Amudaryolik tadbirkor I darajali "Mehnat faxriysi" koʻkrak nishoni bilan taqdirlandi

Jamiyatda inson qadrini ulugʻlash, koʻp yillik halol mehnati bilan el-yurt farovonligiga munosib hissa qoʻshgan faxriylarni eʼzozlash yurtimizda olib borilayotgan islohotlarning eng muhim yoʻnalishlaridan sanaladi. Shu maqsadda, joriy yilning 11-iyul kuni Nukus shahrida joylashgan "Oq qush" majmuasida maʼnaviy-maʼrifiy ahamiyatga ega boʻlgan "Uch avlod uchrashuvi" nomli katta tadbir tashkil qilingan edi.

Mazkur tantanali marosimda Qoraqalpogʻiston Respublikasi Joʻqorgʻi Kengesining Raisi Amanbay Orinbayev soʻzga chiqib, mamlakatimiz taraqqiyoti yoʻlida fidokorona mehnat qilayotgan bir guruh faxriylar hamda turli soha vakillarining ibratli hayot yoʻlini alohida eʼtirof etdi. Tadbirda Oʻzbekiston Respublikasi Prezidentining maslahatchisi Tursunxon Xudaybergenov, Oʻzbekiston “Nuroniylar” jamgʻarmasi boshqaruvi raisi Sodiqjon Turdiyev hamda Qoraqalpogʻiston Respublikasi “Nuroniy” jamgʻarmasi raisi Tursinbay Abdijabbarovlar ishtirok etib, Vatan ravnaqiga salmoqli hissa qoʻshgan bir qator faxriylarga “Mehnat faxriysi” koʻkrak nishonlari va qimmatbaho esdalik sovgʻalarini tantanali ravishda topshirdilar.

Ushbu yuksak mukofotga sazovor boʻlganlar qatorida amudaryolik faxriy nuroniy, Qoraqalpogʻiston Respublikasida xizmat koʻrsatgan kommunal, maishiy xizmat va savdo xodimi, tajribali tadbirkor Tursunboy Ahmedov ham bor. Uzoq yillik samarali mehnatlarining eʼtirofi sifatida u I darajali "Mehnat faxriysi" koʻkrak nishoni bilan taqdirlandi.

85 yoshni qarshi olgan Tursunboy ota Ahmedov oʻzining qalbidagi yoshlarga xos gʻayrat-shijoati, hayotga boʻlgan cheksiz ishtiyoqi va mehnatkashligi bilan barchaga oʻrnak boʻlib kelmoqda. Qahramonimiz qariyb 40-yildan buyon “Mangʻit” masʼuliyati cheklangan jamiyatiga rahbarlik qilib keladi. Eʼtiborlisi shundaki, dastlab faqatgina 4 turdagi maishiy xizmat koʻrsatish bilan oʻz faoliyatini boshlagan ushbu jamiyat, bugungi kunga kelib aholiga keng qamrovli xizmatlarni taqdim etayotgan yirik markazga aylangan. Jumladan, maskanda maishiy texnika taʼmiri, payvandlash, temirchilik, vulkanizatsiya, sartaroshlik va tikuvchilik kabi koʻplab yoʻnalishlarda aholiga yuqori sifatli xizmat koʻrsatilmoqda. Ushbu korxona nafaqat aholining uzogʻini yaqin qiluvchi xizmat nuqtasi, balki koʻplab insonlarni ish bilan taʼminlagan, kasbga mehr uygʻotuvchi va ustoz-shogird anʼanalarini oʻzida mujassam etgan chinakam maktabdir.

Tursunboy otaning yuksak rahbarlik salohiyati va bilimdonligi tufayli korxonada mehnat qilayotgan har bir mutaxassis oʻz sohasining yetuk ustasiga aylangan. Xususan, jamiyatda faoliyat yurituvchi sartarosh Shuhrat Bozorboyev Oʻzbekiston Sartaroshlar Assotsiatsiyasi tomonidan oʻtkazilgan koʻrgazmada faol ishtirok etib, faxrli 3-oʻrinni qoʻlga kiritgani soʻzimizning yaqqol isbotidir. Shuningdek, bugungi kunda Tursunboy otaning nevarasi Asadbek ham bobosining kasbini davom ettirib, sartaroshlik yoʻnalishida xalqimizga sidqidildan xizmat qilmoqda. U har bir ishni puxta va sifatli bajarishga intilib, korxonada ijrochi direktor vazifasini ham masʼuliyat bilan bajarib kelmoqda. Bundan tashqari, Tursunboy aka barpo etgan ushbu binoda koʻplab tadbirkor va ishbilarmonlar oʻz bizneslarini yuritib, el-yurt manfaati yoʻlida mehnat qilmoqdalar.

Qahramonimizning eng goʻzal fazilatlaridan biri uning saxovatpeshaligidir. U doimo ehtiyojmand va muhtoj insonlarga yaqindan koʻmak berib, qoʻlidan kelgan yordamini hech qachon ayamaydi. Ayniqsa, 2020-yilda, koronavirus infektsiyasi keng tarqalgan murakkab davrda oʻzining Umra ziyorati uchun jamgʻarib qoʻygan mablagʻini koʻmakka muhtoj insonlarning holidan xabar olish yoʻlida ehson qilgani Tursunboy otaning qalbi qanchalik keng va mehrga toʻla ekanligini yana bir bor tasdiqlaydi.

Tursunboy ota Ahmedov doimo zamon bilan hamnafas yashab, mamlakatimizda olib borilayotgan islohotlarni qizgʻin qoʻllab-quvvatlaydi va yurt roziligini oʻzining eng ulugʻ maqsadi deb biladi. Uning uzoq yillik halol mehnati va fidoyiligi evaziga yaratgan umr bogʻi bugungi kunga kelib oʻzining shirin mevalarini bermoqda. Ushbu barakali bogʻdan nafaqat uning farzandlari va nevaralari, balki butun el-yurt bahramand boʻlmoqda. Uning boy hayotiy tajribasi va mehnat yoʻli bilan tanishgan har bir inson bu tabarruk nuroniydan, albatta, cheksiz kuch va ibrat oladi.

Fursatdan foydalanib, Tursunboy ota Ahmedovni davlatimizning yuksak ishonchi – I darajali “Mehnat faxriysi” koʻkrak nishoni bilan tabriklab, doimo uning amudaryolik tadbirkorlarga oʻrnak boʻlib yurishiga tilakdoshmiz!