ЭҲТИЁЖМАНД ОИЛАЛАPГА ҚОPАМОЛ ТАPҚАТИЛМОҚДА

Дунёнинг 200 дан зиёд мамлакатини қамраб олган коронавирус пандемияси мазкур ҳудудларда кўпгина фаолият турларининг тўхтатиб қўйилишига, оқибатда эса ишсизлар сонининг ўсишига, ёрдамга муҳтож оилалар сонининг ортишига сабаб бўлмоқда. Натижада бугунги кунда кўпгина давлатларда камбағалликнинг ошиши, озиқ-овқат маҳсулотлари танқислиги вужудга келаяпти.

Коронавирус пандемиясига қарши кураш ва унинг тарқалиб кетишининг  олдини олиш борасида ўрнатилган карантин тартиб-қоидаларига кўра мамлакатимизда ҳам ишлаб чиқариш, хизмат кўрсатиш соҳаларининг кўпгина турларига чекловлар ўрнатилди. Натижада кўпгина одамлар топаётган даромадидан айрилди, мавсумий ишларда ишловчилар, хорижий давлатларда ишлаётган меҳнат мигрантлари карантин туфайли уйларида қолишга мажбур бўлдилар. Бироқ улар эътибордан четда қолгани, муҳтож қилиб қўйилгани йўқ. Хусусан, аҳолига манзилли ёрдам кўрсатиш мақсадида Маҳалла ва оилани қўллаб-қуввтлаш вазирлиги ҳузурида Хайрияларни мувофиқлаштириш маркази ташкил этилди ва эҳтиёжманд оилалар мурожаатлари асосида уларга зарур моддий ёрдам бериб келинди.

Шунингдек, муҳтарам Юртбошимизнинг шу йил 20 апрель куни “Саховат ва кўмак” умумхалқ ҳаракатини йўлга қўйиш, вақтинча ишсиз ва ёрдамга муҳтож оилаларни аниқлаб, уларни манзилли асосда озиқ-овқат ва зарур ҳолларда дори-дармон воситалари билан таъминлаш юзасидан илгари сурган ташаббусига мувофиқ, 22 апрелда Вазирлар Маҳкамасининг фармойишига кўра, “Саховат ва кўмак” жамғармаси, унинг Қорақалпоғистон Pеспубликаси, вилоятлар, Тошкент шаҳар, ҳамда туман, шаҳар бўлинмалари ташкил этилган, жамғарма тўғрисида Низом тасдиқланган эди. Бу саъй-ҳаракатлар натижасида карантин чекловлари даврида ижтимоий ҳимояга муҳтож бўлиб қолган кўп фарзандли оилаларга, ногиронлиги бўлган шахсларга, ўз даромадини йўқотган вақтинча ишсиз фуқароларга моддий кўмак берилаяпти. Жамғарма маблағлари эса тадбиркорларнинг, саховатпеша инсонларнинг хайриялари ҳисобига шаклланмоқда.

Жамиятимизни ҳаракатлантирувчи куч – инсон омилига эътибор тобора кучайтирилаётган даврда коронавирус пандемияси туфайли уч ойдан  зиёд вақтдан бери ишсиз қолиб, даромад тополмай, иқтисодий қийин вазиятга тушиб қолган, ногиронлиги бўлган оилалар, якка-ёлғиз яшовчи кексалар ижтимоий ҳимояси тобора кучайтирилмоқда. Бунда “Саховат ва кўмак” жамғармаси маблағлари мақсадли йўналтирилиши муҳим аҳамият касб этмоқда.

Туманимиздаги 49 та овул, маҳалла фуқаролар йиғинларидан кам  таъминланган, ижтимоий ҳимояга муҳтож, шароити оғир 100 та оила рўйхати шакллантирилиб, ҳар бирига жамғарма маблағлари ҳисобидан 3,5 млн. сўмлик қорамол сотиб олиниб, тарқатилмоқда.

Шу йилнинг 26 июнигача ушбу рўйхати шакллантирилган 100 та оиланинг 36 тасига қорамол тарқатилди. Қорамолларни туман ҳокимининг ўринбосари, Маҳалла ва оилани қўллаб-қувватлаш бўлими бошлиғи Алишер Йўлдошев, бўлим масъул ходими Баҳодир Болтабоевлар топширдилар.

Шунингдек, эҳтиёжманд, имконияти чекланган  фуқаролар хонадонлари ҳар ойда кундалик рўзғор учун зарур маҳсулотлар билан ҳам таъминланмоқда. Бу саъй-ҳаракатларда юртдошларимизнинг мустаҳкам ҳамжиҳатлиги, бир-бирининг ташвишига елкадошлиги, борини бирга баҳам кўришдек азалий қадриятлари яна ҳам яққол намоён бўлаётир.

Пандемия жиловланса, бу синовли кунлар ҳам, албатта, ўтиб кетади. Бироқ ана шундай оғир дамларда халқимизнинг бир-бирига кўрсатган меҳр-оқибати, одамгарчилиги ва ғамхўрлиги унутилмайди, мамлакатимиз тарихида ўчмас саҳифа бўлиб қолади.

Ойгул PАЖАБОВА.