УЛКАН ЙЎЛ БОШИДА

Мактаб! Ҳар биримиз шу қутлуғ даргоҳ остонасида ўйинқароқ, беғам болаликни ортда қолдириб, илм дунёси сари илк қадам қўямиз. Қўлимизга илк бор қалам тутқазиб, ҳарф танитган, ёзувни ўргатган, ҳақиқий инсон бўлиб вояга етиш учун шууримизга илм олиш иштиёқини муҳрлаган устозларимиз бизни янги дунёга етаклаб, порлоқ келажак сари йўллайди.

-Биз бугун Манғит шаҳридаги 38-сонли умумтаълим мактабининг 11-синфини тамомлаш ва мустақил ҳаётга учирма бўлиш арафасидаги бир палапони, интилувчан ижодкор, мактаблар ўқувчилари орасидаги кўпгина кўрик-танловлар, билимлар синовлари ғолиби, ўзига хос мушоҳадага бой, ажойиб ташбеҳлар ила гўзал туйғулар ифода этилган шеърлари, ҳикоялари билан нафақат туманимизда, балки республикамизда ўз мухлисларига эга Ирода Ердошева ҳақида сўз юритамиз.

Ирода 2002 йилда Манғит шаҳрининг Ойбек номли маҳалласида туғилди. Зеҳни жуда ўткирлиги, тенгқурларига нисбатан чаққонлиги боис, уни бобо-бувиси маслаҳатлашиб, олти ёшидан 38-сонли мактабнинг 1-синфига беришди.

Ироданинг толеи шуки, унга бошланғич синфларда жуда болажон, ўз касбининг фидойиси бўлган Гулнора Раҳимова дарс берди. У мактабда ўтган дарс машғулотларини бобоси, 44 йил 31-мактабда ўқувчиларга таълим-тарбия берган Қурбонбой Ердошев (Худо раҳматига олган бўлсин!) уйида мустаҳкамлар, эртаклар айтиб, кичик-кичик ҳикоялар ўқиб бериб, унинг фанларни яхши ўзлаштиришига, адабиётга қизиқишларини оширишга ҳаракат қиларди. Бошланғич синфларда ўқиб юрган вақтларидаёқ илк шеърларини ёзди, бобоси уни қувона-қувона “Тараққиёт кўзгуси” газетаси таҳририятига етаклаб келди.

Ирода юқори синфларга ўтгач, унинг ижодий ишларининг биринчи ўқувчиси синфдош дўстлари, она тили ва адабиёт фани ўқитувчиси Назира Усмонова бўлди. Назира Ироданинг ўз фанига қизиққани, яна ўзига хос бадиий пишиқ шеър, ҳикоялар машқ қилгани учун дарсдан ташқари ҳам бўш вақтларида у билан алоҳида шуғулланиб, иқтидорини ривожлантиришга, фанни чуқур ўзлаштиришига интилди. Натижада Ирода Ердошева ҳар бир ўқув йилини муваффақиятли тамомлаб, мактаб маъмуриятининг ташаккурномалари, “Фахрий ёрлиқ”лари билан тақдирланарди. У 2016 йилда “Камалак юлдузлари” Болалар ижодиёти фестивалининг мамлакат босқичи “Ғ” йўналишида ғолиб бўлди, шу йили Ўзбекистон Республикаси Халқ таълими вазирлиги ва Республика болалар кутубхонаси ҳамкорликда таъсис этган “Мустақиллик мадҳи болалар ижодида” номли Республика ижодий ишлар кўрик-танловида фаол иштирок этиб, “Фахрий ёрлиқ” билан тақдирланди. 2017 йил туман мактаблари ўқувчилари орасида ўтказилган “Жаҳолатга қарши маърифат” деб номланган ижодий ишлар кўрик-танловида 3-ўринни, “Иқтидорим – ифтихорим” номли ижодкор ёшлар танловида 3-ўринни эгаллади.

Шунингдек, у “Тараққиёт кўзгуси” ва “Менинг оилам” газеталари, “Жайхун илҳомлари” нодавлат нотижорат ташкилоти томонидан ўтказилган қатор ижодий ишлар танловларида ҳам фахрли ўринларни эгаллаб келмоқда. 2018 йилда Республика ўқувчи қизлар Инновацион саммитида муваффақиятли иштирок этгани учун Республика Халқ таълими вазирлигининг махсус Сертификатини олишга, 2018 йилда “Тараққиёт кўзгуси” ва “Менинг оилам” газеталари таҳририятлари билан фаол ҳамкорлик қилиб, халқимиз турмуш тарзида юз бераётган ижобий ўзгаришлар ҳақидаги мақолалари, ёшларни ватанпарварлик ва миллий истиқлол ғояларига садоқат руҳида тарбиялашга хизмат қилувчи шеърлари билан туман матбуоти ривожига қўшган ҳиссаси учун газета таҳририяти ташаккурнома билан тақдирлаган олти нафар жамоатчи мухбирларнинг бири бўлди.

Иродани бугун туманимиз ёшлари яхши билишади, унга ҳавас қилишади. 2014 йилда “Тараққиёт кўзгуси” газетаси ташкил этилганлигининг 80 йиллиги муносабати билан нашр этилган шу номдаги тўпламда, 2016 йилда нашр этилган “Жайхун жилғалари”, 2018 йилда нашр этилган “Ёшлик мавжлари” номли тўпламларда ва даврий нашрларда ёритилган шеърлари, ҳикоялари билан мухлислари эътиборини қозона олди.

Ирода Ердошеванинг шеър, ҳикоялари Амударё тумани оммавий ахборот воситаларидан ташқари Республика миқёсида нашр этилаётган “Гулхан”, “Ғунча” журналлари, “Қарлиғаш”, “Жеткиншек”, “Қўнғироқ” каби болалар ва ёшлар газеталарида ҳам чоп этилган.

Ирода Ердошева ўтган вақтлар давомида тумандаги мавжуд ижодий муҳитдан баҳра олиб, улғайди, кўплар ҳавас қилгулик ёш ижодкорга айланди.

Унинг “Меҳр чашмаси” номли илк шеърий китобини ўқисангиз – бунга ўзингиз ҳам амин бўласиз.

Бугун улкан йўл бошида, 11 йил таълим-тарбия олган мактаби бағридан учирма бўлиш арафасида турган Ирода Ердошеванинг келажак учун режалаган орзу-ниятлари кўп: аввало олий таълим олиб, сўнгра, эл-юртимизга хизмат қилиш.

Биз ҳам Ироданинг орзулари ушалишига тилакдош бўлиб қоламиз.

Ойгул РАЖАБОВА.