СУРОНЛИ ЙИЛЛАР ГУВОҲИ БЎЛГАН МОМО
Оқ олтин овулининг пир-у бадавлат онахонларидан бири бўлган Сафаргул момо бундан 95 йил аввал Тўлқин овулида таваллуд топган эди. Сафаргуллар оилада фақат 2 қиз бўлганлиги сабабли ота-онаси уларнинг парваришига алоҳида эътибор беришди. Ёшлигидан тарбияли, одобли, меҳнаткаш қилиб тарбиялашди.
Уруш даврида 13-14-ёшли ўсмир бўлса-да, далада тер тўкди. Ёш бўлишига қарамасдан Босув каналини қазишда ҳам иштирок этди. У 1948 йилда оқ олтинлик Жиямурод Холимбетовга турмушга чиқди. Жиямурод ўша йили Тошкент қишлоқ хўжалик техникумини тугатиб келган, колхозда агроном бўлиб ишлаётган эди. Сафаргул ҳам дала ишларида эрига қўл-кўмак бўлди. Улар биргаликда 5 ўғил ва 5 қизни тарбиялаб камолга етказишди.
Фарзандларининг барчаси эл-юрт ишига камарбаста бўлиб улғайишди. Катта ўғли Юсуфбой нафақага чиққунча Жумуртов тош майдалаш заводида ишлади. Қурбонбой эса темир йўл ишчиси бўлиб хизмат қилди. Собирбой устачилик қилиб, овулдагиларга ёғоч буюмлар ясашда, уйларини таъмирлашда ёрдамлашди. Ўринбой айни пайтда Қоратов экспедицияси ишчиси. Момонинг қизлари ҳам борган жойларида палак ёзиб, ўзларидан кўпайишди.
– Энам турмуш ташвишларига жуда ҳам сабр-у бардошли бўлиб яшаган, – дейди момонинг келини, 50-мактаб ўқитувчиси Гулойим Асқарова. – Ҳозир ҳам баъзиларга ўхшаб ҳаётидан, атрофидаги одамлардан норози бўлмайди. Тетик ва бардам, ўзлари бемалол далага чиқиб, сайр қилади. Невараларини ёнига олиб, панд-насиҳатлар қилади. Шунча йил бирга яшаб, бировга қаттиқ гапирганини, ҳатто неваралари шўхлик қилса-да, уришиб берганини эшитмаганман. Ҳаммага бирдек, худди сокин дарёга ўхшатаман. Ўтмиши ҳақида ҳеч қачон нолиниб гапирмайди, афсусланмайди. Бугунги кунига ишонч билан яшайди. Қисқаси, инсон ҳамиша сабрли бўлиши лозимлигини мен энамдан ўрганганман.
Гўзал фазилатли, матонатли ва бардошли бу инсон атрофдагиларга ибрат бўлиб, меҳр улашиб яшаяпти. Эҳтимол, узоқ умр кўриш сири ҳам шундадир. Фронт орқасидаги залворли меҳнатнинг заҳматини тортган момо айни пайтда фарзандлари ва неваралари, эл-юрт ардоғида. Биз 95 ёшли Сафаргул момони баҳор байрами билан табриклаб, ҳамиша соғ-омон бўлишини тилаб қоламиз.
Зиёда Сададдинова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
