Ehtiyojmand oilalarning bolalariga davolanish uchun vaucherlar tarqatilmoqda

Xalqimiz azal-azaldan oʻzining mehr-oqibat, insonparvarlik, shukronalik, benazir saxovat va keng bagʻrikenglik kabi ezgu fazilatlari bilan dunyoga oʻrnak boʻlib kelgan. Ayniqsa, ulugʻ ayyomlar arafasida ehtiyojmand insonlarga koʻmak berish, ularning holidan xabar olish va mushkulini oson qilish milliy qadriyatlarimizning ajralmas qismiga aylangan. “Muborak Qurbon hayiti munosabati bilan aholini davlat tomonidan qoʻllab-quvvatlash va mehr-saxovat tadbirlarini samarali tashkil etish toʻgʻrisida”gi Oʻzbekiston Respublikasi Prezidenti qarori ham aynan mana shunday olijanob maqsadlarni oʻzida mujassam etgan muhim hujjat boʻldi. Mazkur qaror asosida bugungi kunda yurtimizning barcha hududlarida aholini, xususan, koʻmakka muhtoj qatlamni qoʻshimcha ravishda davlat tomonidan qoʻllab-quvvatlash maqsadida qator xayrli tadbirlar amalga oshirilmoqda.

Davlatimiz tomonidan olib borilayotgan kuchli ijtimoiy siyosatning eng ustuvor yoʻnalishlaridan biri, shubhasiz, inson salomatligini asrash, kelajagimiz egalari boʻlgan bolalarning sogʻlom va barkamol boʻlib voyaga yetishini taʼminlashdir. Prezident qaroriga muvofiq, respublikamiz boʻylab amalga oshirilayotgan mehr-saxovat tadbirlari doirasida tibbiy-ijtimoiy himoyaga muhtoj qatlamga alohida eʼtibor qaratilmoqda. Jumladan, ogʻir kasallikka chalingan, ammo vaqtida zarur choralar koʻrilsa, nogironlikning oldini olish mumkin boʻlgan kasalliklarni operativ yoʻl bilan davolash masalasi kun tartibidagi eng dolzarb vazifalardan biri sifatida belgilandi. Bu orqali koʻplab bolajonlarning sogʻligʻini tiklash va kelgusida ularning toʻlaqonli hayot kechirishlari uchun mustahkam zamin yaratish maqsad qilingan.

Ushbu ezgu tashabbusning joylardagi ijrosi qatʼiy nazoratga olingan boʻlib, hududlardagi tibbiyot muassasalari orqali manzilli ishlar olib borilmoqda. Xususan, Amudaryo tumanida ham ushbu qaror ijrosi doirasida keng koʻlamli amaliy ishlar boshlab yuborilgan. Maʼlumotlarga koʻra, operativ yoʻl bilan davolanish orqali nogironlikning oldini olish maqsadida Amudaryo tumaniga jami 58 ta maxsus vaucher ajratilgan. Bu vaucherlar nafaqat begʻaraz moliyaviy koʻmak, balki ota-onalar uchun farzandlarining sogʻlom kelajagiga boʻlgan umid timsolidir. Bugungi kunga qadar tumanda mazkur yoʻnalishda olib borilgan oʻrganishlar va tibbiy xulosalar asosida jami 27 nafar bolaga ushbu vaucherlar topshirildi va ularning tezkor davolanishi uchun barcha zarur sharoitlar yaratildi.

Aytish joizki, yuqoridagi qarorga muvofiq mamlakatimiz boʻylab ogʻir va nogironlikni keltirib chiqaruvchi kasalliklarga chalingan 10 ming nafar bolalarda jarrohlik amaliyotini oʻtkazish, 2,3 ming nafar onkologik, gemotologik va onkogematologik tashxis qoʻyilgan bemorlarni tibbiy tekshiruvdan oʻtkazish, ularni davolash va jarrohlik amaliyotini oʻtkazish, kamida 350 nafar bemorlarda jigar va buyrak transplantatsiyasi amaliyotini oʻtkazish, ijtimoiy himoyaga muhtoj bolalarning omonat hisobvaraqlariga 200 AQSh dollari miqdoridagi pul mukofotini oʻtkazish xarajatlarini qoplash, qolaversa, 500 ta masjidda aholi uchun qulay sharoitlar yaratish maqsadida zamonaviy tahoratxonalar qurish, rekonstruktsiya qilish yoki taʼmirlash koʻzda tutilgan.

Qaror ijrosini taʼminlash maqsadida mutasaddi tashkilotlar va malakali tibbiyot xodimlari tomonidan navbatdagi chuqurlashtirilgan tibbiy koʻrik jarayonlari izchillik bilan davom ettirilmoqda. Ushbu koʻriklar natijasiga koʻra, shifokorlar tomonidan tavsiya berilgan va jarrohlik amaliyotiga muhtoj deb topilgan bolalar vaucherlar bilan taʼminlanadi.

Muborak ayyom kunlarida va undan keyingi davrda ham davom etayotgan bu kabi mehr-saxovat tadbirlari davlatning oʻz fuqarolariga, ayniqsa, yosh avlod taqdiriga boʻlgan yuksak eʼtiborini namoyon etadi. Inson qadri ulugʻlangan yurtda sogʻlom avlodni voyaga yetkazish yoʻlidagi bunday saʼy-harakatlar, shubhasiz, millat genofondini asrash va porloq kelajakni barpo etishda oʻzining yuksak hamda beqiyos samarasini berishi shubhasiz.