Xotira va qadrlash kuni arafasida "Matniyoz oxun" qabristoni hududi obodonlashtirildi
Inson xotira bilan tirik, qadr bilan ulugʻdir. Oʻtganlarni xotirlash, ularning ezgu ishlarini yodga olish, marhumlarning mangu qoʻnim topgan maskanlarini obod qilish xalqimizga xos boʻlgan eng oliyjanob, asrlar osha yashab kelayotgan goʻzal qadriyatlardan biridir. Bugungi dorlomon kunlarimiz, musaffo osmonimiz hamda yurtimizdagi tinchlik va osoyishtalik uchun jonini fido qilgan insonlarning xotirasini abadiylashtirish har birimizning muqaddas insoniy burchimiz sanaladi.
Oʻzbekiston Respublikasi Prezidentining "9-may — Xotira va qadrlash kuniga tayyorgarlik koʻrish va uni oʻtkazish chora-tadbirlari toʻgʻrisida"gi qarori ham fikrimizning yaqqol isbotidir. Mazkur qaror bilan tasdiqlangan Dasturda vafot etgan urush va mehnat faxriylari hamda mustaqillik yillarida xizmat burchini bajarish chogʻida halok boʻlgan harbiy xizmatchilar va huquqni muhofaza qiluvchi organlar xodimlarining qabrlarini obodonlashtirish vazifasi alohida koʻrsatib oʻtilgan edi. Bu vazifa ijrosi nafaqat davlat va jamoat tashkilotlari, balki butun xalqimizning yuragidan chiqqan samimiy intilish va vatanparvarlik ifodasi boʻldi.
Shundan kelib chiqqan holda, yurtimizning barcha hududlarida boʻlgani kabi, 9-may — Xotira va qadrlash kuni arafasida Amudaryo tumanining Amir Temur nomli ovulida joylashgan "Matniyoz oxun" qabristonida ham aholining yuksak uyushqoqligi asosida keng koʻlamli obodonlashtirish ishlari tashkil qilindi.
Hasharga ovul aholisi va Mangʻit shahrining turli mahallalaridan kelgan faol aholi vakillari ham oʻz hissalarini qoʻshdilar. Ular bir yoqadan bosh chiqarib, ota-bobolari, el-yurt fidoyilari mangu qoʻnim topgan muqaddas qabriston hududini tozalab, obodonlashtirdilar. Hududdagi qabrlar atrofi turli xil begona oʻtlardan, xas-choʻplardan tozalandi. Shu bilan birga, qabriston atrofidagi manzarali daraxtlarga shakl berilib, yoʻlaklar tekislanib, tartibga keltirildi.
Tuman bosh imom-xatibi Abdurahmon Matsapayev boshchiligida "Yusuf eshon bobo" jomʼe masjidi masʼullari hamda mahalla imomlari ushbu qabristonda yotgan barcha marhumlarning, yurt uchun xizmat qilgan oʻtganlarning ruhi poklariga bagʻishlab Qurʼon tilovat qildilar.
Chindan ham, xotira va qadrlash tushunchalari xalqimiz qon-qoniga chuqur singib ketgan buyuk fazilatdir. Amudaryo tumanida amalga oshirilgan ushbu umumxalq hashari, ajdodlar ruhiga koʻrsatilgan yuksak ehtirom namunasi va oʻsib kelayotgan yosh avlod uchun vatanparvarlik, oqibat va mehr-shafqatning betakror amaliy darsi boʻlib xizmat qiladi. Oʻtganlarni yod etish, ularning oxirati obod boʻlishini soʻrab duolar qilish barchamizning muqaddas vazifamizdir. Zero, xotira bor ekan, millat barhayot, qadr bor ekan, inson azizdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
