"Ғайратли кексалар" шиори остида ўтказилган навбатдаги мусобақаларда шахмат ва шашка спорти бўйича маҳоратли ва ғайратли нуронийлар аниқланди

Мамлакатимизда маҳаллаларда соғлом турмуш тарзини тарғиб қилиш, айниқса, фаол нуронийларни ва уларнинг ташаббусларини қўллаб-қувватлаш, Президентимизнинг 2024 йил 25 ноябрдаги “Камбағалликдан фаровонлик сари” дастурини амалга оширишга фаол нуронийларни жалб этиш чора-тадбирлари тўғрисида”ги қарори ижросини таъминлашга қаратилган саъй-ҳаракатлар туфайли кекса авлод вакиллари тобора фаоллашиб, ёшларга ибрат бўлишмоқда. Айниқса, нуронийлар иштирокида ўтказилаётган маънавий-маърифий тадбирлар, турли спорт мусобақалари уларнинг жамиятда соғлом турмуш тарзини қарор топтиришга бўлган иштиёқларини рағбатлантириш имконини бермоқда.

“Нуроний” жамғармаси Амударё тумани бўлими томонидан “Ғайратли кексалар” шиори остида деярли ҳар ҳафтада ташкиллаштирилаётган спорт мусобақалари, саломатлик учун пиёда юриш тадбирлари қамрови тобора кенгайиб, бу тадбирларга туманнинг энг чекка ҳудудларида истиқомат қилувчи нуронийлар ҳам қамраб олинаётгани жуда қувонарли.

Дастлаб “Ғайратли кексалар” шиори остидаги дўстона беллашувлар спортнинг миллий кураш тури бўйича ўтказилиб, унда туман босқичи ғолиблари аниқланган эди. Навбатдаги мусобақалар эса ғайратли-шижоатли кексаларнинг шахмат ва шашка бўйича ўзаро беллашувларига бой тарзда ўтди.

Мазкур мусобақанинг туман босқичида тумандаги 49 та овул ва маҳалла фуқаролар йиғинларидан келган нуронийлар иштирок этдилар. Қизғин баҳсларга бой, дўстона вазиятда ўтган мусобақаларда Олмазор, Гулзор, Боғ, Бўстон маҳаллалари нуронийлари фаоллик кўрсатдилар. Айниқса, шахмат бўйича бўлиб ўтган ғайратли кексаларнинг беллашуви қизиқарли таассуротларга бой, курашчанлик руҳида ўтди.

Унга кўра, ғайратли-шижоатли нуроний Маматсолай Матёқубов энг моҳир шахматчи сифатида эътироф этилиб, 1-ўринни эгаллади. Ўзининг чиройли комбинацияларни қўллаш маҳорати билан ҳакамлар ҳайъати аъзоларининг эътиборини қозонган Шомурод Ибодуллаев 2-ўринга муносиб кўрилди. Шахмат спорти бўйича 3-ўрин Жумабой Матвафоевга насиб этди.

Шашка бўйича аёллар ўртасида ўтказилган мусобақаларда ўзининг тенгсиз маҳоратини намоён этган ғайратли нуроний Зулфия Аллаёрова фахрли 1-ўринни эгаллади. Мусобақада Бўстон маҳалласи шарафини муваффақиятли ҳимоя қилган ғайратли нуроний Нина Хўжаева 2-ўринга лойиқ кўрилди. 3-ўрин эса мусобақа давомида ғалабага бўлган ишончини йўқотмаган, қалби ғайрат-шижоатга тўла нуроний Гулчеҳра Алламовага насиб этди.

Дўстона ва самимий вазиятда ўтган мусобақа якунида фахрли ўринларни эгаллаган ғайратли нуронийларга мусобақа ташкилотчилари томонидан чуқур миннатдорлик билдирилиб, “Нуроний” жамғармаси Қорақалпоғистон Республикаси бўлимининг дипломлари ва эсдалик совғалари топширилди.

Мусобақа ғолибларини тақдирлаш маросимида сўзга чиққан нуронийлар Юртбошимиз томонидан мамлакатимизда, шу жумладан Амударё туманида ҳам кекса авлод вакилларига қаратилаётган юксак эътибор ва рағбатдан мамнун эканликларини билдирдилар. Шу билан бирга нуронийлар ўртасида бу каби мусобақалар, айниқса, спорт турлари бўйича беллашувлар, эрталабки саломатлик учун пиёда юриш машқлари, соғлом турмуш тарзига бағишланган тарғибот-ташвиқот тадбирларининг кўпроқ ўтказилиши тарафдори эканликларини маълум қилиб, бу ишларнинг кексалар фаоллигини оширишдаги аҳамиятига юқори баҳо бердилар.

Робия Йўлдошева тайёрлади.