ. У соғлом турмуш тарзини тарғиб этиш, аёллар саломатлигини мустаҳкамлаш ва уларнинг бўш вақтини мазмунли ташкил этиш йўлида самарали фаолият юритиб келмоқда.

Мураббий ўз ташаббуси ва саъй-ҳаракатлари билан Тўлқин овули, Навоий номли маҳалла ҳамда Қипчоқ шаҳарчасида хотин-қизлар учун йога клубларини ташкил этиб, юзлаб аёлларни соғлом ҳаёт сари етакламоқда. Ушбу клубларда нафақат жисмоний машқлар ўргатилади, балки соғлом турмуш маданияти, руҳий хотиржамлик ва ҳаётий фаолликни оширишга қаратилган машғулотлар ҳам мунтазам олиб борилади.

Мутахассисларнинг таъкидлашича, йога инсон организмига кўплаб фойда келтиради. У мушаклар ва бўғимларнинг мослашувчанлигини оширади, қоматни тиклайди, қон айланишини яхшилайди, стресс ва руҳий зўриқишларни камайтиради. Айниқса, хотин-қизлар саломатлигини мустаҳкамлаш, ҳомиладорлик, оналик давридаги жисмоний ва руҳий ҳолатни яхшилашда йога машғулотлари муҳим аҳамият касб этади. Шу боис бугунги кунда Амударё туманида ушбу спорт тури билан шуғулланувчилар сафи тобора кенгайиб бормоқда.

Шубҳасиз, Гулчирой Каримова ва Фарангиз Жаббарбергенованинг халқаро майдондаги иштироки Амударё тумани учун катта фахрдир. Уларнинг меҳнати ва фидойилиги туфайли бугун кўплаб хотин-қизлар соғлом ҳаёт сари дадил қадам ташламоқда. Жаҳон чемпионатида қўлга киритилган ютуқлар эса нафақат шахсий муваффақият, балки юртимизда йога спортининг ривожланиши, хотин-қизлар саломатлигини мустаҳкамлаш ва соғлом авлодни тарбиялаш йўлидаги саъй-ҳаракатларнинг амалий натижасидир.

Чарос Арслонова, туман ҳокимлигининг Ахборот хизмати раҳбари.