ЭЛГА ЯРАШИҚЛИ КЕКСАЛАР

Юртимизда кўпни кўрган, ўзларининг ҳаётий тажрибалари, хулосалари асосида ёшларга улкан сабоқлар бериб, турмушимиз гўзал ва файзли бўлишига ҳисса қўшаётган нуроний кексаларимиз талай.

Умрининг 102 баҳорини қарши олаётган "Хизр эли” маҳалласида истиқомат қилувчи пир-у бадавлат момо Пардагул Бекниёзова ана шуларнинг бири.

Момонинг болалиги, ёшлиги ҳақидаги гурунгларига қулоқ тутган киши эртак тинглагандай бўлади. Бироқ собиқ иттифоқ даврида юртдошларимиз бошидан кечирган бундай заҳматли йиллар, афсуски, ҳақиқат.

– Тонг ёришмай пахта отизга тушар эдик. То қоронғу тушгунча тинимсиз ишлашга мажбур эдик. У пайтларда барча сув йўллари қўл билан қазилар, эркагу аёлга бирдай одимлаб, иш ҳажми тенг ўлчаб берилар эди. Бола, оила ташвиши билан фақат тунда шуғулланар эдик, – дейди момо ўша кунларини хотирлаб...

Пардагул Бекниёзова турмуш ўртоғи Ҳайитбой Бекниёзов билан ана шундай оғир шароитларда яшаб, икки ўғил, икки қиз – Ниёзжон, Авазжон, Сотиболди, Собирларни дунёга келтириб, эл корига ярайдиган инсонлар қилиб тарбиялади.

Ҳозир момо невара, чевара, эвараларининг сонидан ўзи ҳам адашиб кетади, баъзан.

– Яқинда човлиғим ҳам фарзандли бўлди. Аёллар бир туғса, мен тўрт марта туғдим. Фарзандларимдан ташқари оқтиқ, човлиқларимни ҳам боқиб улғайтирдим. Энди қувлиғимнинг ҳам бешигини чайқаб, аллалаб, оёқлантирсам, деган умидим бор, – дейди момо.

Пардагул Бекниёзовани биз йўқлаган куни 8 март – Халқаро хотин-қизлар куни байрами билан қутлаш учун Манғит шаҳрида истиқомат қилувчи синглиси Тажигул Қурбонбоева ҳам ташриф буюрган экан.

– Худога шукр, эл-юртимизнинг, фарзандларимизнинг эъзозидан, эътиборидан кўнглимиз юксалиб, бугунгидай фаровон кунларда яшамоқдамиз, – дейди мамнуният билан опа-сингил.

Бир юз икки ёшида ҳам ҳамон фикрлари теран, сўзлари маъноли, ҳеч кимнинг мададисиз ўзини ўзи эплашга ҳаракат қилаётган нуроний момо Пардагул Бекниёзова ва синглисиТажигул Қурбонбоевалар билан биз ҳам эл-юртимизга файз бўлиб, яна узоқ яшашини тилаб хайрлашдик.

Ойгул РАЖАБОВА.

(Фото - http://uza.uz)