"Gʻayratli keksalar" shiori ostida oʻtkazilgan navbatdagi musobaqalarda shaxmat va shashka sporti boʻyicha mahoratli va gʻayratli nuroniylar aniqlandi

Mamlakatimizda mahallalarda sogʻlom turmush tarzini targʻib qilish, ayniqsa, faol nuroniylarni va ularning tashabbuslarini qoʻllab-quvvatlash, Prezidentimizning 2024-yil 25-noyabrdagi “Kambagʻallikdan farovonlik sari” dasturini amalga oshirishga faol nuroniylarni jalb etish chora-tadbirlari toʻgʻrisida”gi qarori ijrosini taʼminlashga qaratilgan saʼy-harakatlar tufayli keksa avlod vakillari tobora faollashib, yoshlarga ibrat boʻlishmoqda. Ayniqsa, nuroniylar ishtirokida oʻtkazilayotgan maʼnaviy-maʼrifiy tadbirlar, turli sport musobaqalari ularning jamiyatda sogʻlom turmush tarzini qaror toptirishga boʻlgan ishtiyoqlarini ragʻbatlantirish imkonini bermoqda.

“Nuroniy” jamgʻarmasi Amudaryo tumani boʻlimi tomonidan “Gʻayratli keksalar” shiori ostida deyarli har haftada tashkillashtirilayotgan sport musobaqalari, salomatlik uchun piyoda yurish tadbirlari qamrovi tobora kengayib, bu tadbirlarga tumanning eng chekka hududlarida istiqomat qiluvchi nuroniylar ham qamrab olinayotgani juda quvonarli.

Dastlab “Gʻayratli keksalar” shiori ostidagi doʻstona bellashuvlar sportning milliy kurash turi boʻyicha oʻtkazilib, unda tuman bosqichi gʻoliblari aniqlangan edi. Navbatdagi musobaqalar esa gʻayratli-shijoatli keksalarning shaxmat va shashka boʻyicha oʻzaro bellashuvlariga boy tarzda oʻtdi.

Mazkur musobaqaning tuman bosqichida tumandagi 49 ta ovul va mahalla fuqarolar yigʻinlaridan kelgan nuroniylar ishtirok etdilar. Qizgʻin bahslarga boy, doʻstona vaziyatda oʻtgan musobaqalarda Olmazor, Gulzor, Bogʻ, Boʻston mahallalari nuroniylari faollik koʻrsatdilar. Ayniqsa, shaxmat boʻyicha boʻlib oʻtgan gʻayratli keksalarning bellashuvi qiziqarli taassurotlarga boy, kurashchanlik ruhida oʻtdi.

Unga koʻra, gʻayratli-shijoatli nuroniy Mamatsolay Matyoqubov eng mohir shaxmatchi sifatida eʼtirof etilib, 1-oʻrinni egalladi. Oʻzining chiroyli kombinatsiyalarni qoʻllash mahorati bilan hakamlar hayʼati aʼzolarining eʼtiborini qozongan Shomurod Ibodullayev 2-oʻringa munosib koʻrildi. Shaxmat sporti boʻyicha 3-oʻrin Jumaboy Matvafoyevga nasib etdi.

Shashka boʻyicha ayollar oʻrtasida oʻtkazilgan musobaqalarda oʻzining tengsiz mahoratini namoyon etgan gʻayratli nuroniy Zulfiya Allayorova faxrli 1-oʻrinni egalladi. Musobaqada Boʻston mahallasi sharafini muvaffaqiyatli himoya qilgan gʻayratli nuroniy Nina Xoʻjayeva 2-oʻringa loyiq koʻrildi. 3-oʻrin esa musobaqa davomida gʻalabaga boʻlgan ishonchini yoʻqotmagan, qalbi gʻayrat-shijoatga toʻla nuroniy Gulchehra Allamovaga nasib etdi.

Doʻstona va samimiy vaziyatda oʻtgan musobaqa yakunida faxrli oʻrinlarni egallagan gʻayratli nuroniylarga musobaqa tashkilotchilari tomonidan chuqur minnatdorlik bildirilib, “Nuroniy” jamgʻarmasi Qoraqalpogʻiston Respublikasi boʻlimining diplomlari va esdalik sovgʻalari topshirildi.

Musobaqa gʻoliblarini taqdirlash marosimida soʻzga chiqqan nuroniylar Yurtboshimiz tomonidan mamlakatimizda, shu jumladan Amudaryo tumanida ham keksa avlod vakillariga qaratilayotgan yuksak eʼtibor va ragʻbatdan mamnun ekanliklarini bildirdilar. Shu bilan birga nuroniylar oʻrtasida bu kabi musobaqalar, ayniqsa, sport turlari boʻyicha bellashuvlar, ertalabki salomatlik uchun piyoda yurish mashqlari, sogʻlom turmush tarziga bagʻishlangan targʻibot-tashviqot tadbirlarining koʻproq oʻtkazilishi tarafdori ekanliklarini maʼlum qilib, bu ishlarning keksalar faolligini oshirishdagi ahamiyatiga yuqori baho berdilar.

Robiya Yoʻldosheva tayyorladi.