ТОМОРҚА – ДЕҲҚОН МЕҲНАТИ БИЛАН ДАРОМАД МАНБАИГА АЙЛАНАДИ

Юртимизда ёзнинг айни пишиқчилик даври ҳукмронлик қилмоқда. Қай бир юртдошимизнинг  хонадонига кирманг, дастурхони турли ёз неъматлари бўлган мевалар билан тўкин. Бири-биридан тотли қовун-тарвузларни тотган дамларимизда она заминимиз саховатидан кўнглимиз тоғдай юксалади. Бу неъматлар деҳқонларимиз қишнинг аёзи-ю ёзнинг саратонини писанд қилмай, далаларда қилган заҳматли меҳнатлари маҳсулидир. Деҳқон эккан экинининг илдизи – ўзининг бағрида, деб бежиз айтишмаган халқимиз.

Ҳа, чиндан-да, бугунги бозорларимиздаги сероб сабзавотларга, меваларга деҳқоннинг қалб қўри сингган.

Оқ олтин овулида деҳқончиликнинг кўзини биладиган томорқа эгалари кўп. Улар ўз маҳсулотлари билан туманимиз бозорларигина эмас, республикамиз бозорлари тўкинлигига муносиб ҳисса қўшишаяпти.

Овулдаги барча хонадонларнинг ўз томорқа ери, қорамоллари, етти хазинанинг бири бўлган паррандалари бор. Улар ўз оилаларида даромад манбаларини кўпайтириб, ўзларининг турмуши фаровон бўлишига эришаяптилар.

“Жийдали қулон” аҳоли пунктида истиқомат қилувчи Азимбой Шомуродов ҳам томорқани оила иқтисодини юксалтирувчи омил деб ҳисоблайди. У ҳар йили 40 сотихлик томорқасида оиласи эҳтиёжини қоплагудай маҳсулот етиштириб, ортганини бозорда сотиб, тўкин-сочинликка ўз ҳиссасини қўшмоқда. У янги иморат қуриб кўчиб келган вақтларида ҳовлиси атрофи шўр ер бўлганлигидан қатор йиллар фақат шоли экди. Ушбу экин ер ҳосилдорлигини ошириб, шўрини ювибгина қолмай яхшигина даромад ҳам берди.

У бир неча йилдирки, ўзи эрта баҳорда помидор, бодринг, қовун, тарвуз, булғор қалампири каби экинлар кўчатларини экиб, эртаги экинлардан ҳам мўл ҳосил оладиган бўлди. Турмуш ўртоғи Сайёра Қаландарова, ўғли, қизи ҳам “Суҳроб-Ҳожиакбар” фермер хўжалигидаги ижара ери ишларидан бўшаган вақтларида асосан томорқадаги экинлар парвариши билан банд бўлишади.

Заминнинг шифокори – деҳқон деганларидай, неча йиллик меҳнат эвазига ҳовлиси атрофини унумдор ерга айлантирган Азимбой Шомуродов томорқасини бугун кўрганларнинг бари ҳавас қилади. Томорқада етишган тарвуз, қовунлар бозорда харидоргир. Эрта баҳордан кўчириб ўтқазилган помидор, бақлажон, булғор қалампири, кўчатлари ҳосил бераётганига икки ойдан ошди. Ўтган йили кузда экилган саримсоқпиёз ўрнига июнь ойи охирларида экилган 2 сотихча бодрингдан ҳам яхши даромад олишаяпти. Натижада оила турмуши фаровон, меҳнатлари туфайли яхши ҳаёт кечиришади. Ўтган йили яхши ниятлар билан ердан ундирган маблағларига тўй қилди, Ўзбекистонда ишлаб чиқарилган автомашина сотиб олди.

Томорқа – даромад манбаи. Бу иборани кўп эшитамиз, айтамиз. Бироқ ер бежизга инсонни сийламаслигини, ҳосил инсоннинг пешона тери, ҳалол меҳнати эвазига бунёдга келиши ҳақида чуқурроқ ўйлаб кўрмаймиз.

Тақир ердан ризқ ундириш учун йил мобайнида меҳнат қилинади, омилкорлик билан ер табиатига қараб экин тури жойлаштирилади. Азимбой Шомуродов каби меҳнатсевар, заҳматкаш инсонлар борки, халқимиз дастурхони тўкин, тотли мевалар сероб.

Ойгул Ражабова.