Амударёда медиа-тур давомида ҳудуднинг улкан салоҳияти намоён этилди

Қорақалпоғистон Республикасида амалга оширилаётган кенг кўламли ижтимоий-иқтисодий ислоҳотлар, янги инвестицион лойиҳалар ҳамда ҳудудларнинг ишлаб чиқариш салоҳиятини кенг жамоатчиликка етказиш мақсадида Жўқорғи Кенгес ташаббуси билан республика миқёсида фаолият юритаётган журналистлар, блогерлар, телеканаллар мухбирлари ва вайнерлар иштирокида Амударё туманида медиа-тур ташкил этилди. Мазкур медиа-тур нафақат туманда амалга оширилаётган бунёдкорлик ишлари билан яқиндан танишиш, балки ҳудуднинг иқтисодий имкониятлари, саноат салоҳияти ва аҳоли фаровонлигини оширишга қаратилган лойиҳаларнинг амалий натижаларини ўрганиш имконини берди.

Медиа-тур иштирокчилари дастлаб Қорақалпоғистон Республикаси ва Хоразм вилоятини ўзаро боғлаб турган Амударё устидаги автомобиль ҳамда темир йўл кўприги билан танишдилар. Ушбу муҳим транспорт иншооти икки ҳудуд ўртасидаги иқтисодий ва логистика алоқаларини мустаҳкамлашда муҳим аҳамият касб этмоқда. Журналист ва блогерлар томонидан кўприк ҳудудида фото ва видеолавҳалар тайёрланиб, унинг транспорт тизимидаги ўрни ҳамда ҳудуд ривожига қўшаётган ҳиссаси кенг ёритилди.

Медиа-тур иштирокчилари Жайхун овулида фаолият юритаётган “Нукус-Дилиша” МЧЖга қарашли ун маҳсулотлари ишлаб чиқариш корхонасида бўлиб, корхонанинг ишлаб чиқариш жараёнлари билан яқиндан танишдилар.

Корхонада замонавий технологиялар асосида сифатли маҳсулотлар тайёрланаётгани, маҳаллий хомашёдан самарали фойдаланиш орқали ички бозор эҳтиёжларини қондиришга муносиб ҳисса қўшилаётгани қайд қилинди. Бундай корхоналар нафақат озиқ-овқат хавфсизлигини таъминлаш, балки янги иш ўринлари яратиш ва ҳудуд иқтисодиётини мустаҳкамлашда ҳам муҳим ўрин тутади.

Медиа-тур иштирокчиларида катта таассурот қолдирган навбатдаги манзил 13 миллион АҚШ доллари маблағи эвазига бунёд этилган “Манғит сув тозалаш” иншооти бўлди. Мутахассисларнинг маълумот беришича, мазкур йирик лойиҳа жорий йилнинг сентябрь ойида фойдаланишга топширилиши режалаштирилган. Иншоотнинг асосий вазифаси Амударё тумани аҳолисини сифатли ва тоза ичимлик суви билан таъминлашдан иборат.

Лойиҳанинг техник имкониятлари ҳам эътиборга молик. Мазкур иншоот кунига 40 минг куб метр ичимлик сувини тозалаш қувватига эга. Айни кунларда қурилиш-монтаж ишлари тўлиқ якунланган бўлиб, станция замонавий сув тозалаш технологиялари билан жиҳозланган. Мутахассисларнинг таъкидлашича, лойиҳа тўлиқ ишга тушгач, туманда марказлашган ичимлик суви билан таъминланганлик даражаси 80 фоизга етади. Бу эса минглаб аҳоли хонадонларининг турмуш сифатини яхшилаш, санитария-гигиена шароитларини янада мустаҳкамлаш ва соғлом турмуш тарзини таъминлашга хизмат қилади.

Медиа-тур иштирокчиларининг кейинги манзили Навоий маҳалласида жойлашган кичик саноат зонаси бўлди. Бу ерда фаолият юритаётган корхоналар ҳудуднинг саноат салоҳиятини ошириш ва аҳоли бандлигини таъминлашда муҳим роль ўйнамоқда.

Хусусан, “Ботир Хонқа” МЧЖнинг ичимлик суви ва шарбат қадоқлаш идишларини ишлаб чиқариш корхонаси фаолияти ўрганилди. Умумий қиймати 2 миллиард 632 миллион сўмни ташкил этувчи мазкур лойиҳа натижасида 10 та янги иш ўрни яратилган. Корхонада замонавий ускуналар ёрдамида ишлаб чиқарилаётган маҳсулотлар ҳудуддаги ички бозор талабини қондириш билан бирга, келгусида экспорт салоҳиятини ҳам кенгайтириши кутилмоқда.

Медиа-тур давомида нон ва нон маҳсулотлари ишлаб чиқаришга ихтисослашган “Равшанбек Юлдузхон” МЧЖ ҳамда сут маҳсулотлари ишлаб чиқаришга ихтисослашган “Kamron Gold Media” МЧЖ фаолияти ҳам ўрганилди.

Мазкур корхоналарда бугунги кунда 33 нафар фуқаро доимий иш билан таъминланган бўлиб, улар орасида ижтимоий ҳимояга муҳтож аёллар ва илгари ишсиз бўлган фуқаролар ҳам бор. Бу эса корхоналарнинг нафақат иқтисодий, балки муҳим ижтимоий аҳамиятга эга эканини кўрсатади. Корхоналарда 10 дан ортиқ турдаги сифатли сут маҳсулотлари ишлаб чиқарилмоқда. Ҳар куни 600 литрдан ортиқ сут қайта ишланиб, истеъмолчиларга етказиб берилади. Айниқса, маҳсулотларнинг тумандаги давлат мактабгача таълим ташкилотларига шартнома асосида етказиб берилаётгани болаларнинг сифатли ва табиий озиқ-овқат маҳсулотлари билан таъминланишига хизмат қилмоқда.

Медиа-тур давомида журналист ва блогерлар Амударё туманида амалга оширилаётган ислоҳотларнинг амалий натижалари билан яқиндан танишиш имконига эга бўлдилар. Янги саноат корхоналари, замонавий инфратузилма объектлари, ичимлик суви таъминотини яхшилашга қаратилган лойиҳалар ҳамда аҳоли бандлигини таъминлаш бўйича олиб борилаётган ишлар ҳудудда изчил тараққиёт жараёнлари давом этаётганини яққол намоён этди. Бугунги Амударё — бу нафақат қишлоқ хўжалиги ҳудуди, балки замонавий ишлаб чиқариш, инвестициялар ва янги ташаббуслар марказига айланиб бораётган маскандир. Энг муҳими, амалга оширилаётган ҳар бир лойиҳа ва бунёдкорлик ишлари инсон манфаатлари, аҳоли фаровонлиги ва ҳудуднинг барқарор ривожланишига хизмат қилмоқда.

Чарос Арслонова, туман ҳокимлигининг Ахборот хизмати раҳбари.