TUMANDAGI 2-SEKTOR HUDUDI AHOLISI PANDEMIYa DAVRIDA KOʻRSATILGAN MODDIY YoRDAMDAN MAMNUN

Bugungi kunda mamlakatimizning barcha hududlarida yoʻlga qoʻyilgan sektorlar faoliyati davlat organlarini aholi bilan yanada yaqinlashtirish, xalq bilan tizimli muloqotni yoʻlga qoʻyishda muhim omil boʻlmoqda. Sektorlar faoliyatini yoʻlga qoʻyish ayni paytda aholining muammolarini joyida, tuman, viloyat va respublika darajasida hal yetishni taʼminlashga xizmat qilmoqda.
Hokimlik, prokuratura, ichki ishlar va davlat soliq xizmati organlari rahbarlari boshchilik qilayotgan sektorlar oʻz hududlarida barcha ijtimoiy-iqtisodiy sohadagi muammolarni hal etish bilan bir qatorda, huquqbuzarliklar profilaktikasi, qonuniylikni mustahkamlash va huquq-tartibotni taʼminlash boʻyicha zarur chora-tadbirlarni amalga oshirmoqda.
Shu xususdan, tumanimizdagi sektorlar ham hududlarni ijtimoiy-iqtisodiy rivojlantirish, aholi muammolarini oʻrganish hamda joyida hal qilish, mamlakatimizda barcha sohalardagi islohotlar ijrosini taʼminlash borasida samarali faoliyat olib bormoqda. Jumladan, tuman prokurori Javlon Muftullayev rahbarligidagi 2-sektor hududida ham qator salmoqli ishlar qilinmoqda.
Maʼlumot tariqasida aytish kerakki, 2-sektor hududida 17 ta ovul hamda mahalla fuqarolar yigʻinlaridagi 11484 ta xonadonda 64829 nafar aholi istiqomat qiladi. Pandemiya davrida sektor hududida yashovchi kam taʼminlangan, ehtiyojmand, boquvchisini yoʻqotgan oilalarni ijtimoiy qoʻllab-quvvatlash borasida keng qamrovli chora-tadbirlar olib borildi. Sektor hududida koronavirus pandemiyasi sababli daromad manbaidan ayrilgan yordamga muhtoj ehtiyojmand oilalar soni 324 tani tashkil qilib, shundan 193 tasi kam taʼminlangan va 131 ta pandemiya sababli daromadini yoʻqotgan oilalar hisoblanadi.
Sektor hududida “Homiylik xayriyalarini muvofiqlashtirish” markazi orqali yordamga muhtoj oilalarga har tomonlama koʻmak berish maqsadida homiylar biriktirilib, ular tomonidan oʻz vaqtida kerakli oziq-ovqat va dori-darmon mahsulotlarini berish hamda naqd pul koʻrinishida moddiy yordam koʻrsatilmoqda. Qolaversa, daromadsiz qolgan oilalarga ijaraga yer berilishida amaliy yordam koʻrsatilib kelinmoqda. Shu davrga qadar sektor hududidagi 324 ta yordamga muhtoj oilalarga jami 435 mln. 845 ming soʻmlik doimiy ravishda koʻmak berildi.
Qayd etish joizki, Oʻzbekiston Respublikasi hukumatining 2020-yil 29-iyul kungi farmoyishiga asosan “Saxovat va koʻmak” fondi orqali himoyaga muhtoj oilalarga ajratilgan moddiy yordam pullaridan tumanning 2-sektor hududidagi 193 ta extiyojmand oilalarning har biriga 1 million soʻmdan jami 193 million soʻm moddiy yordam pullari tarqatilishi taʼminlandi.
Shuningdek, pandemiya sababli ishsiz qolgan mehnatga layoqatli fuqarolarning bandligini taʼminlash borasida ham bir qator ishlar qilindi. Xususan, shu davrga qadar sektor hududidagi 293 nafar ishsiz fuqarolarning 271 nafari ish bilan taʼminlandi. Ularning 61 nafari jamoat ishlariga, 3 nafari hunarmandchilikka, 1 nafari oilaviy tadbirkorlikka, 19 nafari sanoat loyihalariga, 51 nafari agrosanoat loyihalariga, 16 nafari kooperatsiya asosida, 11 nafari takroriy ekin ekish ishlariga, 2 nafari qurilish obʼektlariga jalb etildi. Qolaversa, Prezidentimizning “Tadbirkorlik faoliyati va oʻzini oʻzi band qilishni davlat tomonidan tartibga solishni soddalashtirish chora-tadbirlari toʻgʻrisida”gi Qarori ijrosi yuzasidan 85 nafar, norasmiy bandlik boʻyicha 18 nafar, oʻzini oʻzi band qilish hamda boshqa sohalar boʻyicha fuqarolarning bandligi taʼminlandi.
Taʼkidlash kerakki, 2-sektor rahbari tuman prokurori Javlon Muftullayev tashabbusi bilan sektor hududida 4 ta qishloq xoʻjaligi kooperativi tashkil etilib, ularga jami 18,1 gektar yer maydoni ajratildi va shu orqali 36 nafar ishsiz fuqarolarning bandligi taʼminlandi. Jumladan, Amir Temur ovuli hududida “BAXTIYOR–AVEZOV” va “SHAXRIYAR-NORBAEV”, Yuqori qishloq mahallasi hududida “QURBANBAEV-PO’LAT” hamda Besh ovul mahallasi hududida “O’ROZBOYEV-XURSHID” ishlab chiqarish kooperativlari tashkil qilindi.

Muxtasar aytganda, tumanimizni ijtimoiy-iqtisodiy rivojlantirish maqsadida tashkil qilingan barcha sektorlardagi  kabi 2-sektorda ham aholiga qulay turmush sharoiti yaratish, ularning muammolarini oʻz joyida hal etish, fuqarolar bilan yanada yaqinroq boʻlib, ularning tinch-osuda, farovon hayot kechirishlariga koʻmak berish borasida barcha choralar amalga oshirilmoqda.  
Hudud aholisi pandemiya sabab qiyin sharoitda qolgan bir paytda oʻzlariga koʻrsatilayotgan bunday eʼtibor va gʻamxoʻrlikdan nihoyatda mamnun boʻlmoqda. Sektor masʼullari esa aholining yashash sharoitini yaxshilash, turmushida sezilarli ijobiy oʻzgarishlarga erishishini taʼminlash maqsadida fuqarolar bilan muloqotni kuchaytirib, oʻrganilgan muammolarni bartarf etish borasida izchil chora-tadbirlarni amalga oshirishmoqda.

Charos Arslonova, tuman hokimligining Axborot xizmati rahbari.