Амударё ёшлари таълим, IT ва спорт соҳаларида улкан ютуқларга эришмоқдалар

Амударё тумани ёшлари бугунги кунда замонавий таълим, фан ва IT соҳаларида улкан ютуқларга эришмоқда. Амударёлик иқтидорли ўғил-қизларнинг халқаро нуфузли университетларга кириши, маҳаллий инновацион марказлардаги фаоллиги туманимизнинг порлоқ келажагидан дарак беради.

Туман ёшларининг илмий салоҳияти нафақат Қорақалпоғистон ва Ўзбекистон, балки халқаро миқёсда ҳам эътироф этилмоқда. Бунинг ёрқин мисоли сифатида Тўлқин овулидан чиққан ёш иқтидор эгаси Жасурбек Умаровнинг тўлиқ грант ($360 минг) асосида нуфузли Гарвард университетига қабул қилинганини келтириш мумкин. Бу ютуқ туманимиздаги оддий мактабларда берилаётган таълим сифати ва ёшларнинг чет тилларини мукаммал эгаллаётганининг яққол исботидир.

Рақамли саводхонликни ошириш марказлари ёшларни дастурлаш, робототехника ва сунъий интеллект асосларига ўргатмоқда. Хорижий тилларни ўрганиш марказлари кўпайиб, ёшларнинг халқаро таълим дастурларида иштирок этиш имконияти кенгаймоқда.

Бундан ташқари ёшларни меҳнат бозорида талаб юқори бўлган касбларга йўналтириш ишлари жадаллашган. Давлатимиз томонидан илгари сурилган “Беш ташаббус” лойиҳаси доирасида туманда спорт мажмуалари, санъат тўгараклари ва ахборот-кутубхона марказлари фаолияти йўлга қўйилган. Бу инфратузилма ёшларнинг бўш вақтини мазмунли ташкил этиш билан бирга, уларнинг жисмонан ва маънан баркамол бўлишини таъминлайди.

"Инсон қадри учун" тамойили асосида Амударёда ёшларнинг сифатли таълим олиши учун барча шароитлар яратилмоқда. Таълимга қилинган сармоя — бу келажакка қилинган энг тўғри сармоядир. Замонавий билим, миллий қадриятлар ва юксак маънавиятни ўзида мужассам этган ўғил-қизлар эртага туманимиз, қолаверса, бутун Ўзбекистон равнақи учун хизмат қиладиган етакчи кадрлардир.

Амударёлик ёшларнинг шижоати шуни кўрсатадики, юртимиз келажаги ишончли қўлларда. Улар яратаётган ҳар бир янги лойиҳа, қўлга киритилаётган ҳар бир ютуқ – Янги Ўзбекистон пойдеворини мустаҳкамлашга қўшилаётган улкан ҳиссадир.

Бугунги кунда Амударё туманидаги мактаб ва лицей битирувчилари орасида халқаро IELTS имтиҳонларидан юқори балл (7.5–8.5) олиб, АҚШ, Жанубий Корея ва Европанинг нуфузли университетларига муддатидан олдин 100 фоизлик грант асосида қабул қилинаётган ўқувчилар сони кескин ортмоқда.

Бунга ёрқин мисол тариқасида синфдошим Мавжуда Ўтамуродовани келтиришимиз мумкин. У IELTSдан юқори балл олиб, ҳозирги кунда Жанубий Кореяда ўқимоқда. Шу билан бир қаторда тумандаги иқтидорли қизлар адабиёт, санъат ва таълим йўналишларида давлат мукофотларига лойиқ кўрилиб, тенгдошларига ўрнак бўлмоқда.

Амударё тумани спорт мактаби тарбияланувчилари дзюдо, бокс ва ўзбек кураши бўйича Қорақалпоғистон ҳамда Ўзбекистон чемпионатларида мунтазам равишда олтин медалларни қўлга киритмоқдалар. Тумандаги маҳаллаларда яшовчи ёшлар, масалан, Дарё бўйи маҳалласи йигитлари футбол ва спортнинг бошқа турлари бўйича оммавий мусобақаларда ғолибликни қўлга киритиб, республика босқичларига йўлланма олмоқдалар.

Туманда IT Парк филиали (IT Марказ) ишга тушгач, дастурлаш ва робототехника йўналишида ўқиган ёшлар ҳозирда масофадан туриб (фриланс платформаларида) хорижий компанияларга хизмат кўрсатиб, валютада даромад топмоқдалар.

Тумандаги кўплаб мактаб ўқувчилари "Бир миллион дастурчи" лойиҳаси доирасида халқаро сертификатларни қўлга киритиб, йирик мукофот жамғармасига эга бўлган киберспорт ва стартап танловларида муваффақиятли иштирок этмоқдалар.

Амударёлик ўғил-қизларнинг бу шижоати Янги Ўзбекистон пойдеворини янада мустаҳкамлашга хизмат қилади.