"КЕКСАЛАР МАСЛАҲАТИ – ОЛТИНДАН ҚИММАТ" МАВЗУСИДА ДАВРА СУҲБАТИ ЎТКАЗИЛДИ

Нуронийлар — хонадонларимизнинг фаришталари. Уларнинг катта ҳаётий тажрибалари ўсиб келаётган ёш авлод учун мисли бир дорилфунундир. Уларнинг даврасида бўлиш, ҳаёт ҳикматларига тўла, сермазмун суҳбатларини тинглаш қалбларга маънавий куч бағишлайди, шу баробарида хатоларимиздан тегишли хулосалар чиқариш, турмуш тарзимизни ижобий ва яхши томонга ўзгартириш, ахлоқан покланиш сари интилиб яшашга даъват этади.

Шунинг учун ҳам мамлакатимизда кекса авлод вакилларининг ибрат ва ҳикматга тўла ҳаёт йўллари, маслаҳат ва ўгитлари маънавий тарбиянинг намунали тамойили сифатида алоҳида эътироф этилади. Халқимиз “Кексалар маслаҳати – олтиндан қиммат”, “Қари билганини пари билмас”, “Оталар сўзи — ақлнинг кўзи” каби ҳикматли ибораларни бекорга яратмаган.

“Нуроний” жамғармасининг Амударё туман бўлими томонидан нуроний отахон ва онахонлар иштирокида ташкиллаштирилаётган “Уч авлод учрашуви”, “Нуронийлар – хонадонларимиз кўрки” мавзуларидаги ёшлар билан учрашувлар, дилдан самимий мулоқот тадбирлари ҳам ушбу ҳикматларнинг амалдаги тасдиғидир.

Яқинда жамғарманинг Амударё туман бўлими биносида ўтказилган “Кексалар маслаҳати – олтиндан қиммат” мавзусидаги давра суҳбатида ҳам нуронийлар ўсиб келаётган ёш авлодни миллий-маънавий қадриятларга ҳурмат, ҳалоллик ва меҳнатсеварлик, ватанпарварлик руҳида тарбиялашга қаратилган қимматли фикр ва маслаҳатлари билан фаол иштирок этиб, тадбир иштирокчиларига маънавий руҳ бағишладилар.

Очиқ мулоқот ва самимийлик руҳида ўтган давра суҳбатида Ўзбекистон Республикаси “Нуроний” жамғармаси Тошкент шаҳар бўлимидан ташриф буюрган меҳмон Жумамурод Собиров, Амударё тумани ҳокимининг ўринбосари, Оила ва хотин-қизлар бўлими бошлиғи Гўзал Сабурова, “Нуроний” жамғармаси Амударё туман бўлимининг жамоатчилик Кенгаши раҳбари Бекман Алламберганов, нуронийлардан Амангул Қаюпова, Мадамин Казаковлар ҳамда туман ёшлари билан ишлашда ўзига хос тажриба мактабини яратган фаол нуронийлар иштирок этдилар.

Давра суҳбати давомида “Нуроний ҳар бир оилага масъул” лойиҳаси асосида муаммоли оилаларнинг ҳар бирига “Кексалар маслаҳати” гуруҳлари томонидан бириктирилган нуронийлар ҳудудлардаги нотинч оилалар билан ишлашдаги тажриба ва ташаббуслари хусусида батафсил сўз юритишиб, ажрашиш ҳолатига бориб қолган оилаларни яраштириш борасидаги фикр ва маслаҳатларини билдирдилар.

Оилалардаги низо ва жанжаллар ўз-ўзидан келиб чиқмайди. Кўпинча иқтисодий жиҳатдан яхши таъминланмаганлик, камбағаллик, оила аъзоларининг ишсизлиги натижасида оила пойдевори дарз кетади. Шу боис, Амударё туманида “Бир нуроний — ўн ёшга масъул” тамойили асосида ҳудудлардаги кам таъминланган, ижтимоий ҳимояга муҳтож оилаларнинг ўз даромад манбаига эга бўлишларига кўмаклашишга алоҳида эътибор қаратилади.

Ёшларнинг бандлигини таъминлаш, уларни касб-ҳунарга ўқитиш орқали тадбиркорлик фаолиятига кенг жалб қилиш мақсадида нуронийлар ўзларига бириктирилган ёшлар билан мунтазам равишда иш олиб бориб, кўплаб оилаларнинг камбағалликдан чиқишларига кўмакдош бўлишмоқда.

Давра суҳбати иштирокчилари оилавий ажрашишларнинг олдини олиш, шу тоифадаги оилаларни яраштириш борасида “Нуроний” жамғармаси туман бўлими ҳузуридаги “Бувижонлар мактаби” жамоатчилик тузилмаси ва “Кексалар маслаҳати” гуруҳи аъзоларининг биргаликдаги саъй-ҳаракатлари ўзининг ижобий натижасини бераётганини мамнуният билан таъкидладилар.

Шунингдек, бугунги кунда амударёлик фаол нуронийлар маҳаллаларда “Камбағалликдан фаровонлик сари” тамойили асосида амалга оширилаётган барча эзгу ишларнинг илҳомчилари, яқин маслаҳатгўйлари, ташаббускорлари сифатида изчил фаолият олиб боришаётганлари алоҳида эътироф этилди.

“Кексалар маслаҳати — олтиндан қиммат” мавзусида ўтказилган давра суҳбати нуронийларнинг нафақат босиб ўтган ибратли ҳаёт йўллари, балки ёш авлодни миллий-маънавий қадриятлар руҳида тарбиялаш борасидаги ҳар бир иши келажак авлод учун чинакам дорилфунун бўлиб хизмат қилишининг амалий исботи бўлди.

Робия ЙЎЛДОШЕВА.