Коррупцияга қарши курашиш: ногиронлиги бўлган шахсларнинг ҳуқуқий хабардорлиги оширилмоқда

Коррупцияга қарши курашишда давлат органлари билан бир қаторда жамоат ташкилотларининг ҳам фаоллиги ортиб бормоқда. Ўзбекистон Ҳакамлик Судлари Ассоциациясининг Қорақалпоғистон Республикаси филиали томонидан “Коррупцияга қарши курашиш йўлида” номли лойиҳа амалга оширилаётган бўлиб, мазкур лойиҳа Олий Мажлис ҳузуридаги Фуқаролик жамияти институтларини қўллаб-қувватлаш жамоат фондининг Қорақалпоғистон Республикаси ҳудудий бўлими томонидан молиялаштирилган. Лойиҳанинг асосий мақсади — ногиронлиги бўлган шахсларнинг ҳуқуқий билим даражасини ошириш ва уларни коррупция ҳолатларидан ҳимоя қилишдан иборат.

29 октябрь куни лойиҳа доирасида Амударё туманидаги 6-сонли Болалар мусиқа ва санъат мактаби залида тадбир ўтказилди. Ушбу тадбирда ногиронлиги бўлган шахсларга “Коррупция нима ва унинг оқибатлари қандай” деган савол доирасида кенг кўламли ҳуқуқий маълумотлар тақдим этилди. Шунингдек, коррупцион ҳолатларга дуч келганда тўғри ҳаракат қилиш, рақамли технологияларни коррупцияга қарши курашишда қўллаш ва коррупциянинг олдини олиш бўйича аниқ амалий тавсиялар берилди.

Тадбирда Амударё тумани ҳокимлиги, “Инсон” ижтимоий хизматлар маркази туман бўлими, оммавий ахборот воситалари вакиллари ҳамда 35 нафар ногиронлиги бўлган шахслар иштирок этди. Бу тадбир ҳудудда яшовчи ногиронлиги бўлган фуқароларнинг ҳуқуқий билимларини янада мустаҳкамлаш йўлидаги муҳим қадам бўлди.

Айтиш жоизки, Қорақалпоғистон Республикасида бугунги кунда 68 минг нафарга яқин ногиронлиги бўлган шахслар истиқомат қилади. Шундан 12 мингдан ортиғи Нукус шаҳрида яшайди. Ушбу тоифадаги фуқароларнинг катта қисми турли ижтимоий, тиббий ва ҳуқуқий ёрдамларга муҳтож.

Муаммонинг моҳияти шундаки, ногиронлиги бўлган шахсларнинг ўз ҳуқуқ ва имтиёзлари, давлат томонидан тақдим этиладиган ёрдамлар ҳақида етарли маълумотга эга эмаслиги уларни ҳуқуқбузарлик, айниқса, коррупция ҳолатларига нисбатан заиф қилиб қўймоқда.

Айниқса, тиббиёт, пенсия таъминоти, уй-жой ажратиш ва ишга жойлаштириш каби соҳалардаги айрим масъул шахслар ногиронлиги бўлган шахсларнинг ҳуқуқий билимсизлигидан фойдаланиб, улардан ноқонуний пул талаб қилиш ёки ҳужжатларни сунъий равишда кечиктириш каби коррупцион ҳолатлар кузатилмоқда.

Лойиҳанинг бош мақсади Қорақалпоғистон Республикасида яшовчи ногиронлиги бўлган шахсларнинг ҳуқуқий хабардорлигини ошириш, уларнинг давлат томонидан белгиланган имтиёз ва хизматлардан тўлиқ фойдаланишини таъминлаш ҳамда ҳуқуқбузарлик ва коррупция ҳолатларини кескин камайтиришга қаратилган.

Лойиҳа доирасида мақсадга эришиш учун комплекс ёндашув асосида бир қатор амалий механизмлар жорий этилади. Жумладан, кўриш, эшитиш ва жисмоний имконияти чекланган 300 нафар ногиронлиги бўлган шахслар орасида мақсадли гуруҳлар тузилиб, ногиронлиги бўлган шахслар учун мослаштирилган ҳуқуқий материаллар ишлаб чиқилади ва тарқатилади. Мақсадли гуруҳлар учун коррупцияга қарши тарғибот тадбирлари ташкил этилади.

Бу каби тадбирларнинг аҳамияти шундаки, ногиронлиги бўлган шахслар ўзларига тегишли бўлган имтиёзлар ва ҳуқуқлар ҳақида аниқ, тизимли билимларга эга бўлади. Қолаверса, коррупция ҳақида умумий билимлари ошиб, уларда ушбу иллатнинг олдини олиш ва бундай ҳолатлар ҳақида хабар бериш кўникмалари шаклланади.

Ушбу грант лойиҳаси Ўзбекистонда коррупцияга қарши курашиш борасидаги давлат сиёсатини амалга оширишда фуқаролик жамияти институтларининг фаол иштирокига яққол дилилдир.