Эҳтиёжманд оилаларнинг болаларига даволаниш учун ваучерлар тарқатилмоқда

Халқимиз азал-азалдан ўзининг меҳр-оқибат, инсонпарварлик, шукроналик, беназир саховат ва кенг бағрикенглик каби эзгу фазилатлари билан дунёга ўрнак бўлиб келган. Айниқса, улуғ айёмлар арафасида эҳтиёжманд инсонларга кўмак бериш, уларнинг ҳолидан хабар олиш ва мушкулини осон қилиш миллий қадриятларимизнинг ажралмас қисмига айланган. “Муборак Қурбон ҳайити муносабати билан аҳолини давлат томонидан қўллаб-қувватлаш ва меҳр-саховат тадбирларини самарали ташкил этиш тўғрисида”ги Ўзбекистон Республикаси Президенти қарори ҳам айнан мана шундай олижаноб мақсадларни ўзида мужассам этган муҳим ҳужжат бўлди. Мазкур қарор асосида бугунги кунда юртимизнинг барча ҳудудларида аҳолини, хусусан, кўмакка муҳтож қатламни қўшимча равишда давлат томонидан қўллаб-қувватлаш мақсадида қатор хайрли тадбирлар амалга оширилмоқда.

Давлатимиз томонидан олиб борилаётган кучли ижтимоий сиёсатнинг энг устувор йўналишларидан бири, шубҳасиз, инсон саломатлигини асраш, келажагимиз эгалари бўлган болаларнинг соғлом ва баркамол бўлиб вояга етишини таъминлашдир. Президент қарорига мувофиқ, республикамиз бўйлаб амалга оширилаётган меҳр-саховат тадбирлари доирасида тиббий-ижтимоий ҳимояга муҳтож қатламга алоҳида эътибор қаратилмоқда. Жумладан, оғир касалликка чалинган, аммо вақтида зарур чоралар кўрилса, ногиронликнинг олдини олиш мумкин бўлган касалликларни оператив йўл билан даволаш масаласи кун тартибидаги энг долзарб вазифалардан бири сифатида белгиланди. Бу орқали кўплаб болажонларнинг соғлиғини тиклаш ва келгусида уларнинг тўлақонли ҳаёт кечиришлари учун мустаҳкам замин яратиш мақсад қилинган.

Ушбу эзгу ташаббуснинг жойлардаги ижроси қатъий назоратга олинган бўлиб, ҳудудлардаги тиббиёт муассасалари орқали манзилли ишлар олиб борилмоқда. Хусусан, Амударё туманида ҳам ушбу қарор ижроси доирасида кенг кўламли амалий ишлар бошлаб юборилган. Маълумотларга кўра, оператив йўл билан даволаниш орқали ногиронликнинг олдини олиш мақсадида Амударё туманига жами 58 та махсус ваучер ажратилган. Бу ваучерлар нафақат беғараз молиявий кўмак, балки ота-оналар учун фарзандларининг соғлом келажагига бўлган умид тимсолидир. Бугунги кунга қадар туманда мазкур йўналишда олиб борилган ўрганишлар ва тиббий хулосалар асосида жами 27 нафар болага ушбу ваучерлар топширилди ва уларнинг тезкор даволаниши учун барча зарур шароитлар яратилди.

Айтиш жоизки, юқоридаги қарорга мувофиқ мамлакатимиз бўйлаб оғир ва ногиронликни келтириб чиқарувчи касалликларга чалинган 10 минг нафар болаларда жарроҳлик амалиётини ўтказиш, 2,3 минг нафар онкологик, гемотологик ва онкогематологик ташхис қўйилган беморларни тиббий текширувдан ўтказиш, уларни даволаш ва жарроҳлик амалиётини ўтказиш, камида 350 нафар беморларда жигар ва буйрак трансплантацияси амалиётини ўтказиш, ижтимоий ҳимояга муҳтож болаларнинг омонат ҳисобварақларига 200 АҚШ доллари миқдоридаги пул мукофотини ўтказиш харажатларини қоплаш, қолаверса, 500 та масжидда аҳоли учун қулай шароитлар яратиш мақсадида замонавий таҳоратхоналар қуриш, реконструкция қилиш ёки таъмирлаш кўзда тутилган.

Қарор ижросини таъминлаш мақсадида мутасадди ташкилотлар ва малакали тиббиёт ходимлари томонидан навбатдаги чуқурлаштирилган тиббий кўрик жараёнлари изчиллик билан давом эттирилмоқда. Ушбу кўриклар натижасига кўра, шифокорлар томонидан тавсия берилган ва жарроҳлик амалиётига муҳтож деб топилган болалар ваучерлар билан таъминланади.

Муборак айём кунларида ва ундан кейинги даврда ҳам давом этаётган бу каби меҳр-саховат тадбирлари давлатнинг ўз фуқароларига, айниқса, ёш авлод тақдирига бўлган юксак эътиборини намоён этади. Инсон қадри улуғланган юртда соғлом авлодни вояга етказиш йўлидаги бундай саъй-ҳаракатлар, шубҳасиз, миллат генофондини асраш ва порлоқ келажакни барпо этишда ўзининг юксак ҳамда беқиёс самарасини бериши шубҳасиз.