Korruptsiyaga qarshi kurashish: nogironligi boʻlgan shaxslarning huquqiy xabardorligi oshirilmoqda

Korruptsiyaga qarshi kurashishda davlat organlari bilan bir qatorda jamoat tashkilotlarining ham faolligi ortib bormoqda. Oʻzbekiston Hakamlik Sudlari Assotsiatsiyasining Qoraqalpogʻiston Respublikasi filiali tomonidan “Korruptsiyaga qarshi kurashish yoʻlida” nomli loyiha amalga oshirilayotgan boʻlib, mazkur loyiha Oliy Majlis huzuridagi Fuqarolik jamiyati institutlarini qoʻllab-quvvatlash jamoat fondining Qoraqalpogʻiston Respublikasi hududiy boʻlimi tomonidan moliyalashtirilgan. Loyihaning asosiy maqsadi — nogironligi boʻlgan shaxslarning huquqiy bilim darajasini oshirish va ularni korruptsiya holatlaridan himoya qilishdan iborat.

29-oktyabr kuni loyiha doirasida Amudaryo tumanidagi 6-sonli Bolalar musiqa va sanʼat maktabi zalida tadbir oʻtkazildi. Ushbu tadbirda nogironligi boʻlgan shaxslarga “Korruptsiya nima va uning oqibatlari qanday” degan savol doirasida keng koʻlamli huquqiy maʼlumotlar taqdim etildi. Shuningdek, korruptsion holatlarga duch kelganda toʻgʻri harakat qilish, raqamli texnologiyalarni korruptsiyaga qarshi kurashishda qoʻllash va korruptsiyaning oldini olish boʻyicha aniq amaliy tavsiyalar berildi.

Tadbirda Amudaryo tumani hokimligi, “Inson” ijtimoiy xizmatlar markazi tuman boʻlimi, ommaviy axborot vositalari vakillari hamda 35 nafar nogironligi boʻlgan shaxslar ishtirok etdi. Bu tadbir hududda yashovchi nogironligi boʻlgan fuqarolarning huquqiy bilimlarini yanada mustahkamlash yoʻlidagi muhim qadam boʻldi.

Aytish joizki, Qoraqalpogʻiston Respublikasida bugungi kunda 68 ming nafarga yaqin nogironligi boʻlgan shaxslar istiqomat qiladi. Shundan 12 mingdan ortigʻi Nukus shahrida yashaydi. Ushbu toifadagi fuqarolarning katta qismi turli ijtimoiy, tibbiy va huquqiy yordamlarga muhtoj.

Muammoning mohiyati shundaki, nogironligi boʻlgan shaxslarning oʻz huquq va imtiyozlari, davlat tomonidan taqdim etiladigan yordamlar haqida yetarli maʼlumotga ega emasligi ularni huquqbuzarlik, ayniqsa, korruptsiya holatlariga nisbatan zaif qilib qoʻymoqda.

Ayniqsa, tibbiyot, pensiya taʼminoti, uy-joy ajratish va ishga joylashtirish kabi sohalardagi ayrim masʼul shaxslar nogironligi boʻlgan shaxslarning huquqiy bilimsizligidan foydalanib, ulardan noqonuniy pul talab qilish yoki hujjatlarni sunʼiy ravishda kechiktirish kabi korruptsion holatlar kuzatilmoqda.

Loyihaning bosh maqsadi Qoraqalpogʻiston Respublikasida yashovchi nogironligi boʻlgan shaxslarning huquqiy xabardorligini oshirish, ularning davlat tomonidan belgilangan imtiyoz va xizmatlardan toʻliq foydalanishini taʼminlash hamda huquqbuzarlik va korruptsiya holatlarini keskin kamaytirishga qaratilgan.

Loyiha doirasida maqsadga erishish uchun kompleks yondashuv asosida bir qator amaliy mexanizmlar joriy etiladi. Jumladan, koʻrish, eshitish va jismoniy imkoniyati cheklangan 300 nafar nogironligi boʻlgan shaxslar orasida maqsadli guruhlar tuzilib, nogironligi boʻlgan shaxslar uchun moslashtirilgan huquqiy materiallar ishlab chiqiladi va tarqatiladi. Maqsadli guruhlar uchun korruptsiyaga qarshi targʻibot tadbirlari tashkil etiladi.

Bu kabi tadbirlarning ahamiyati shundaki, nogironligi boʻlgan shaxslar oʻzlariga tegishli boʻlgan imtiyozlar va huquqlar haqida aniq, tizimli bilimlarga ega boʻladi. Qolaversa, korruptsiya haqida umumiy bilimlari oshib, ularda ushbu illatning oldini olish va bunday holatlar haqida xabar berish koʻnikmalari shakllanadi.

Ushbu grant loyihasi Oʻzbekistonda korruptsiyaga qarshi kurashish borasidagi davlat siyosatini amalga oshirishda fuqarolik jamiyati institutlarining faol ishtirokiga yaqqol dilildir.