ТУМАНДАГИ 2-СЕКТОР ҲУДУДИ АҲОЛИСИ ПАНДЕМИЯ ДАВРИДА КЎРСАТИЛГАН МОДДИЙ ЁРДАМДАН МАМНУН

Бугунги кунда мамлакатимизнинг барча ҳудудларида йўлга қўйилган секторлар фаолияти давлат органларини аҳоли билан янада яқинлаштириш, халқ билан тизимли мулоқотни йўлга қўйишда муҳим омил бўлмоқда. Секторлар фаолиятини йўлга қўйиш айни пайтда аҳолининг муаммоларини жойида, туман, вилоят ва республика даражасида ҳал етишни таъминлашга хизмат қилмоқда.
Ҳокимлик, прокуратура, ички ишлар ва давлат солиқ хизмати органлари раҳбарлари бошчилик қилаётган секторлар ўз ҳудудларида барча ижтимоий-иқтисодий соҳадаги муаммоларни ҳал этиш билан бир қаторда, ҳуқуқбузарликлар профилактикаси, қонунийликни мустаҳкамлаш ва ҳуқуқ-тартиботни таъминлаш бўйича зарур чора-тадбирларни амалга оширмоқда.
Шу хусусдан, туманимиздаги секторлар ҳам ҳудудларни ижтимоий-иқтисодий ривожлантириш, аҳоли муаммоларини ўрганиш ҳамда жойида ҳал қилиш, мамлакатимизда барча соҳалардаги ислоҳотлар ижросини таъминлаш борасида самарали фаолият олиб бормоқда. Жумладан, туман прокурори Жавлон Муфтуллаев раҳбарлигидаги 2-сектор ҳудудида ҳам қатор салмоқли ишлар қилинмоқда.
Маълумот тариқасида айтиш керакки, 2-сектор ҳудудида 17 та овул ҳамда маҳалла фуқаролар йиғинларидаги 11484 та хонадонда 64829 нафар аҳоли истиқомат қилади. Пандемия даврида сектор ҳудудида яшовчи кам таъминланган, эҳтиёжманд, боқувчисини йўқотган оилаларни ижтимоий қўллаб-қувватлаш борасида кенг қамровли чора-тадбирлар олиб борилди. Сектор ҳудудида коронавирус пандемияси сабабли даромад манбаидан айрилган ёрдамга муҳтож эҳтиёжманд оилалар сони 324 тани ташкил қилиб, шундан 193 таси кам таъминланган ва 131 та пандемия сабабли даромадини йўқотган оилалар ҳисобланади.
Сектор ҳудудида “Ҳомийлик хайрияларини мувофиқлаштириш” маркази орқали ёрдамга муҳтож оилаларга ҳар томонлама кўмак бериш мақсадида ҳомийлар бириктирилиб, улар томонидан ўз вақтида керакли озиқ-овқат ва дори-дармон маҳсулотларини бериш ҳамда нақд пул кўринишида моддий ёрдам кўрсатилмоқда. Қолаверса, даромадсиз қолган оилаларга ижарага ер берилишида амалий ёрдам кўрсатилиб келинмоқда. Шу даврга қадар сектор ҳудудидаги 324 та ёрдамга муҳтож оилаларга жами 435 млн. 845 минг сўмлик доимий равишда кўмак берилди.
Қайд этиш жоизки, Ўзбекистон Республикаси ҳукуматининг 2020 йил 29 июль кунги фармойишига асосан “Саховат ва кўмак” фонди орқали ҳимояга муҳтож оилаларга ажратилган моддий ёрдам пулларидан туманнинг 2-сектор ҳудудидаги 193 та эхтиёжманд оилаларнинг ҳар бирига 1 миллион сўмдан жами 193 миллион сўм моддий ёрдам пуллари тарқатилиши таъминланди.
Шунингдек, пандемия сабабли ишсиз қолган меҳнатга лаёқатли фуқароларнинг бандлигини таъминлаш борасида ҳам бир қатор ишлар қилинди. Хусусан, шу даврга қадар сектор ҳудудидаги 293 нафар ишсиз фуқароларнинг 271 нафари иш билан таъминланди. Уларнинг 61 нафари жамоат ишларига, 3 нафари ҳунармандчиликка, 1 нафари оилавий тадбиркорликка, 19 нафари саноат лойиҳаларига, 51 нафари агросаноат лойиҳаларига, 16 нафари кооперация асосида, 11 нафари такрорий экин экиш ишларига, 2 нафари қурилиш объектларига жалб этилди. Қолаверса, Президентимизнинг “Тадбиркорлик фаолияти ва ўзини ўзи банд қилишни давлат томонидан тартибга солишни соддалаштириш чора-тадбирлари тўғрисида”ги Қарори ижроси юзасидан 85 нафар, норасмий бандлик бўйича 18 нафар, ўзини ўзи банд қилиш ҳамда бошқа соҳалар бўйича фуқароларнинг бандлиги таъминланди.
Таъкидлаш керакки, 2-сектор раҳбари туман прокурори Жавлон Муфтуллаев ташаббуси билан сектор ҳудудида 4 та қишлоқ хўжалиги кооперативи ташкил этилиб, уларга жами 18,1 гектар ер майдони ажратилди ва шу орқали 36 нафар ишсиз фуқароларнинг бандлиги таъминланди. Жумладан, Амир Темур овули ҳудудида “BAXTIYOR–AVEZOV” ва “SHAXRIYAR-NORBAEV”, Юқори қишлоқ маҳалласи ҳудудида “QURBANBAEV-PO’LAT” ҳамда Беш овул маҳалласи ҳудудида “O’ROZBOYEV-XURSHID” ишлаб чиқариш кооперативлари ташкил қилинди.

Мухтасар айтганда, туманимизни ижтимоий-иқтисодий ривожлантириш мақсадида ташкил қилинган барча секторлардаги  каби 2-секторда ҳам аҳолига қулай турмуш шароити яратиш, уларнинг муаммоларини ўз жойида ҳал этиш, фуқаролар билан янада яқинроқ бўлиб, уларнинг тинч-осуда, фаровон ҳаёт кечиришларига кўмак бериш борасида барча чоралар амалга оширилмоқда.  
Ҳудуд аҳолиси пандемия сабаб қийин шароитда қолган бир пайтда ўзларига кўрсатилаётган бундай эътибор ва ғамхўрликдан ниҳоятда мамнун бўлмоқда. Сектор масъуллари эса аҳолининг яшаш шароитини яхшилаш, турмушида сезиларли ижобий ўзгаришларга эришишини таъминлаш мақсадида фуқаролар билан мулоқотни кучайтириб, ўрганилган муаммоларни бартарф этиш борасида изчил чора-тадбирларни амалга оширишмоқда.

Чарос Арслонова, туман ҳокимлигининг Ахборот хизмати раҳбари.