“Тах-тепа”: Қардошлик руҳи ва миллий уйғониш тимсоли бўлган этно-маданий фестиваль

Жорий йилнинг 21 ноябрь куни Тахтакўпир туманининг “Белтов” аҳоли пункти, “Тах-тепа” этно овули Қорақалпоғистоннинг нафақат тарихий, балки маънавий ҳаётидаги йирик воқеага — Халқаро этно-маданий фестивалнинг тантанали очилишига мезбонлик қилди. Саҳар чоғидан бошлаб бу ҳудудда байрамона руҳ, қувончга тўла шукуҳ сезилди. Юзлаб меҳмонлар, санъаткорлар, миллий ансамбллар, маҳаллий ҳунармандлар ва олис юртдан келган ижодкорларнинг жамланиши қадим тарихни, миллий руҳи уйғоқ халқнинг бугунги ўзига хослигини яна бир бор дунёга намоён этди.

Тадбирда Қорақалпоғистон Республикаси Жўқорғи Кенгесининг Раиси Аманбай Оринбаев сўзга чиқиб, барча иштирокчиларни фестивалнинг очилиши билан самимий муборакбод этди. У ўз нутқида кўп миллатли юртимизда асрлар давомида ҳукм суриб келаётган дўстлик, аҳиллик ва тотувликнинг бугунги кунда янада мустаҳкамланаётганини алоҳида таъкидлади.

Ушбу йирик маданий анжуманда Ўзбекистон Республикаси Президентининг маслаҳатчиси Турсунхон Худайбергенов, Қорақалпоғистон Республикаси Вазирлар Кенгаши Раиси Фарҳод Эрманов, Қозоғистон Республикасининг фавқулодда ва мухтор элчиси Бейбут Атамкуловнинг иштироки фестиваль даражасини, халқаро миқёсдаги аҳамиятини янада оширди.

Ҳурматли Президентимизнинг алоҳида эътибори билан сўнгги йилларда “Белтов” овулида амалга оширилган улкан бунёдкорлик ишлари қишлоққа бутунлай янги руҳ, янги қиёфа бахш этди. Бир пайтлар оддий аҳоли манзили бўлган бу ҳудуд бугун мамлакатимизнинг энг гўзал этно-туристик масканларидан бирига айланиб, халқаро миқёсда ҳам эътироф топмоқда.

Бу ўзгаришларнинг рамзига айланган “Тах-тепа” этно-қишлоғи эса ўзининг ўтмишдан ҳикоя қилувчи пахса уйлари, миллий архитектура, қадимий турмуш тарзи билан том маънодаги тирик музейни эслатади. Хусусан, қўшни қишлоқ манзарасидан илҳомланиб барпо этилган 16 та пахса уй ҳар бир меҳмонни ўзига тортиб, қадим аждодларимизнинг ҳаёт тарзи, маиший анъаналари билан яқиндан таништиради.

Фестивалнинг айнан шу масканда ўтказилиши бежиз эмас. Ҳар бири ўзига хос маъно ва руҳиятга эга бўлган 70 та Қора уй — юртимизда яшаётган турли миллат вакилларининг ўзлигини намоён этиши, уларнинг маданий ранг-баранглигини намойиш этувчи майдонга айланди. Ҳар бир уйда хилма-хил миллатларга хос анъаналар, кийим-кечаклар, ҳунармандчилик буюмлари, маросимларга оид кўргазмалар жойлаштирилди. Бу — бир заминда аҳил-иноқ яшаётган халқларнинг бирлигига, бир-бирига бўлган ҳурматига, кўп асрлик дўстлигига рамзий ишорадир.

Фестиваль доирасида миллий урф-одатлар, қадимий маросимлар, фольклор санъати ўзига хос саҳна кўринишларида жонлантирилди. Миллий рақслар, ижодкорлар томонидан куйланган қўшиқлар, бахши ва жировларнинг жўшқин чиқишлари барчанинг эътиборини тортди. Қорақалпоқ, ўзбек, қозоқ, туркман халқларига хос миллий ўйинлар эса майдонда ҳақиқий байрам кайфиятини яратди.

Ҳунармандлар томонидан ташкил этилган кўргазмалар, миллий таомлар фестивали, ёш рассомлар бурчаги, болалар учун этно-маданий макон фестивали иштирокчиларига алоҳида завқ улашди. Айниқса ушбу маданий бойлик хориждан ташриф буюрган меҳмонларда чуқур таассурот қолдирди.

Тахтакўпирнинг “Тах-тепа” этно овулида ўтказилган халқаро фестиваль нафақат маданий тадбир, балки халқимизнинг минг йиллик тарихий илдизларини, миллий ўзига хослигини, турли маданиятлар уйғунлигини бутун дунёга кўрсатиб берувчи ёрқин намуна бўлди.

Бу каби тадбирлар юртимизда туризмни ривожлантириш, миллий меросни асраш, ёш авлодда тарихий хотира ва миллий ғурурни мустаҳкамлаш борасида ислоҳотларнинг амалий натижаларидир.

Чарос Арслонова, туман ҳокимлигининг Ахборот хизмати раҳбари.