Amudaryoda qutqaruv qismining yangi binosi foydalanishga topshirildi

Yurtimiz mustaqilligining 35 yilligi — xalqimiz hayotida beqiyos ahamiyatga ega boʻlgan, ozodlik va bunyodkorlik, tinchlik va taraqqiyot timsoliga aylangan ulugʻ bayram. Ushbu qutlugʻ sana arafasida Amudaryo tumanida yana bir ezgu tashabbus hayotga tatbiq etilib, xalq xizmatiga yoʻnaltirilgan zamonaviy inshoot foydalanishga topshirildi.

Qipchoq ovuli hududida zamonaviy talablarga javob beradigan yangi qutqaruv qismi binosining foydalanishga topshirilishi nafaqat soha vakillari, balki butun tuman aholisi uchun quvonchli voqea boʻldi.

Qutqaruv qismi yangi binosining tantanali ochilish marosimida Oʻzbekiston Respublikasi Favqulodda vaziyatlar vazirligi hamda uning Qoraqalpogʻiston Respublikasi boshqarmasi rahbariyati, Amudaryo tumani hokimi Sobir Xoʻjametov, mutasaddi tashkilotlar rahbarlari, soha faxriylari, nuroniylar hamda qutqaruv xizmatining shaxsiy tarkibi ishtirok etdi.

Tadbir Oʻzbekiston Respublikasi va Qoraqalpogʻiston Respublikasi davlat madhiyalari sadosi ostida boshlandi. Tadbirda soʻzga chiqqanlar mamlakatimizda favqulodda vaziyatlarning oldini olish, ularning oqibatlarini bartaraf etish, aholi xavfsizligini taʼminlash borasida amalga oshirilayotgan keng koʻlamli islohotlarga alohida toʻxtaldilar.

Taʼkidlanganidek, bugungi kunda favqulodda vaziyatlar tizimida zamonaviy yondashuvlar joriy etilib, qutqaruv xizmatining moddiy-texnik bazasi izchil mustahkamlanmoqda. Eng muhimi, soha xodimlari uchun zamonaviy va munosib mehnat sharoitlarini yaratish, ularning tezkor va samarali faoliyat olib borishi uchun zarur imkoniyatlarni kengaytirishga katta eʼtibor qaratilmoqda.

Amudaryoda qad rostlagan qutqaruv qismining yangi binosi ham ana shu ezgu saʼy-harakatlarning amaliy ifodasidir.

Tantanali marosimda soʻz olgan soha faxriylari oʻz xotiralari bilan oʻrtoqlashdilar. Ular avvalgi qutqaruv qismi binosida xizmat olib borilgan yillarda mavjud boʻlgan sharoit va imkoniyatlarni eslab, bugungi kunda qutqaruvchilar uchun yaratilayotgan qulayliklarni katta mamnuniyat bilan eʼtirof etdilar.

4 milliard 172 million soʻm mablagʻ evaziga bunyod etilgan yangi binoda tezkor qutqaruv ishlarini tashkil etish uchun barcha zarur zamonaviy imkoniyatlar yaratilgan. Bino zamonaviy talablarga mos ravishda jihozlanib, qutqaruvchilarning xizmat vazifalarini samarali bajarishi, favqulodda vaziyatlar hududiga tezkorlik bilan yetib borishi va aholiga sifatli yordam koʻrsatishi uchun zarur sharoitlar yaratildi.

Tantanali marosimda qutqaruv xizmatiga Vazir sovgʻasi sifatida yangi qutqaruv mashinasining kaliti tantanali ravishda topshirildi. Yangi, zamonaviy texnikaning safga qoʻshilishi qutqaruvchilarning tezkorligini oshirib, turli favqulodda vaziyatlarda zarur yordamni oʻz vaqtida koʻrsatish imkoniyatlarini yanada kengaytiradi.

Har qanday bunyodkorlik ishining ortida katta mehnat, masʼuliyat va fidoyilik turadi. Qutqaruv qismi yangi binosining bunyod etilishida munosib hissa qoʻshgan pudratchi tashkilot — “Gidro-montaj-stroy” MChJ jamoasining mehnati ham tadbir davomida alohida eʼtirof etildi. Tashkilot rahbariga amalga oshirilgan ishlar uchun minnatdorchilik bildirilib, esdalik sovgʻalari hamda tashakkurnoma topshirildi.

Oʻz navbatida quruvchi tashkilot rahbari qutqaruv qismi yangi binosining ramziy kalitini tuman Favqulodda vaziyatlar boʻlimi boshligʻiga tantanali ravishda topshirdi. Shundan soʻng faxriylar, nuroniylar, soha vakillari va tadbir qatnashchilari ishtirokida ramziy tasma qirqildi. Shu tariqa, Mustaqilligimizning 35 yilligi arafasida Amudaryo tumanida yana bir muhim ijtimoiy obʼekt oʻz faoliyatini boshladi.

Qutqaruv qismining yangi binosi Amudaryo tumani ahli uchun xavfsizlik va xotirjamlik qalqoni, qutqaruvchilar uchun esa fidokorona xizmat yoʻlidagi yangi imkoniyatlar maskani boʻlib koʻp yillar davomida xizmat qilishiga tilakdoshmiz!

Charos Arslonova, tuman hokimligining Axborot xizmati rahbari.