Amudaryo yoshlari taʼlim, IT va sport sohalarida ulkan yutuqlarga erishmoqdalar

Amudaryo tumani yoshlari bugungi kunda zamonaviy taʼlim, fan va IT sohalarida ulkan yutuqlarga erishmoqda. Amudaryolik iqtidorli oʻgʻil-qizlarning xalqaro nufuzli universitetlarga kirishi, mahalliy innovatsion markazlardagi faolligi tumanimizning porloq kelajagidan darak beradi.

Tuman yoshlarining ilmiy salohiyati nafaqat Qoraqalpogʻiston va Oʻzbekiston, balki xalqaro miqyosda ham eʼtirof etilmoqda. Buning yorqin misoli sifatida Toʻlqin ovulidan chiqqan yosh iqtidor egasi Jasurbek Umarovning toʻliq grant ($360 ming) asosida nufuzli Garvard universitetiga qabul qilinganini keltirish mumkin. Bu yutuq tumanimizdagi oddiy maktablarda berilayotgan taʼlim sifati va yoshlarning chet tillarini mukammal egallayotganining yaqqol isbotidir.

Raqamli savodxonlikni oshirish markazlari yoshlarni dasturlash, robototexnika va sunʼiy intellekt asoslariga oʻrgatmoqda. Xorijiy tillarni oʻrganish markazlari koʻpayib, yoshlarning xalqaro taʼlim dasturlarida ishtirok etish imkoniyati kengaymoqda.

Bundan tashqari yoshlarni mehnat bozorida talab yuqori boʻlgan kasblarga yoʻnaltirish ishlari jadallashgan. Davlatimiz tomonidan ilgari surilgan “Besh tashabbus” loyihasi doirasida tumanda sport majmualari, sanʼat toʻgaraklari va axborot-kutubxona markazlari faoliyati yoʻlga qoʻyilgan. Bu infratuzilma yoshlarning boʻsh vaqtini mazmunli tashkil etish bilan birga, ularning jismonan va maʼnan barkamol boʻlishini taʼminlaydi.

"Inson qadri uchun" tamoyili asosida Amudaryoda yoshlarning sifatli taʼlim olishi uchun barcha sharoitlar yaratilmoqda. Taʼlimga qilingan sarmoya — bu kelajakka qilingan eng toʻgʻri sarmoyadir. Zamonaviy bilim, milliy qadriyatlar va yuksak maʼnaviyatni oʻzida mujassam etgan oʻgʻil-qizlar ertaga tumanimiz, qolaversa, butun Oʻzbekiston ravnaqi uchun xizmat qiladigan yetakchi kadrlardir.

Amudaryolik yoshlarning shijoati shuni koʻrsatadiki, yurtimiz kelajagi ishonchli qoʻllarda. Ular yaratayotgan har bir yangi loyiha, qoʻlga kiritilayotgan har bir yutuq – Yangi Oʻzbekiston poydevorini mustahkamlashga qoʻshilayotgan ulkan hissadir.

Bugungi kunda Amudaryo tumanidagi maktab va litsey bitiruvchilari orasida xalqaro IELTS imtihonlaridan yuqori ball (7.5–8.5) olib, AQSh, Janubiy Koreya va Yevropaning nufuzli universitetlariga muddatidan oldin 100 foizlik grant asosida qabul qilinayotgan oʻquvchilar soni keskin ortmoqda.

Bunga yorqin misol tariqasida sinfdoshim Mavjuda Oʻtamurodovani keltirishimiz mumkin. U IELTSdan yuqori ball olib, hozirgi kunda Janubiy Koreyada oʻqimoqda. Shu bilan bir qatorda tumandagi iqtidorli qizlar adabiyot, sanʼat va taʼlim yoʻnalishlarida davlat mukofotlariga loyiq koʻrilib, tengdoshlariga oʻrnak boʻlmoqda.

Amudaryo tumani sport maktabi tarbiyalanuvchilari dzyudo, boks va oʻzbek kurashi boʻyicha Qoraqalpogʻiston hamda Oʻzbekiston chempionatlarida muntazam ravishda oltin medallarni qoʻlga kiritmoqdalar. Tumandagi mahallalarda yashovchi yoshlar, masalan, Daryo boʻyi mahallasi yigitlari futbol va sportning boshqa turlari boʻyicha ommaviy musobaqalarda gʻoliblikni qoʻlga kiritib, respublika bosqichlariga yoʻllanma olmoqdalar.

Tumanda IT Park filiali (IT Markaz) ishga tushgach, dasturlash va robototexnika yoʻnalishida oʻqigan yoshlar hozirda masofadan turib (frilans platformalarida) xorijiy kompaniyalarga xizmat koʻrsatib, valyutada daromad topmoqdalar.

Tumandagi koʻplab maktab oʻquvchilari "Bir million dasturchi" loyihasi doirasida xalqaro sertifikatlarni qoʻlga kiritib, yirik mukofot jamgʻarmasiga ega boʻlgan kibersport va startap tanlovlarida muvaffaqiyatli ishtirok etmoqdalar.

Amudaryolik oʻgʻil-qizlarning bu shijoati Yangi Oʻzbekiston poydevorini yanada mustahkamlashga xizmat qiladi.