Амударёда нуронийлар ўртасида “Ғайратли кексалар” спорт мусобақаси ўтказилди

Жамиятнинг мустаҳкам таянчи, ёш авлоднинг маънавий устозлари бўлмиш нуроний отахон ва онахонларимиз ҳамиша давлатимизнинг юксак эътиборида ҳамда ардоғида бўлиб келмоқда. Бугунги шиддат билан ривожланаётган даврда кекса авлод вакилларининг ҳаётини сермазмун ва ёрқин лаҳзаларга бой тарзда ташкил этиш, уларнинг соғлиғини асраш, шунингдек, ижтимоий ва маданий фаоллигини ошириш давлат сиёсатининг энг устувор йўналишларидан саналади. Шу ўринда, яқиндагина Амударё туманида ўтказилган соғлом турмуш тарзи байрами, аниқроғи, фахрийлар иштирокидаги оммавий мусобақалар юқоридаги фикримизнинг ёрқин далилидир.

 “Нуроний” жамғармаси Амударё тумани бўлими ташаббуси билан ҳудуддаги энг фаол, шижоатли ва спортсевар нуронийлар ўртасида “Ғайратли кексалар” шиори остида спорт мусобақасининг туман босқичи кўтаринки руҳда ўтказилди.

Таъкидлаш жоизки, спорт тадбири Ўзбекистон Республикаси Президентининг 2024 йил 25 ноябрь кунги “Камбағалликдан фаровонлик сари” дастурини амалга оширишда фаол нуронийларни жалб этиш ва уларнинг имкониятларидан самарали фойдаланиш тўғрисида”ги қарори ижросини таъминлаш мақсадида ташкил этилди. Мазкур ҳужжатнинг туб моҳиятида кекса авлод вакиллари учун уларнинг ёши, салоҳияти ва жисмоний ҳолатига тўла мос келадиган турли спорт тадбирларини мунтазам ҳамда тизимли равишда ташкил этиш мақсади ётади. Қолаверса, уларни оммавий жисмоний тарбия ва спорт билан шуғулланишга кенг жалб этиш орқали соғлом жамият пойдеворини яратишдек эзгу мақсадлар мужассамдир.

Давлатимиз раҳбарининг ушбу қарори доирасида амалга оширилаётган ва бутун республикамиз бўйлаб қулоч ёзган бу каби тадбирлар амударёлик кексаларининг бўш вақтларини сермазмун ва фойдали ташкил этишда катта аҳамият касб этмоқда. Уларнинг жисмоний ҳамда руҳий саломатликларини янада мустаҳкамлаш, шунингдек, барча маҳаллаларда чин маънодаги “Фаровон ҳаёт” муҳитини яратишда мазкур мусобақалар беқиёс аҳамиятга эга.

Мазкур спорт мусобақаларининг туман босқичида Амударёнинг энг фаол ва спортсевар нуронийлари шахмат, шашка, миллий кураш ҳамда мини-футбол каби 4 та оммабоп спорт тури бўйича ўзаро куч синашдилар. Беллашувлар давомида иштирокчиларнинг ғалабага бўлган иштиёқи ва шу билан биргаликда, ўзаро дўстона рақобат муҳити барча йиғилганларга ўзгача завқ, кўтаринки кайфият бағишлади.

Ақл гимнастикаси саналган шахмат ўйини бўйича эркаклар ўртасидаги баҳслар ўта кескин, муросасиз ва қизиқарли вазиятларга бой тарзда кечди. Донолар ўйини якунларига кўра, Исмоил Ибрагимов барча рақибларини ортда қолдириб, фахрли 1-ўринни эгаллади. Навбатдаги поғоналар эса Рустам Юсупов ҳамда Ботиржон Шомуратовларга насиб этди.

Аёллар ўртасидаги шахмат мусобақаларида эса Гулора Аллаёрова 1-ўринни қўлга киритган бўлса, Гулчеҳра Аллабергенова 2-ўринга сазовор бўлди. Шунингдек, шашка бўйича аёллар ўртасидаги ўйинлар ҳам қизғин паллаларга бой бўлиб, томошабинларнинг диққатини тортди. Ушбу йўналишда Муҳаббат Машарипова тенгсиз ва маҳоратли деб топилиб, 1-ўринга муносиб кўрилди. Умида Бекимбетова 2-ўринни ва Гулчеҳра Атабаева 3-ўринни эгаллашга муваффақ бўлиб, томошабинларнинг олқишларини олишди.

Узоқ тарихга эга бўлган миллий ифтихоримиз — кураш беллашувлари эса спорт мухлисларининг асосий диққат марказида бўлди. 80 килограммгача бўлган вазн тоифасидаги беллашувларда Кўклан полвон Раҳимов рақибларига ҳеч қандай имконият қолдирмай, мутлақ ғолибга айланди ва 1-ўринни эгаллади. Махсуд полвон Кенжаев 2-ўринни, Гулмирза полвон Душамов эса 3-ўринни қўлга киритиб, ҳали ҳам билакларида куч борлигини исботлашди.

80 килограммдан юқори бўлган вазн тоифасидаги полвонлар беллашуви эса янада ҳаяжонли кечди. Унда Давлатбой полвон Эшниязов ўзининг ажойиб усуллари билан барчани лол қолдириб, 1-ўрин соҳибига айланди. Муносиб рақиблар сифатида Аллаёр полвон Юлдашев 2-ўринни ҳамда Мадиёр полвон Ғоипов 3-ўринни банд этишди.

Мини-футбол бўйича беллашувлар ҳам чинакам спорт байрамига айланиб кетди. Яшил майдонда тўп сурган нуронийлар жамоалари ўртасидаги шиддатли ҳамда муросасиз ўйинлар натижасига кўра, “Куюк-кўпир” овулининг фаол нуронийлар жамоаси барча рақибларидан устун келиб, 1-ўринни эгаллади. Футбол майдонида ўзларининг чиройли ўйинларини намойиш этган “Олмазор” маҳалласи вакиллари 2-ўринни эгаллаган бўлса, мухлисларнинг қизғин қўллаб-қувватлашига эришган “Гулзор” маҳалласи фахрийлар жамоаси 3-ўринни қўлга киритди.

Мусобақанинг энг ҳаяжонли ва эсда қоларли лаҳзалари, албатта, тантанали тақдирлаш маросими бўлди. Юқори тайёргарлик кўриб, фахрли 1-, 2- ва 3-ўринларни қўлга киритган, шунингдек, беллашувларда ўзининг алоҳида фаоллиги, шижоати ҳамда спортга бўлган муҳаббатини кўрсатган барча фахрийлар “Нуроний” жамғармаси томонидан қимматбаҳо совғалар, дипломлар ва эсдалик мукофотлари билан тантанали равишда тақдирландилар.

Тақдирлаш маросимида “Нуроний” жамғармасининг Қорақалпоғистон бўлими бошлиғи Турсунбой Абдижаббаров сўзга чиқиб, нуронийларга кўрсатилаётган бундай юксак эътибор ва чексиз ғамхўрлик учун улар номидан муҳтарам Президентимизга чин дилдан миннатдорлик билдирди. Сўзга чиққан нуронийлар ўзлари яшаётган овул ва маҳаллаларда мана шундай замонавий ва қулай шароитлар яратилиб, оммавий спорт тадбирлари мунтазам равишда ташкил этилаётганидан беҳад мамнун эканликларини фахр билан тилга олдилар.

Ҳаётнинг пасту баландларини кўрган отахон ва онахонларимиз ўзларининг самимий дил сўзларида давлатимиз раҳбарига ҳамда ушбу тадбир ташкилотчиларига чексиз миннатдорчилик изҳор этиб, юртимизнинг барқарор тинчлиги, осмонимизнинг мусаффолиги ва халқимизнинг фаровонлигини тилаб, дуога қўл очдилар. Кексаларни улуғловчи мазкур спорт мусобақаси нафақат жисмоний синов, балки авлодлар орасидаги меҳр-оқибат, кексаларга бўлган юксак эҳтиром ва соғлом турмуш тарзининг ёрқин намунаси сифатида барчага бирдек манзур бўлди.