“Tax-tepa”: Qardoshlik ruhi va milliy uygʻonish timsoli boʻlgan etno-madaniy festival

Joriy yilning 21-noyabr kuni Taxtakoʻpir tumanining “Beltov” aholi punkti, “Tax-tepa” etno ovuli Qoraqalpogʻistonning nafaqat tarixiy, balki maʼnaviy hayotidagi yirik voqeaga — Xalqaro etno-madaniy festivalning tantanali ochilishiga mezbonlik qildi. Sahar chogʻidan boshlab bu hududda bayramona ruh, quvonchga toʻla shukuh sezildi. Yuzlab mehmonlar, sanʼatkorlar, milliy ansambllar, mahalliy hunarmandlar va olis yurtdan kelgan ijodkorlarning jamlanishi qadim tarixni, milliy ruhi uygʻoq xalqning bugungi oʻziga xosligini yana bir bor dunyoga namoyon etdi.

Tadbirda Qoraqalpogʻiston Respublikasi Joʻqorgʻi Kengesining Raisi Amanbay Orinbayev soʻzga chiqib, barcha ishtirokchilarni festivalning ochilishi bilan samimiy muborakbod etdi. U oʻz nutqida koʻp millatli yurtimizda asrlar davomida hukm surib kelayotgan doʻstlik, ahillik va totuvlikning bugungi kunda yanada mustahkamlanayotganini alohida taʼkidladi.

Ushbu yirik madaniy anjumanda Oʻzbekiston Respublikasi Prezidentining maslahatchisi Tursunxon Xudaybergenov, Qoraqalpogʻiston Respublikasi Vazirlar Kengashi Raisi Farhod Ermanov, Qozogʻiston Respublikasining favqulodda va muxtor elchisi Beybut Atamkulovning ishtiroki festival darajasini, xalqaro miqyosdagi ahamiyatini yanada oshirdi.

Hurmatli Prezidentimizning alohida eʼtibori bilan soʻnggi yillarda “Beltov” ovulida amalga oshirilgan ulkan bunyodkorlik ishlari qishloqqa butunlay yangi ruh, yangi qiyofa baxsh etdi. Bir paytlar oddiy aholi manzili boʻlgan bu hudud bugun mamlakatimizning eng goʻzal etno-turistik maskanlaridan biriga aylanib, xalqaro miqyosda ham eʼtirof topmoqda.

Bu oʻzgarishlarning ramziga aylangan “Tax-tepa” etno-qishlogʻi esa oʻzining oʻtmishdan hikoya qiluvchi paxsa uylari, milliy arxitektura, qadimiy turmush tarzi bilan tom maʼnodagi tirik muzeyni eslatadi. Xususan, qoʻshni qishloq manzarasidan ilhomlanib barpo etilgan 16 ta paxsa uy har bir mehmonni oʻziga tortib, qadim ajdodlarimizning hayot tarzi, maishiy anʼanalari bilan yaqindan tanishtiradi.

Festivalning aynan shu maskanda oʻtkazilishi bejiz emas. Har biri oʻziga xos maʼno va ruhiyatga ega boʻlgan 70 ta Qora uy — yurtimizda yashayotgan turli millat vakillarining oʻzligini namoyon etishi, ularning madaniy rang-barangligini namoyish etuvchi maydonga aylandi. Har bir uyda xilma-xil millatlarga xos anʼanalar, kiyim-kechaklar, hunarmandchilik buyumlari, marosimlarga oid koʻrgazmalar joylashtirildi. Bu — bir zaminda ahil-inoq yashayotgan xalqlarning birligiga, bir-biriga boʻlgan hurmatiga, koʻp asrlik doʻstligiga ramziy ishoradir.

Festival doirasida milliy urf-odatlar, qadimiy marosimlar, folklor sanʼati oʻziga xos sahna koʻrinishlarida jonlantirildi. Milliy raqslar, ijodkorlar tomonidan kuylangan qoʻshiqlar, baxshi va jirovlarning joʻshqin chiqishlari barchaning eʼtiborini tortdi. Qoraqalpoq, oʻzbek, qozoq, turkman xalqlariga xos milliy oʻyinlar esa maydonda haqiqiy bayram kayfiyatini yaratdi.

Hunarmandlar tomonidan tashkil etilgan koʻrgazmalar, milliy taomlar festivali, yosh rassomlar burchagi, bolalar uchun etno-madaniy makon festivali ishtirokchilariga alohida zavq ulashdi. Ayniqsa ushbu madaniy boylik xorijdan tashrif buyurgan mehmonlarda chuqur taassurot qoldirdi.

Taxtakoʻpirning “Tax-tepa” etno ovulida oʻtkazilgan xalqaro festival nafaqat madaniy tadbir, balki xalqimizning ming yillik tarixiy ildizlarini, milliy oʻziga xosligini, turli madaniyatlar uygʻunligini butun dunyoga koʻrsatib beruvchi yorqin namuna boʻldi.

Bu kabi tadbirlar yurtimizda turizmni rivojlantirish, milliy merosni asrash, yosh avlodda tarixiy xotira va milliy gʻururni mustahkamlash borasida islohotlarning amaliy natijalaridir.

Charos Arslonova, tuman hokimligining Axborot xizmati rahbari.