SURONLI YILLAR GUVOHI BOʻLGAN MOMO

Oq oltin ovulining pir-u badavlat onaxonlaridan biri boʻlgan Safargul momo bundan 95-yil avval  Toʻlqin ovulida tavallud topgan edi. Safargullar oilada faqat 2 qiz boʻlganligi sababli  ota-onasi ularning parvarishiga alohida eʼtibor berishdi. Yoshligidan tarbiyali, odobli, mehnatkash qilib tarbiyalashdi.

Urush davrida 13-14-yoshli  oʻsmir boʻlsa-da, dalada ter toʻkdi. Yosh boʻlishiga qaramasdan Bosuv kanalini qazishda  ham ishtirok etdi. U 1948-yilda  oq oltinlik Jiyamurod Xolimbetovga turmushga chiqdi. Jiyamurod oʻsha yili Toshkent qishloq xoʻjalik texnikumini tugatib kelgan, kolxozda agronom boʻlib ishlayotgan edi. Safargul ham dala ishlarida eriga qoʻl-koʻmak boʻldi.  Ular birgalikda  5 oʻgʻil va 5 qizni tarbiyalab kamolga yetkazishdi.

Farzandlarining barchasi el-yurt ishiga kamarbasta  boʻlib ulgʻayishdi. Katta oʻgʻli Yusufboy nafaqaga chiqquncha Jumurtov tosh maydalash zavodida ishladi. Qurbonboy esa temir yoʻl ishchisi boʻlib xizmat qildi. Sobirboy ustachilik qilib, ovuldagilarga yogʻoch buyumlar yasashda, uylarini taʼmirlashda yordamlashdi. Oʻrinboy ayni paytda Qoratov ekspeditsiyasi ishchisi. Momoning qizlari ham borgan joylarida palak yozib, oʻzlaridan koʻpayishdi.

– Enam turmush tashvishlariga juda ham sabr-u bardoshli boʻlib yashagan, – deydi momoning kelini, 50-maktab oʻqituvchisi Guloyim Asqarova. – Hozir ham baʼzilarga oʻxshab hayotidan, atrofidagi odamlardan norozi boʻlmaydi. Tetik va bardam, oʻzlari bemalol dalaga chiqib, sayr qiladi. Nevaralarini yoniga olib, pand-nasihatlar qiladi. Shuncha yil birga yashab, birovga qattiq gapirganini, hatto nevaralari shoʻxlik qilsa-da, urishib berganini eshitmaganman. Hammaga birdek, xuddi sokin daryoga oʻxshataman. Oʻtmishi haqida hech qachon nolinib gapirmaydi, afsuslanmaydi. Bugungi kuniga ishonch bilan yashaydi. Qisqasi, inson hamisha sabrli boʻlishi lozimligini men enamdan oʻrganganman.

Goʻzal fazilatli, matonatli va bardoshli bu inson atrofdagilarga ibrat boʻlib, mehr ulashib yashayapti. Ehtimol, uzoq umr koʻrish siri ham shundadir. Front orqasidagi zalvorli mehnatning zahmatini tortgan momo ayni paytda farzandlari va nevaralari, el-yurt ardogʻida. Biz 95 yoshli Safargul momoni bahor bayrami bilan tabriklab, hamisha sogʻ-omon boʻlishini tilab qolamiz.

Ziyoda Sadaddinova.