ЭЪЗОЗ ВА ЭЪТИРОФ – АЁЛГА БЎЛГАН ЮКСАК ҲУРМАТ ИФОДАСИДИР

8 март — Халқаро хотин-қизлар куни юртимизда нафақат байрам, балки аёл зотига бўлган юксак эҳтиром, меҳр ва эътиборнинг ёрқин ифодаси сифатида кенг нишонланади. Бу сана орқали жамият ва давлат ҳаётида, оила ва маҳалла тизимида, турли соҳа ва тармоқларда фидокорона меҳнат қилиб келаётган хотин-қизларнинг ўрни ва нуфузи яна бир бор эътироф этилади. Айниқса, умрини халқ хизматига бағишлаган, ўз меҳнати, сабр-тоқати ва матонати билан кўпчиликка ўрнак бўлган мўътабар аёлларга кўрсатилаётган ҳурмат ва эъзоз бу байрамнинг чинакам маъно-мазмунини намоён этади.

Байрам арафасида Амударё тумани прокуратураси ходимлари туманда яшовчи ана шундай эъзозли аёллардан бири, умр бўйи прокуратура соҳасида машаққатлардан чўчимай, фидойи меҳнат қилган Гулора Бобожонова хонадонига ташриф буюрдилар. Улар мўътабар онахонни Халқаро хотин-қизлар куни билан самимий муборакбод этиб, унга чуқур эҳтиром ва эзгу тилакларини изҳор қилдилар.

8 март Хотин-қизлар куни муносабати билан прокуратура органларида кўп йиллар давомида фидокорона хизмат қилиб, ёш мутахассисларни тарбиялаш, уларнинг билим ва малакасини ошириш ҳамда касбий кўникмаларини ривожлантиришга салмоқли ҳисса қўшган бир гуруҳ фахрийларни рағбатлантириш мақсадида Ўзбекистон Республикаси Бош прокурорининг тегишли буйруғи асосида прокуратура органлари фахрийси Гулора Бобожонова “Фидоий мураббий” кўкрак нишони билан тақдирланди. Ушбу юксак мукофот Қорақалпоғистон Республикаси прокуратураси раҳбарияти томонидан унга эсдалик совғалари билан тантанали тарзда топширилди.

Гулора Бобожонованинг кўп йиллик ҳалол ва самарали меҳнати, айниқса, ёш кадрларни тарбиялаш, уларни етук мутахассис этиб шакллантириш, соҳада илмий-методик ёндашувларни мустаҳкамлаш йўлидаги хизматлари муносиб эътироф этиб келинмоқда. У 2022 йилда ҳам тизимда кўп йиллар давомида фидокорона хизмат қилгани, ёш мутахассисларнинг билим ва малакасини ошириш, касбий кўникмаларини ривожлантириш ҳамда фаолиятни илмий-методик жиҳатдан таъминлашга қўшган салмоқли ҳиссаси учун “Фахрий ходим” кўкрак нишони билан тақдирланган эди.

Шунингдек, Гулора Бобожонова Ўзбекистон Республикаси прокуратура органлари ходимлари куни муносабати билан унинг прокуратура тизимидаги самарали ва ибратли меҳнати яна бир бор юксак баҳоланиб, Қорақалпоғистон Республикаси Жўқорғи Кенгеси Президиумининг 2024 йил 8 январдаги қарорига мувофиқ “Ибратли аёл” кўкрак нишони билан ҳам тақдирланган.

Бундай эътироф ва ҳурмат, аввало, аёлнинг жамиятдаги ўрни қанчалик беқиёс эканини кўрсатади. Гулора Бобожонова каби фидойи, матонатли ва тажрибали аёллар ўз ҳаёт йўли, меҳнат фаолияти ва инсоний фазилатлари билан нафақат соҳа вакиллари, балки ёш авлод учун ҳам ҳақиқий ибрат мактабидир.

Халқаро хотин-қизлар куни байрами ана шундай аёлларни қадрлаш, уларнинг меҳнатларини улуғлаш ва эзгу ишларини кенг жамоатчиликка намуна сифатида кўрсатиш учун яна бир имконият бўлди.