ULKAN YOʻL BOShIDA

Maktab! Har birimiz shu qutlugʻ dargoh ostonasida oʻyinqaroq, begʻam bolalikni ortda qoldirib, ilm dunyosi sari ilk qadam qoʻyamiz. Qoʻlimizga ilk bor qalam tutqazib, harf tanitgan, yozuvni oʻrgatgan, haqiqiy inson boʻlib voyaga yetish uchun shuurimizga ilm olish ishtiyoqini muhrlagan ustozlarimiz bizni yangi dunyoga yetaklab, porloq kelajak sari yoʻllaydi.

-Biz bugun Mangʻit shahridagi 38-sonli umumtaʼlim maktabining 11-sinfini tamomlash va mustaqil hayotga uchirma boʻlish arafasidagi bir palaponi, intiluvchan ijodkor, maktablar oʻquvchilari orasidagi koʻpgina koʻrik-tanlovlar, bilimlar sinovlari gʻolibi, oʻziga xos mushohadaga boy, ajoyib tashbehlar ila goʻzal tuygʻular ifoda etilgan sheʼrlari, hikoyalari bilan nafaqat tumanimizda, balki respublikamizda oʻz muxlislariga ega Iroda Yerdosheva haqida soʻz yuritamiz.

Iroda 2002-yilda Mangʻit shahrining Oybek nomli mahallasida tugʻildi. Zehni juda oʻtkirligi, tengqurlariga nisbatan chaqqonligi bois, uni bobo-buvisi maslahatlashib, olti yoshidan 38-sonli maktabning 1-sinfiga berishdi.

Irodaning tolei shuki, unga boshlangʻich sinflarda juda bolajon, oʻz kasbining fidoyisi boʻlgan Gulnora Rahimova dars berdi. U maktabda oʻtgan dars mashgʻulotlarini bobosi, 44-yil 31-maktabda oʻquvchilarga taʼlim-tarbiya bergan Qurbonboy Yerdoshev (Xudo rahmatiga olgan boʻlsin!) uyida mustahkamlar, ertaklar aytib, kichik-kichik hikoyalar oʻqib berib, uning fanlarni yaxshi oʻzlashtirishiga, adabiyotga qiziqishlarini oshirishga harakat qilardi. Boshlangʻich sinflarda oʻqib yurgan vaqtlaridayoq ilk sheʼrlarini yozdi, bobosi uni quvona-quvona “Taraqqiyot koʻzgusi” gazetasi tahririyatiga yetaklab keldi.

Iroda yuqori sinflarga oʻtgach, uning ijodiy ishlarining birinchi oʻquvchisi sinfdosh doʻstlari, ona tili va adabiyot fani oʻqituvchisi Nazira Usmonova boʻldi. Nazira Irodaning oʻz faniga qiziqqani, yana oʻziga xos badiiy pishiq sheʼr, hikoyalar mashq qilgani uchun darsdan tashqari ham boʻsh vaqtlarida u bilan alohida shugʻullanib, iqtidorini rivojlantirishga, fanni chuqur oʻzlashtirishiga intildi. Natijada Iroda Yerdosheva har bir oʻquv yilini muvaffaqiyatli tamomlab, maktab maʼmuriyatining tashakkurnomalari, “Faxriy yorliq”lari bilan taqdirlanardi. U 2016-yilda “Kamalak yulduzlari” Bolalar ijodiyoti festivalining mamlakat bosqichi “Gʻ” yoʻnalishida gʻolib boʻldi, shu yili Oʻzbekiston Respublikasi Xalq taʼlimi vazirligi va Respublika bolalar kutubxonasi hamkorlikda taʼsis etgan “Mustaqillik madhi bolalar ijodida” nomli Respublika ijodiy ishlar koʻrik-tanlovida faol ishtirok etib, “Faxriy yorliq” bilan taqdirlandi. 2017-yil tuman maktablari oʻquvchilari orasida oʻtkazilgan “Jaholatga qarshi maʼrifat” deb nomlangan ijodiy ishlar koʻrik-tanlovida 3-oʻrinni, “Iqtidorim – iftixorim” nomli ijodkor yoshlar tanlovida 3-oʻrinni egalladi.

Shuningdek, u “Taraqqiyot koʻzgusi” va “Mening oilam” gazetalari, “Jayxun ilhomlari” nodavlat notijorat tashkiloti tomonidan oʻtkazilgan qator ijodiy ishlar tanlovlarida ham faxrli oʻrinlarni egallab kelmoqda. 2018-yilda Respublika oʻquvchi qizlar Innovatsion sammitida muvaffaqiyatli ishtirok etgani uchun Respublika Xalq taʼlimi vazirligining maxsus Sertifikatini olishga, 2018-yilda “Taraqqiyot koʻzgusi” va “Mening oilam” gazetalari tahririyatlari bilan faol hamkorlik qilib, xalqimiz turmush tarzida yuz berayotgan ijobiy oʻzgarishlar haqidagi maqolalari, yoshlarni vatanparvarlik va milliy istiqlol gʻoyalariga sadoqat ruhida tarbiyalashga xizmat qiluvchi sheʼrlari bilan tuman matbuoti rivojiga qoʻshgan hissasi uchun gazeta tahririyati tashakkurnoma bilan taqdirlagan olti nafar jamoatchi muxbirlarning biri boʻldi.

Irodani bugun tumanimiz yoshlari yaxshi bilishadi, unga havas qilishadi. 2014-yilda “Taraqqiyot koʻzgusi” gazetasi tashkil etilganligining 80 yilligi munosabati bilan nashr etilgan shu nomdagi toʻplamda, 2016-yilda nashr etilgan “Jayxun jilgʻalari”, 2018-yilda nashr etilgan “Yoshlik mavjlari” nomli toʻplamlarda va davriy nashrlarda yoritilgan sheʼrlari, hikoyalari bilan muxlislari eʼtiborini qozona oldi.

Iroda Yerdoshevaning sheʼr, hikoyalari Amudaryo tumani ommaviy axborot vositalaridan tashqari Respublika miqyosida nashr etilayotgan “Gulxan”, “Gʻuncha” jurnallari, “Qarligʻash”, “Jetkinshek”, “Qoʻngʻiroq” kabi bolalar va yoshlar gazetalarida ham chop etilgan.

Iroda Yerdosheva oʻtgan vaqtlar davomida tumandagi mavjud ijodiy muhitdan bahra olib, ulgʻaydi, koʻplar havas qilgulik yosh ijodkorga aylandi.

Uning “Mehr chashmasi” nomli ilk sheʼriy kitobini oʻqisangiz – bunga oʻzingiz ham amin boʻlasiz.

Bugun ulkan yoʻl boshida, 11-yil taʼlim-tarbiya olgan maktabi bagʻridan uchirma boʻlish arafasida turgan Iroda Yerdoshevaning kelajak uchun rejalagan orzu-niyatlari koʻp: avvalo oliy taʼlim olib, soʻngra, el-yurtimizga xizmat qilish.

Biz ham Irodaning orzulari ushalishiga tilakdosh boʻlib qolamiz.

Oygul RAJABOVA.