TOMORQA – DEHQON MEHNATI BILAN DAROMAD MANBAIGA AYLANADI

Yurtimizda yozning ayni pishiqchilik davri hukmronlik qilmoqda. Qay bir yurtdoshimizning  xonadoniga kirmang, dasturxoni turli yoz neʼmatlari boʻlgan mevalar bilan toʻkin. Biri-biridan totli qovun-tarvuzlarni totgan damlarimizda ona zaminimiz saxovatidan koʻnglimiz togʻday yuksaladi. Bu neʼmatlar dehqonlarimiz qishning ayozi-yu yozning saratonini pisand qilmay, dalalarda qilgan zahmatli mehnatlari mahsulidir. Dehqon ekkan ekinining ildizi – oʻzining bagʻrida, deb bejiz aytishmagan xalqimiz.

Ha, chindan-da, bugungi bozorlarimizdagi serob sabzavotlarga, mevalarga dehqonning qalb qoʻri singgan.

Oq oltin ovulida dehqonchilikning koʻzini biladigan tomorqa egalari koʻp. Ular oʻz mahsulotlari bilan tumanimiz bozorlarigina emas, respublikamiz bozorlari toʻkinligiga munosib hissa qoʻshishayapti.

Ovuldagi barcha xonadonlarning oʻz tomorqa yeri, qoramollari, yetti xazinaning biri boʻlgan parrandalari bor. Ular oʻz oilalarida daromad manbalarini koʻpaytirib, oʻzlarining turmushi farovon boʻlishiga erishayaptilar.

“Jiydali qulon” aholi punktida istiqomat qiluvchi Azimboy Shomurodov ham tomorqani oila iqtisodini yuksaltiruvchi omil deb hisoblaydi. U har yili 40 sotixlik tomorqasida oilasi ehtiyojini qoplaguday mahsulot yetishtirib, ortganini bozorda sotib, toʻkin-sochinlikka oʻz hissasini qoʻshmoqda. U yangi imorat qurib koʻchib kelgan vaqtlarida hovlisi atrofi shoʻr yer boʻlganligidan qator yillar faqat sholi ekdi. Ushbu ekin yer hosildorligini oshirib, shoʻrini yuvibgina qolmay yaxshigina daromad ham berdi.

U bir necha yildirki, oʻzi erta bahorda pomidor, bodring, qovun, tarvuz, bulgʻor qalampiri kabi ekinlar koʻchatlarini ekib, ertagi ekinlardan ham moʻl hosil oladigan boʻldi. Turmush oʻrtogʻi Sayyora Qalandarova, oʻgʻli, qizi ham “Suhrob-Hojiakbar” fermer xoʻjaligidagi ijara yeri ishlaridan boʻshagan vaqtlarida asosan tomorqadagi ekinlar parvarishi bilan band boʻlishadi.

Zaminning shifokori – dehqon deganlariday, necha yillik mehnat evaziga hovlisi atrofini unumdor yerga aylantirgan Azimboy Shomurodov tomorqasini bugun koʻrganlarning bari havas qiladi. Tomorqada yetishgan tarvuz, qovunlar bozorda xaridorgir. Erta bahordan koʻchirib oʻtqazilgan pomidor, baqlajon, bulgʻor qalampiri, koʻchatlari hosil berayotganiga ikki oydan oshdi. Oʻtgan yili kuzda ekilgan sarimsoqpiyoz oʻrniga iyun oyi oxirlarida ekilgan 2 sotixcha bodringdan ham yaxshi daromad olishayapti. Natijada oila turmushi farovon, mehnatlari tufayli yaxshi hayot kechirishadi. Oʻtgan yili yaxshi niyatlar bilan yerdan undirgan mablagʻlariga toʻy qildi, Oʻzbekistonda ishlab chiqarilgan avtomashina sotib oldi.

Tomorqa – daromad manbai. Bu iborani koʻp eshitamiz, aytamiz. Biroq yer bejizga insonni siylamasligini, hosil insonning peshona teri, halol mehnati evaziga bunyodga kelishi haqida chuqurroq oʻylab koʻrmaymiz.

Taqir yerdan rizq undirish uchun yil mobaynida mehnat qilinadi, omilkorlik bilan yer tabiatiga qarab ekin turi joylashtiriladi. Azimboy Shomurodov kabi mehnatsevar, zahmatkash insonlar borki, xalqimiz dasturxoni toʻkin, totli mevalar serob.

Oygul Rajabova.