Амударёлик тадбиркор I даражали "Меҳнат фахрийси" кўкрак нишони билан тақдирланди

Жамиятда инсон қадрини улуғлаш, кўп йиллик ҳалол меҳнати билан эл-юрт фаровонлигига муносиб ҳисса қўшган фахрийларни эъзозлаш юртимизда олиб борилаётган ислоҳотларнинг энг муҳим йўналишларидан саналади. Шу мақсадда, жорий йилнинг 11 июль куни Нукус шаҳрида жойлашган "Оқ қуш" мажмуасида маънавий-маърифий аҳамиятга эга бўлган "Уч авлод учрашуви" номли катта тадбир ташкил қилинган эди.

Мазкур тантанали маросимда Қорақалпоғистон Республикаси Жўқорғи Кенгесининг Раиси Аманбай Оринбаев сўзга чиқиб, мамлакатимиз тараққиёти йўлида фидокорона меҳнат қилаётган бир гуруҳ фахрийлар ҳамда турли соҳа вакилларининг ибратли ҳаёт йўлини алоҳида эътироф этди. Тадбирда Ўзбекистон Республикаси Президентининг маслаҳатчиси Турсунхон Худайбергенов, Ўзбекистон “Нуронийлар” жамғармаси бошқаруви раиси Содиқжон Турдиев ҳамда Қорақалпоғистон Республикаси “Нуроний” жамғармаси раиси Турсинбай Абдижаббаровлар иштирок этиб, Ватан равнақига салмоқли ҳисса қўшган бир қатор фахрийларга “Меҳнат фахрийси” кўкрак нишонлари ва қимматбаҳо эсдалик совғаларини тантанали равишда топширдилар.

Ушбу юксак мукофотга сазовор бўлганлар қаторида амударёлик фахрий нуроний, Қорақалпоғистон Республикасида хизмат кўрсатган коммунал, маиший хизмат ва савдо ходими, тажрибали тадбиркор Турсунбой Аҳмедов ҳам бор. Узоқ йиллик самарали меҳнатларининг эътирофи сифатида у I даражали "Меҳнат фахрийси" кўкрак нишони билан тақдирланди.

85 ёшни қарши олган Турсунбой ота Аҳмедов ўзининг қалбидаги ёшларга хос ғайрат-шижоати, ҳаётга бўлган чексиз иштиёқи ва меҳнаткашлиги билан барчага ўрнак бўлиб келмоқда. Қаҳрамонимиз қарийб 40 йилдан буён “Манғит” масъулияти чекланган жамиятига раҳбарлик қилиб келади. Эътиборлиси шундаки, дастлаб фақатгина 4 турдаги маиший хизмат кўрсатиш билан ўз фаолиятини бошлаган ушбу жамият, бугунги кунга келиб аҳолига кенг қамровли хизматларни тақдим этаётган йирик марказга айланган. Жумладан, масканда маиший техника таъмири, пайвандлаш, темирчилик, вулканизация, сартарошлик ва тикувчилик каби кўплаб йўналишларда аҳолига юқори сифатли хизмат кўрсатилмоқда. Ушбу корхона нафақат аҳолининг узоғини яқин қилувчи хизмат нуқтаси, балки кўплаб инсонларни иш билан таъминлаган, касбга меҳр уйғотувчи ва устоз-шогирд анъаналарини ўзида мужассам этган чинакам мактабдир.

Турсунбой отанинг юксак раҳбарлик салоҳияти ва билимдонлиги туфайли корхонада меҳнат қилаётган ҳар бир мутахассис ўз соҳасининг етук устасига айланган. Хусусан, жамиятда фаолият юритувчи сартарош Шуҳрат Бозорбоев Ўзбекистон Сартарошлар Ассоциацияси томонидан ўтказилган кўргазмада фаол иштирок этиб, фахрли 3-ўринни қўлга киритгани сўзимизнинг яққол исботидир. Шунингдек, бугунги кунда Турсунбой отанинг невараси Асадбек ҳам бобосининг касбини давом эттириб, сартарошлик йўналишида халқимизга сидқидилдан хизмат қилмоқда. У ҳар бир ишни пухта ва сифатли бажаришга интилиб, корхонада ижрочи директор вазифасини ҳам масъулият билан бажариб келмоқда. Бундан ташқари, Турсунбой ака барпо этган ушбу бинода кўплаб тадбиркор ва ишбилармонлар ўз бизнесларини юритиб, эл-юрт манфаати йўлида меҳнат қилмоқдалар.

Қаҳрамонимизнинг энг гўзал фазилатларидан бири унинг саховатпешалигидир. У доимо эҳтиёжманд ва муҳтож инсонларга яқиндан кўмак бериб, қўлидан келган ёрдамини ҳеч қачон аямайди. Айниқса, 2020 йилда, коронавирус инфекцияси кенг тарқалган мураккаб даврда ўзининг Умра зиёрати учун жамғариб қўйган маблағини кўмакка муҳтож инсонларнинг ҳолидан хабар олиш йўлида эҳсон қилгани Турсунбой отанинг қалби қанчалик кенг ва меҳрга тўла эканлигини яна бир бор тасдиқлайди.

Турсунбой ота Аҳмедов доимо замон билан ҳамнафас яшаб, мамлакатимизда олиб борилаётган ислоҳотларни қизғин қўллаб-қувватлайди ва юрт розилигини ўзининг энг улуғ мақсади деб билади. Унинг узоқ йиллик ҳалол меҳнати ва фидойилиги эвазига яратган умр боғи бугунги кунга келиб ўзининг ширин меваларини бермоқда. Ушбу баракали боғдан нафақат унинг фарзандлари ва неваралари, балки бутун эл-юрт баҳраманд бўлмоқда. Унинг бой ҳаётий тажрибаси ва меҳнат йўли билан танишган ҳар бир инсон бу табаррук нуронийдан, албатта, чексиз куч ва ибрат олади.

Фурсатдан фойдаланиб, Турсунбой ота Аҳмедовни давлатимизнинг юксак ишончи – I даражали “Меҳнат фахрийси” кўкрак нишони билан табриклаб, доимо унинг амударёлик тадбиркорларга ўрнак бўлиб юришига тилакдошмиз!