Хотира ва қадрлаш куни арафасида "Матниёз охун" қабристони ҳудуди ободонлаштирилди
Инсон хотира билан тирик, қадр билан улуғдир. Ўтганларни хотирлаш, уларнинг эзгу ишларини ёдга олиш, марҳумларнинг мангу қўним топган масканларини обод қилиш халқимизга хос бўлган энг олийжаноб, асрлар оша яшаб келаётган гўзал қадриятлардан биридир. Бугунги дорломон кунларимиз, мусаффо осмонимиз ҳамда юртимиздаги тинчлик ва осойишталик учун жонини фидо қилган инсонларнинг хотирасини абадийлаштириш ҳар биримизнинг муқаддас инсоний бурчимиз саналади.
Ўзбекистон Республикаси Президентининг "9 май — Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисида"ги қарори ҳам фикримизнинг яққол исботидир. Мазкур қарор билан тасдиқланган Дастурда вафот этган уруш ва меҳнат фахрийлари ҳамда мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилувчи органлар ходимларининг қабрларини ободонлаштириш вазифаси алоҳида кўрсатиб ўтилган эди. Бу вазифа ижроси нафақат давлат ва жамоат ташкилотлари, балки бутун халқимизнинг юрагидан чиққан самимий интилиш ва ватанпарварлик ифодаси бўлди.
Шундан келиб чиққан ҳолда, юртимизнинг барча ҳудудларида бўлгани каби, 9 май — Хотира ва қадрлаш куни арафасида Амударё туманининг Амир Темур номли овулида жойлашган "Матниёз охун" қабристонида ҳам аҳолининг юксак уюшқоқлиги асосида кенг кўламли ободонлаштириш ишлари ташкил қилинди.
Ҳашарга овул аҳолиси ва Манғит шаҳрининг турли маҳаллаларидан келган фаол аҳоли вакиллари ҳам ўз ҳиссаларини қўшдилар. Улар бир ёқадан бош чиқариб, ота-боболари, эл-юрт фидойилари мангу қўним топган муқаддас қабристон ҳудудини тозалаб, ободонлаштирдилар. Ҳудуддаги қабрлар атрофи турли хил бегона ўтлардан, хас-чўплардан тозаланди. Шу билан бирга, қабристон атрофидаги манзарали дарахтларга шакл берилиб, йўлаклар текисланиб, тартибга келтирилди.
Туман бош имом-хатиби Абдураҳмон Матсапаев бошчилигида "Юсуф эшон бобо" жомъе масжиди масъуллари ҳамда маҳалла имомлари ушбу қабристонда ётган барча марҳумларнинг, юрт учун хизмат қилган ўтганларнинг руҳи покларига бағишлаб Қуръон тиловат қилдилар.
Чиндан ҳам, хотира ва қадрлаш тушунчалари халқимиз қон-қонига чуқур сингиб кетган буюк фазилатдир. Амударё туманида амалга оширилган ушбу умумхалқ ҳашари, аждодлар руҳига кўрсатилган юксак эҳтиром намунаси ва ўсиб келаётган ёш авлод учун ватанпарварлик, оқибат ва меҳр-шафқатнинг бетакрор амалий дарси бўлиб хизмат қилади. Ўтганларни ёд этиш, уларнинг охирати обод бўлишини сўраб дуолар қилиш барчамизнинг муқаддас вазифамиздир. Зеро, хотира бор экан, миллат барҳаёт, қадр бор экан, инсон азиздир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
